1 Mukumanusula, vamuanetu, tumilomba nakumisindiya muli Muene Yesu, nguetu ngue muje mu mualilongesele kuli yetu vati muje munapande kuyoya linga muvuahelese Njambi. Ngue muje mumuli nakulinga. Lingeni muje vene na kuvuezelelaho cikuma. 2 Muomu muazivuka vishika vituamihanene kuhitila mu nzili yakama ya Muene Yesu. 3 Njambi atonda linga mupue vakulela na kupatuka ku vukoyi. 4 Muntu na muntu kuli yeni vamala napande kuzivuka vati muje napande kuyoya na mpueyendi mu ngila yakulela na kasingimiko, 5 keti na vukoyi, ngue vakakuhona kutsiliela vaje kuvazivuka Njambi. 6 Mucifua eci vene, naumo uahi ueni napande kulinga muamupi kuli muanaye ua yala cipue ua mpuevo cipue kuvazangamena. Tuaminanguile laja ha cuma eci, kaha tuaminanguile na nzili nguetu Muene akahana kashitiko kuli vaje vakalingi evi. 7 Njambi katusanene linga tuyoye mu vukoyi, vuno honi mu kulela. 8 Nankuma, uoshe uje aviana vilongesa evi kaviana muntu, vuno honi aviana Njambi uje akamihana Cimbembesi uendi Uakulela.

9 Kutuapandele kumisonekela via cizango kuli umo na mukuavo. Muomu yeni vavenia Njambi uamilongesele vati muje munapande kulizanga umo na mukuavo. 10 Kaha munakala nakulinga ngeci kuli vaka kutsiliela voshe mu Masendoniya muoshe. Nankuma tumilomba vamuanetu, vuezeleleniko cikuma. 11 Pueni vaka kuyoya mukuholoka, hakeni mana eni ku viuma vieni, nakupanga viakulikuasa navio yeni vavenia, ngue muje tuamilekele laja. 12 Mu ngila eyi vene, mukatambula kasingimiko kuli vaje keti vaka kutsiliela, kaha kumu kayoyela hali muntu umo kuli vije munajena.

13 Vamuanetu, tutonda muzivuke vusunga hali vaje vanatsi, linga keti mukale navusiua, ngue vaje kuvesi nakutsiliela. 14 Muomu tunatsiliela nguetu Yesu uatsile, kaha uasangukile naua, kaha tunatsiliela nguetu Njambi akaneha hamo na Yesu vaje vatsile mukutsiliela kuli ikeye.

15 Evi tumilongesa hano vinapu vilongesa via Muene linga yetu vaje vacili nakuyoya ha litangua lije Muene akeja kutukatuama kulutue lua vaje vanatsi. 16 Kukakala mutambi ua lizi liakama liakushika, lizi lia kangelo uakama, nakuohia ca tolombita ya Njambi, kaha Muene ikeye vavenia akashuluka kuhuma muilu. Kaha vaje vatsile mukutsiliela kuli Kilistu vaka sangukila ku muono ha kulivanga, 17 ambahoni yetu vaje tucilinakuyoya ha ntsimbu ije vakatukunguluila hamo navo mu mashelua nakuliuana na Muene havukambuila. Kaha tukakala hamo na Muene ntsimbu yoshe ya yaye. 18 Nankuma, likoleseni umo namukuavo na mezi aua.