1 Yange Paulu na Siluvanasi na Timateo.

Ku vantu va cikungulukilo ca mu Tesalonika, vaje vanakundama kuli Njambi Tate na Muene Yesu Kilistu.

Kavumbi na ciyulo vikale neni.

2 Ntsimbu yoshe tukatsantsela kuli Njambi hali yeni voshe, kaha naua ntsimbu yoshe tukamilombelela. 3 Tukavuluka ku mesho a Njambi yetu na Tatetu muje mumunahaka lutsilielo lueni mu vipangi, na muje cizango ceni cili nakumihundanganesa, na muje kutsiliela ceni mukukola ngoo muli Muene uetu Yesu Kilistu. 4 Vamuanetu, tuazivuka nguetu Njambi ua mizanga naua namihangula kupua mu vendi, 5 muomu tuaminehelele Muzimbu Uacili, keti na mezi lika, vuno honi na nzili na Cimbembesi Uakulela, kaha na lukakateya lua vusunga vuavio. Muazivuka muje vati tuayoyele omo tuakele hamo neni, eci capuile ngeci muomu yeni. 6 Muatemunuisile yetu na Muene, kaha cipue vene muayandele cikuma, vuno honi muatambuile muzimbu na nzolela ije ikahumu kuli Cimbembesi Uakulela. 7 Nankuma, yeni muapuile cimueso kuli voshe vaka kutsiliela mu Masendoniya na mu Akaya. 8 Muomu keti lika ngue lizi lia Muene liahumine kuli yeni mu Masendoniya na mu Akaya houe, vuno honi muzimbu ua lutsilielo lueni muli Njambi unashandokela kuoshe. Nankuma, nacimo cahi cituasa kuhandeka. 9 Vantu va kucihela kuje vakele nakuhandeka muje vati yeni muatutambuile omo tuezile nakumimona, kaha naua na muje vati muatengulukile kuhuma ku tumponia nakuija kuli Njambi, nakupangela Njambi ua vusunga uakuyoya, 10 nakuvandamena Munendi omo akeja kuhuma muilu, Munendi Yesu, uje yasanguile ku vatsi, naua ikeye uje akatupatula ku vutenu vua Njambi vuje vulinakuija.