1 Kekambe dau, anui lia si gailak dige, anui Athens namdi ga anuikatei bamdi kecube yiki kera cetlu, 2 nah anui anui sinabe Timothy nah Khrista samliakeyi dega Tinggwang kilabe, de peu nnui kenlum teingkieng lu nah nnui lung teingkuu lu kerane nnui dage langgai la, * 3 iciu eh migede de lungrei aidungde ziemne kebwakdi melu kerane. Kedanemene aide ziemne anuide kedetkelu nnuikatei cide cibam delu. 4 Kedanemene anui nnuide ngngwa kebamdau, anui keherei zielie eh nnuide mrairang beudi delu, nah nnui cikebam nzwa, cinzwa teigwang da. 5 Aide ziemne, Ih lia gailak dige, Mdakkepie *ne nnuide kedeidi kera kehing ne nah anui ta kemta teidi melu kerane, nnui kenlum ha cilu kera Ih Timothy de langgai.

6 Dede cu Timothy nnui dade anuida gwang luda, nah nnui kenlum nah keku samkeyi anuida teugwang cang beuda. Pa nnui anuide nsung bammui lalie kecu nah anui nnuide kerengau gaineu kebamde nzwa nnui de anuide ngau gaineu eh kela anuide pau beuda. 7 Aide ziemne, sinamedung, anui lungrei nah keherei kecu leune ga, nnui kenlum ziemne anui lungtaumla luda. 8 Kedanemene nnui Rampaube da sap ntip bamcai, anui cu au ringbam di delu. 9 Anui Tinggwang dwade nnui ziemne suiyi ngaukelu leune ziemne, anui dai ketwa gede Tinggwang de nnui ziemne peu laino? 10 Nnuide gwang kezungau dailu kerane, nah nnui kenlum cang kemak ga kaibeulu kerane, tingmui tingba anui laikai tei eh kie bamla.

11 Cu anui Peibe Tinggwang, nah anui Rampaube Jisu de anuide peu nnuida gwang kera lampui saulia kelube tei lulo. 12 Nah peu Rampaube de nnui hangge gede nah mileune de kereku kecude teingkiee nah kepui tei kelube tei lulo, anui keku nnui ziemne kepui tei kebam nzwa. 13 Peu pecu nnui lung teingkieng kelube tei lulo, iciu eh nnui anui Rampaube Jisu pe kemcime dungde ngngwalwe caili kegwangdau, anui Tinggwang nah Peibe dwade nnui lung mci nah mmaugai kelakme teilu kerane. Amen!