1 Laisiu aide Simon Peter, Jisu Khrista kila nah langkegaibe ne raupwa anui Tinggwang nah kelikelube Jisu Khrista masangbe ga anui nzwa ngaukelu kenlum pemi kehung kenlummedung dage kekai. 2 Tinggwang nah anui Rampaube Jisu de cikelu gade peu n da ngaugia nah lungciep bamkiee kelube tei lulo.

3 Tinggwang pe rabe kengkieng gade ma pelane anuide peu dida nah kemci teilung lunghlu kera Tinggwang maci gade anuide pe kendu nah keyi gage qu gailu. 4 Ainzwa eh pane anuide sampet kebeu mapeu kedi nah pemi kehung peu pwabam, iciu eh mapeu aidungde gade nnui kideu aide hengin kapdi keladung gade mbailu, nah rabe luilung de mzilu kerane. 5 Dede makie aide ziemne, n kenlum gage keyi silu kera nnui laikai teilu; delwe keyi gage, maci silu; 6 maci gage, nnuide kezeu silu; nnuide kehezeu gage, liakecu silu; liakecu ga kemci teilung silu; 7 kemci teilung ga, caihereiswacing kereku kecu silu; nah caihereiswacing kereku ga, keku silu. 8 Aidungde nnuida bam eh mmicuh lucai, anui Rampaube Jisu Khrista gade maci de petsi builu takedi tei dilak. 9 Dede aidungde peda bam kemak keheibede pe kecet duidi nah pe miak cietdi eh, ndaa pa kemau teikedidung teimci kedide nsungta dila. 10 Cine, sinamedung, nnuide qukelu nah kedet kelude ga ntip eh nnui laikai teibam lulo, cinzwa eh nnui aidungde tei lucai nnui madaude kau dilak. 11 Kedanemene ainzwa eh nnui ziemne kelikelube Rampaube Jisu Khrista gade kelungta hegwangram cika nlütlu kebuime tei beuzie. 12 Cine Ih aidungde nnui dage rang nsungbeu kera mtei pwabam muizie, nnui cidungde cilu delie eh nah nnui kesangbe ga sapntip bamdi delie de. 13 Dede a kecet au Ih paiki aika kebamtane, nnuide teimrak gaidai kerade petau bam. 14 Anui Rampaube Jisu Khrista gade aide acu keukelia nzwa eh, Ih agu paiki* de pütdi kera nna kedi Ih cibam dida lu. 15 Dede a tsit cai ma aidungde nnui ngau eh nsungla muilu kerane Ih a laikai tei eh nnuide ranglia maisia bam. 16 Kedanemene anui Rampaube Jisu Khrista gwang kerade de peu ci kegaidau anui ma rasamdung mpwak kelu ha rang ma, dede pe kengkieng kedi anui miak gade ngauda. 17 Peibe Tinggwang dade pa hetwa nah kendu kengau nah makwa cide pe kengkieng kendu gade pe dage ranggai, "Aide a Na Akube, Ih pecu a suitube da." 18 Anui pecu lamlwa kemci ga ngngwa keladau, makwa aide Tinggim gade kegwang anui siuda.✝ 19 Cine anui au cairasam aide nlum reureu di, delwe nnui cide gage helungkai lucai yi luzie, kedanemene mibung ge kemui ga baa kebam nzwa, delwe tingba pet kemaktane, tingcang hegi nnui mlungdung ga baa cuhlu kera. 20 Ma pelane reude, migede pekatei kesanglaisiu ga caihakecisam mina suibe gade gwang eh ranggai kelak nnui cilu maisia. 21 Kedanemene madaude caihakecisam mina lungning gade gwang ma, dede Tinggwang dade Kemci Rabe ne mina lung teigai beu la.