1 Dede kemret caihakecime mina kakga gwang da, cinzwa eh kemret keledeume nnui kakga gwangzie. Penuida ngkim kekap, kesang kemak samdung penui teu gwangzie, nah penui penuide lui kelube keledeube dede mlai dizie. Cine penuikatei penui reuga ge kekap teukelwa gwang luzie. 2 Mina kekiee penui kemmha zaidung mzui zie, penui tei kegaide ziemne, nah kesang lampuibe de ha rangmsia zie.✝ 3 Penui hengin gade penui nnuide kemret samdung le cwazie. Ndaa gade penui kemmau au mtak ma nah penui kengkap au zipdi lama. 4 Kedanemene tinggimgwame kemau tei kedime de Tinggwang pütdi ma. Dede, pa penuide mijaai gage kelien gaidi, cika penui tutiak tingba kemaktane kwa eh penuide kemui ngkanglebie hekwaki gage kangpwa bam.✝* 5 Tinggwang kideu kehegwabede de püt dima. Meliene, pa kemau ketei kideu gage pa duinai teugwang kecudau, pa Noah, makesang zierang tei kegaibe nah mina kedadung hanghena de si eh kelibeu.✝ 6 Tinggwang Sodom nah Gomorrah namdi kena de mimüt ge teidi nah penuide mmau eh ngkapdi, cide le teu nlum kemakme dage daipai teidi ziebi kecu cidungde saulia ge teigai.✝ 7 Dede pa kesamsangme ge Lot de kelilu, hezai si kemak minadung kemmha zaireli ne pe lung teikeherei süt.✝ 8 Cine mina kesamsangme ge, penui kakga lungh kebamme, nah tingnai gecai tingnai ge eh pa penui ta kesiadung siu nah ngau eh pelung kehereisüt bamla. 9 Rampaube dainzwa eh kemcime de penuide kehedei gade kelilu maisiabi kecu nah dainzwa eh kenlienme de tutiak tingba benai ziemne saja ketei kang gage kaizeu labi kecu cibam, 10 dede bamkeraide penui pumteih hengin keheradung caisui kelame nah Tinggwang kengkieng mlai kelame. Kemret keledeume aidungde kuu nah ngang la, nah hezai keteumede de penui rangmsia kecu hing lama. 11 Dede tinggimgwame swade ngkiengki nah diki kelame liede Rampaube dwade penuide kemmau tutiak samrang teugwang lama. 12 Dede mina aidungde makaunedung tuilwe daptset di kerabedung nzwa penui ma cetla kemakme. Ainzwa eh, penui ci kemakpe penui mmau lala. Penuide de makaunedung nzwa ngkap dizie. 13 Penui mide teikeherei kecu ziemne penuide keherei le penui ziehi tei beuzie. Penui kecet au ting kebaadau penui pumteih lungningbe teikela penui sui lala. Penui nnuide ngngwa ketaktyei nsam bamde penui kecwa ta tei kecu ga penui sui yila. 14 Penui miak au kemmha le puipung, nah penui au madaude kemau ketei mtak lama. Penui kemnei kemau ta tei bamkela dene kemeu lala, penui ma kehengindung le penui mlung de ledeu luda. Penui Tinggwang reset kepung namedung! 15 Lampui kemzuibe gidi eh penui tetkah dida, penui Balaam, Boer napei lampuibe mzuila dida, pa masang kemak kemau ketei mmi luuneu lala.✝* 16 Dede pa pe mau ziemne pecu kesiu, gada ge mina kwa gade samrang eh caihakecibe kemie de kaamdi.✝ 17 Mina aidungde duirwakdung cangh kedibe nzwa nah rahang ne mongzui guipung kelabe nzwa da. Penui ziemne kemui coktu ga heni ge mtei pwabam. 18 Penui hegie eh kemtabe sam rang kelane, penui minade pumteihbe lungning kemmha gade kemeu la. Penui mina kemau teilung gade mbai kera tei kelamedung de kemeu la. 19 Penui penui katei au heta kengkap kilabaangme teila liede cidung dage suirang sampet peula. Kedanemene mina au ma keheibe ne pecu ngam lucai pa cipau baang teila delu. 20 Magade midungge anui Rampaube Jisu Khrista de cikelu gade kideube kekap kengkieng gade mbailwe, cidungde ne penuide nimlwe ngamdai dicai, penui ziemne kekambe au keraibe swade siaki dila. 21 Cine penui ziemne cide cilwe penuide peu aja kemcibe gade nreutet kecu swa madaude kesang lampui cide ci kemakpe yiki zie. 22 Aide penui dage macisam kesangde gwang kecude da: "Heteu ge pe nruiga cailigwang dila, nah huimci kedi hebak ge nyasai ga cailigwang daila."✝