1 Sam aide nlumlukebui ge: "Mige ngqwata keteime teineu lacai, pa mata keyi ge teineu lada." 2 Cine, ngqwata keteime ge kemau gede gah maisia, penau nau ge, mriak, pekatei pecu ketip, pe zaiyi, mide hegia neu, nah mide ledeulu kebuime maisia, 3 zau sakmiela kemakme, mi dade pezai siala kemakme, dede pezai nciep, kezuyi le kepuime, nah rangkang henginla kemakme maisia, 4 pa pe kilungme de pie siaktelu kelame, nah peu pe name de ma pelane gade pe sam kemzaime maisia, 5 (kedanemene mige pekatei pe kilungme de teuci meliecai, pa dai nzwa eh Tinggwang ngqwa pie rengei lulai?), 6 pa helung nreukelu kehecime kerabe ma, iciu eh pa pecu mning mdi eh herakesiabe de ngngwa kemau ga nlütdi melu kerane. 7 Pa ngqwame kemakme de pecu kerütme ge maisia, iciu eh pa hengam nah herakesiabe tak ga nlütdi melu kerane. 8 Cinzwa eh deaconmedung* de penui zai keyime nah samsang kelame maisia, zausak kemakme,* ma hengin kemakme maisia, 9 helung kemzuibe teu eh kenlum macetkecok de kerak pwa bamlu maisia. 10 Nah penuide keraibe kedak pielu; delwe kesia gede gah cai, peu penuide deaconme teilu. 11 Cinzwa eh penui naudung* de penui zai keyime nah kemta sam rangla kemakme maisia, pe zai mring nah ma pelane gade de nlumlukebuime maisia. 12 Deaconmedung nau ge kebamme maisia, nah penui name nah penui kilung kezeu siakte kecume maisia. 13 Kedanemene deaconme pe ta tei siakte kelame penui sap yi lula nah Khrista Jisu da penui kenlum kebam de kuusüt eh rang lula.

14 Ih zette n da gwang kera regui eh sam aidungde n dage rau gaila, 15 dede Ih gwang ri dicai, laisiu aide nnui Tinggwang kelakga dainzwa petau tei maisiabi kecu nnuide peu ci luzie, cide ringkela Tinggwang ngqwa, kesangbe tsiangdi nah pungpwa kebam de. 16 Kesang, renetkecok* de au di kesang lie:

"Khrista de pumteihbe gade liagai,

cide kesang kecu Kemci Rabe gade cilu,

tinggimgwamedung ne ngaulu,

heleuhdung kakga ledeu,

kideube pecu nlumlu,

nah pecu tinggim ngngwa nghang di."