1 Kedanemene sinamedung, anui nnuida kegwang de kemta ge di kemak nnuikatei de cide cibam. 2 Dede pedwa Philippi namdi gade anuide tei kehereisüt nah teu hengam tei kecu nnui cibam. Nah anuide mi ngaurau süt liede, anui Tinggwang gade kuu eh, Tinggwang samliakeyi de nnui dage ranglia kelu teilu da. 3 Kedanemene anui kecung kegaide au petau kemak mede mci kemak mede mide kecwa gade ma. 4 Meliene, Tinggwang anuide luulu eh anuide samliakeyi de mpüt kebeu nzwa, anui mina suiyi tei kerane rang lama, dede Tinggwang, anui mlung kedakpie kelabe suiyi tei kerane rangla. 5 Kedanemene nnui ci kebam nzwa, madaude anui ketwa samdung teugwang ma, mede hengin gumlu kera sam teugwang ma, Tinggwang ne anui zierangbe delie. 6 Mede anui mina hetwa peei lama, nnui dade mede mi kedame dade de. 7 Khrista ne langkegaime kecune anui nnui dade kielu kebui anui nzeu bam. Cuide, nnui kakga anui hename nzwadi, mipui ge pe name mapie kebam nzwa, * 8 cine anui nnuide keku ziemne, anui Tinggwang samliakeyi de kerang rünne mene anui teilung de nnuide kaibeu kera anui mtei luda. Kedanemene nnui au anui hungkelame dida kecune. 9 Kedanemene sinamedung, anui dainzwa rei nah heta teibi kecu nnui nsung bam zie, anui Tinggwang dade kegwang samliakeyi nnui dage zierang keteidau, nnui migede de tei nrütdi melu kerane anui tingmui tingba heta tei. 10 Nnui nlumkelume kakgade anui daikenzwa gede anui zai mci nah masang nah maumezing bi kecu nnui nah Tinggwang de anui zierang da. 11 Anui nnui hangge ge kecude mipei ge pekatei pe name de ngngwa kelanzwa nnuide ngngwa kecu nnui cibam. 12 Tinggwang, pa nnuide pe hegwangram nah kendu gage qugai kelube, luulu kebui teilung lungh lulo eh nnuide kecung nah teingkuu eh qu gaila.

13 Anui Tinggwang de aide ziemne twabam muila, cide cai, nnui anui dade Tinggwang sam siu kelude mina sam nzwa luu luma, dede Tinggwang sam lie de luulu, cide au kesang delu, nah cide nnui nlumkelume da heta teibam. 14 Kedanemene nnui, sinamedung, Judea deuceu ga Khrista Jisu da kebam Tinggwang ngqwadung de kerelime tei luda. Penui keherei kecu nzwa, nnui de nnui ramme dade keherei da, penui de Jewme dade keherei kecu nzwa, 15 Rampaube Jisu de nah caihakecime de teitset kedime, nah anuide teikeherei nah Tinggwang suiyi teila kemakme nah penui au mina pelane de ngaurau la. 16 Penui anuide peu Gentileme dage kelikelu hade zierang tei laklie eh kaam, iciu eh penui katei penui maudung teipui bam muila. Dede kamtu ga Tinggwang lunghop penui reuga gwang bam dida.

17 Dede, sinamedung, nnui dade anui tingkak nage helungbe gade mene pumteih gade lamna di. Anui nnuide reguisüt eh gwang nnuide kezungau dai kera reguisüt bam. 18 Kedanemene anui nnuida cailigwang neusüt, kesang Ih, Paul, piage rünne mene mana de mie kera tei, dede Satan ne anuide kaamdi. 19 Anui Rampaube Jisu caili kegwangdau, nnui ziemne mecai? Pe dwade anui daipai regui mede suiyi mede hetwa punglu kebui bamno? 20 Kedanemene nnui au anui kendube nah anui suiyibe kecune.