1 Kecingpei gede kesiu so, dede n pei nzwa eh pecu kecunglu, mipei henabe riade n siname nzwa ngngwa lu,✝ 2 kecingpuime de n puime nzwa, mipui henabe riade n timedung nzwa, ma pelane gade mcigi eh penuide ngngwa lu. 3 Hemipui de rütlu—hemipui kesangme* de.✝ 4 Magade hemipui ge pe name mede pe tsame bamcai, peu keraibe penuide penuikatei penui kilungme de rüt kecu zai cilu eh penui puipei nah penui paupai mapie dailu, kedanemene aide Tinggwang pe suilu. 5 Dede hemipui pekatei rünne nah hemipui kesangbe tei kedibe Tinggwang de reguibam dila nah tingmui tingba pe nggiadung kie eh kekie teibam jüja dila.✝ 6 Dede hemipui pekatei pe keneube tei kelabe pui au, ringla liede, rabe gade tsai dida. 7 Sam aidungde penui dage rangbeu lulo, iciu eh penuide mmau melu kerane. 8 Dede mige pe kibaume, nah keraide pe kilungme mapie la mecai, pa pe kenlum de mlai dida nah nlum kemakme ge swade siaki dida.✝ 9 Hemipui mipei ge nau nah mmi riakherok kedime rünne zi raulu, 10 nah pa pe bata keyi zierang ketei gade: pa hename ngkwet teune cuh lucai, sangmedung de ngaunggia, kemcime pi hui, keherei kelamede ngha, nah lungsang tei eh makeyi pelane tei lucai. 11 Dede hemipui henabe ria zi rau so, kedanemene penui Khrista samzai tei mene nliem neudi ge, penui meu neu dila, 12 nah penui sampet teikelu raitube teipang kedine penui reu tutiak gwang dila. 13 Ci rünne mene penui matei nghet eh kige gade kige ga mie bamla, nah nghet kecu rünne ma, dede kemtasam rang nah mi kedame de kebwak pwa eh buikemakpe rangla la. 14 Cine Ih peu hemipui henabe riade peu meulwe hename lunghlu delwe kilung pie rengei kecu a lungning lie, iciu eh mide ngaurau kelamede anuide rang msia kera ziuyi peu melu kerade. 15 Kedanemene hemipui henabe ria kangge Satan lambie nreutet dida.✝ 16 Kenlummepui keheibe de pe kibaume hemipuime bamcai, pecu peu penuide nghalu, nah ngqwabe de tei nrütdi so, iciu eh ngqwabe de peu hemipui kesang tei kedime de nghalu kerane.

17 Ngqwa ga hangkiamedung hezaibe teusiakte kelame, keraide mide ma ranglia nah ledeu kelamedung de rüt mtingki lulo. 18 Kedanemene Kesanglaisiu rangla, "Nang hetumseu ciuneu kebam gede pe mui kang helo," nah, "Hetaketeibe pe ziehi ngaulu kerabe."* 19 Hangna mede hangcum zierang ngau kelucaine maige, hangkiame gede kemmau sam kingnei so. 20 Kemau teikelame de mtei na dwade kesiu lo, iciude kedamedung de ngngilu kerane. 21 Hezai aidungde, heneuherüt teidi mene nah mige lamde pwadi mene, mzai siakte lulo, Ih Tinggwang nah Khrista Jisu nah kedetkelu tinggimgwamedung dwade aidungde n dage rangsiakte gaila. 22 Mireu gage n ba hwa zette gaiso,* mede mikedame mau ga kebazwa so. Nkatei ncu teimci pwa bamlu.✝ 23 Dui rünne sakta dilu, dede n za ziemne nah nang cu nah mateei didi kelane kube zau kecam nage teulu. 24 Mikangge mau au hecili eh penui dwa tutiak ga gwang rai dila, dede mina kangge mau au pecaine mi miakngau tei petla. 25 Cinzwa eh bata keyidung de hecili la, nah nkim eh bata keyi tei kegaidungde de langnaige ci gwang dizie.