1 Khrista pumteihbe gade keherei beu kecu nzwa, nnuide cinzwalu kera cetlu. Kedanemene keheibede Khrista ziemne pumteihbe ga keherei luge kemau teita dila. 2 Ciziemne, ring kebamtane, mina lungningbedung ga lungh lakta, dede Tinggwang lungningbe ga lungh zie. 3 Ndaa nnui Gentileme tei neu kela kenlien, kemmha, zausak kemie, nah mamie recadung tei süt dida. 4 Nnui cu penuide ngngwa nlwang kecu teilung ga la sita kedine penui swagah nah nnuide kesiu ladi. 5 Dede penui katei penui ha pwa keringme nah ketsaime tutiak kerabe de peuzie.✝ 6 Cine aide ziemne samliakeyibe pwa tsaikedimede de ledeu, iciu eh penuide mina pumteihbe rehi gade tiak kebeu nzwa eh, penui rabe kilam ga Tinggwang ring kela nzwa peu penuide ringlu kerane.

7 Dede ma pelane penlibe nna gwangla dida. Cine nnui mring nah nnui mriak eh kie bamlu.✝ 8 Bamkeraide nnui kereku recakdi mene kereku lu, kedanemene keku kemau kekiee gumlu lalu.✝ 9 Ncamdi mene ketket de ngaungngia lu. 10 Hangge ge mapeu ngau kelu nzwa, cide ketket de ngha kera ziemne teulu, Tinggwang ngaugia ketsam tsam kenlum gade teu heta teilu. 11 Mige marang lacai, peu Tinggwang samdung gade ledeulu. Mige ngkwet keteime cai, peu Tinggwang pecu kepeu kengkieng de teu nkwet lu. Aidungde teilu ciu eh ma pelane gade Jisu Khrista gade Tinggwang depeu ndulu kerane. Peu Jisu Khrista da ketwa nah kengkieng kelungta bam kelube tei lulo. Amen.

12 Akumedung, nnuide kedet kera kehedei kegwang dau, nnuida ma ketsam ge kegwang nzwa nnui swagah diso. 13 Meliene, daikiee ge nnui Khrista reide ga ngngwa rei labi, nnui suiyilu, iciu eh nnuide pe kendu mi miakngau tei eh kegwang daude nnui sui yilu kerane. 14 Magade nnuide Khrista zi ziemne mi kesiu lacai, nnui au samlam kepungme da, kedanemene kendu Rabe Tinggwang rabe nnui reuga kebamne.✝ 15 Dede peu mi gede de mide dap ketset, mede kerega, mede heta kesia ketei mede mide kehebwakme gade peu keherei so. 16 Dede mi keheibe de khristianme kecune keherei lacai, peu pecu ngngam diso, meliene, pecu peu cipau zi dele Tinggwang de tei ndulu. 17 Tinggwang name dade hetutiak ndeu di kera ting nna zeuda. Magade cide anui dade teicuh dicai, Tinggwang samliakeyi de nlum kemakmedung dainzwa dilai?✝

18 Nah "Magade makesangbe ziemne kelikelu teipa cai,

masang kemakme nah kemau keteime dainzwa dilai?"✝

19 Cine, Tinggwang lungning gade keherei kebamme depeu makeyi teilu nah damkegaibe samsangkelabe Tinggwang dage penui teilung de nlum gaibeu dilu.