1 Paul, Tinggwang anuide kelikelube nah anui kereguibe Rampaube Jisu Khrista aja gade Khrista Jisu ne langkegaibe ne raupwa, 2 kenlum gade a na kesangbe Timothy dage kekai: Peibe Tinggwang nah anui Rampaube Khrista Jisu ngaugia, keku, nah lungciep peu n da bam kelube tei lulo.

3 Ih Macedonia deuceu ga mie keladau Ih ncu kecung kegai nzwa eh Ephesus namdi ga bamlu, iciu eh kangge keledeu sam keda teu ledeu kebamme de sita di lulo nang aja kaibeulu kerane, 4 nah peu herasam nah rang canggai kelak paupai hadung püt dilo rang beulo; cidungde Tinggwang ta ketei kenlum gade mene kesamlim kecu teidi lalu.✝ 5 Cu aja aide kiede au helung kemci, nah helung kemzui, nah kenlum kesangbe gade kepet keku de, 6 midungge aikade nreupwa kemie sam kerang gage nreugai dida. 7 Penui hezai keledeume teineu lala, dede penui rang kebamde mede penui cilie rang keladung de penui ci lama. 8 Dede hezaibe au mzai siakte lucai yikecu anui cibam. 9 Hezaibe au makesangme ziemne rietnzeu ma, dede hezai gikah kecume nah samzai tei kemakme, nlumkemakme nah kemaume, rabe lam la kemakme nah mci kemakme, mipui nah mipei de dapketsetme, mide teiketsetme, 10 kemmhame, mipei kerai ngngwa nauhepei zai keteime, mide kenimme, kenretme, kemret zierang keteime nah keledeu sam kesangbe ngaurau kelame ziemne, 11 keledeu sam cide au kendu nah samlam kepung anui Tinggwang dade kegwang samlia keyi acu ranglo nlum kebeu deda.

12 Acu teingkieng kebeube, anui Rampaube Khrista Jisu de Ih twala, kedanemene pa acu nlumlukebuime ge lie eh pe ta tei kera gage kedetgai kelune, 13 Ih ndaa pecu rangmsia nah ngaurau nah mneula liede, dede acu ngau ngiabeu, kedanemene Ih ci mene nlum kemak gade tei kelane. 14 Nah anui Rampaube ngaugia, Khrista Jisu da kebam kenlum nah keku de ada puilu. 15 Aipau samde nlumlukebui nah luu kaplukebui samge, "Khrista Jisu kemaumedung de kelilu zielie kideu ga gwang,"—Ih kemaume kakgade mautube. 16 Dede Ih aipau kiede ziemne ngaugia ngaulu, iciu eh a dade, mautube dade, Jisu Khrista pelung tiesüt kecude pecu nlum delwe kelungta kering ngaulu kerane dage puisau ge lu kerane. 17 Cu peu kelungta Hegwang, tsaila kemak, ngaula kemak, Tinggwang ket rünne kecube de peu kelungta nah kelungta hetwa pung nah ndu la kelube tei lulo. Amen.

18 A na, Timothy, aipau aja de nreu gage Ih kaigai la, cide ndaa n ha caihakecime rang kenzeu nzwa da, iciu eh nang sam cidungde teu kerenia gade ngkienglu kerane, 19 kenlum nah helung kemzui kerakteu eh sap ntiplu. Midungge ci kenade pütdi eh penui kenlum lim sia kedibe nzwa dida, 20 cidungde kakga de Hymenaeus penai Alexander de si, Ih penaide peu Tinggwang de rangmsia melu kera ledeulu kerane satan ba gage kai dida.