1 Ih hangkiame ge kecu nzwa nnui kakga hangkiamedung de kecung gaila: Ih Khrista keherei kebeu zierangme ge, nah Ih de kendu keulia gai kera ga ncüt kerame ge zie. 2 Nnuida kebam Tinggwang meurün hau ma pielu, kerengeime ge nzwa heta tei eh, nnui teibi maisia lu de kecu ziemne so, dede nnui neungga eh kebamne lu, Tinggwang peu nnuide teineu kela nzwa, hengam gie ziemne mene dede teineu kesang kecu gade teilu. 3 Nnui minadung mapie kebamme reu dikecu ciem teiso. Meliene, meurün hau dage saulia ge teilu. 4 Iciude meurün kekwa kedibe mi miakngau tei kegwangdau, nnui siadi kelak hetwa kepung peurwa ngau luzie. 5 Cinzwa eh, nnui henamedung, kecingme samzai teilu. Nnui pelane, nnui paini kenciep teu eh hangge ge gwatei lulo, kedanemene Tinggwang ngang kecume de pesui lama, dede pa henah kecume de ngaugia peula.✝ 6 Cine Tinggwang ba kengkiengbe kang gade nnuide teihenah lu iciude peting siak dau pa nnuide teucuh beuzie. 7 Nnui lungrei pelane pwa Tinggwang de peu dilu, kedanemene pa nnui mapie lalu. 8 Mriak lu, kwabam lu. Nnui ngauraube, herakesiabe, hingho kemra nzwa nsau twagwa bam, mina kang gade tui tyei zielie peei eh. 9 Pecu renialu, nnui kenlum ga ntiprip lu. Kedanemene nnui kideu pelane gade kenlummedung de keherei cikenzwa dau kap eh liakegwang cibam delu. 10 Dede nnui kakge keherei gai lude, ngaugia pelane Tinggwang nnuide Khrista gade pe kelungta kendu gage qugai kelube ne nnuide teimmi, tei ntip nah teingkieng beuzie. 11 Peda peu kelungta kengkiengbe bam kelube tei lulo. Amen.

12 Ih pecu anui zangbe makesangme gelie kela Silvanus ngha teu eh, nah Ih rau ndui eh nnui dage raugai. Ih nnuide kerau gade Tinggwang ngaugia kesangbe delie kecu zierang tei eh kecung gaila. Cika sap ntiplu. 13 Nnuide ngngwa kedetkelu Babylon ga ngqwa, nah a na Mark de si eh, nnuide kelum gaila. 14 Ket ket de keku hemam teu kelum lu.

Khrista ga kebam nnui pelane da peu kezuyi de bam kelube tei lulo.