1 Ciziemne hezai kesia, nah kemret leune nah hezai ketei nah mide swak kecu, nah mide rangkemsia pelane gi dilu. 2 Ngenadung nzwa, rabe tungdui kemcibe hengin lulo, iciu eh cide gade nnui kelikelu ga mmi cuhlu kerane, 3 magade nnui Rampaube au yilie kecu msilu delie cai.✝

4 Peda gwang lulo, pa kering tangtsube da, mina ne gi kedibe, dede Tinggwang ne kedet kelube pe dade pemi kehungbe. 5 Nnui de kering tangtsudung nzwa delie, rabe ki zielie eh teikelube, kemci cingkuleuh ge Jisu Khrista gade Tinggwang luulu kebui pwapeu rabe ratakdung teilu kerane. 6 Ciziemne kesanglaisiu rang kela nzwa:

"Ainie, Ih Zion gage kimiaktsu ge kaigai zeulie,

kedetlu nah pemi kehung ge.

Pecu nlumlukelube depeu hengam tei dilak."✝

7 Nnui nlum kelume ziemne au, tangtsu aide pemi hung. Dede nlum kemakme ziemne au,

"heta keteime ne gi kedi tangtsu,

aide au kimiak ga pe peube tei dida", ✝

8 nah,

"Mipi nrap kera tsu ge,

nah penuide teingkaudi kela tsura ge."

Penui sambe nlum kemak ziemne penui kaudi, penui depeu iciudi kera riem pwala dida.✝ 9 Dede nnui au kedetkelume, hegwang cingkuleuh ge, heleuh kemci ge, Tinggwang minadung, iciu eh Tinggwang ne nnuide kemui gade qu mpet mimakecangh pe kebaa gage kai kelube bata keyidung nnui mi dage ranglialu kerane.✝

10 Ndaa au nnuide masipei ma,

dede cu au nnui Tinggwang mina dida.

Piage nnui ngaugia ngau luma,

dede cu au nnui ngaugia ngau luda.✝

11 Akumedung, Ih nnuide qu gaila sangme nah langgi kedimedung nzwa pumteih kehegin gade mbai kerane, cide nnui rabe de ngngwa hereu tei kelane.✝ 12 Nnui Gentileme kakga zai keyi teu eh bamlu maisia, iciude, magade penui nnui ma kesia keteime lie de rangcai, penui nnui bata keyidung ngauzie nah Tinggwang kegwang benai pecu twa zie.

13 Rampaube ziemne mina peuteu kecume leune samzai teilu. Hegwangpei ne ngkiengtube tei bam liede, 14 nah deuceudidung de, pane langgai eh kesia keteime de saja peu nah keyi keteime de hetwa peu kerane, 15 kedanemene aide Tinggwang lungning da: heta keyi ketei gade maci kemakme kemie samdung kaamdi kera. 16 Suirang keteime nzwa, n suirang teu eh makesia gum diso, dede Tinggwang kilame nzwalu. 17 Mina pelane de rütlu. Kenlumme dungde kulu. Tinggwang mie hinglu. Hegwangpei de rütlu.

18 Kilamedung, nnui mpaumedung kangga lunghlu herüt peu sünne eh. Keyi nah kenciep mpaume kangga rünne mene, kesiame dungde de si eh. 19 Kedanemene cide au hetwa punglu kebuige magade keheibede keteei lia lucai keherei buikemak gade keherei keladau pa Tinggwang de cikela ziemne. 20 Kedanemene nnui kemau tei eh nnuide saja kepeudau lialu liecai daipai kemmi bam no? Dede nnui makeyi tei gai eh keherei lialu liecai, cide au Tinggwang dade hetwa punglu kebuige. 21 Aide gage nnuide qugai luda, kedanemene Khrista de nnui ziemne kehereibeu. Pa nnui ziemne puisau ge teibeu iciu eh pe caisuilu kerane.

22 "Pa kemau teima,

mede pe mui gade kecwa sam gede ngau luma."✝

23 Khrista de kesiu kecudau, pa kesiugwa ma. Pa keherei keludau, pa keheugwa ma, dede pa mige kesangbe gade hetutiak kelabe de nlum beudi.✝ 24 Pa pekatei pe pum gade anui maudung cross gage pung, iciu eh anui kemau ga ncütdi kelakne, nah anui kesamsang ziemne lungh kerane. Pe rejam jamdung ne nnuide teingkei luda.✝ 25 Kedanemene nnui meurün lampui cita kedibe nzwa tetla dida, dede cu nnui meurün kekwabe nah nnui rabe mapie kelabe da cailigwang luda.✝