1 Peter, Jisu Khrista ne langkegaibe ne laisiu raupwa Tinggwang minadung sangme zangra riepkela, kedet kelumedung, Pontus, Galatia, Cappadocia, Asia nah Bithynia deuceudung dage kekai. 2 Aide Peibe Tinggwang cinswa kebam rehi gade, Rabe ne teu ntsamlu samzai ketei ziemne nah Jisu Khrista jai le huimci kelu ziemne. Peu ngaugia nah lungciep nnuida bamsi kelube tei lulo.

3 Peu Tinggwang nah anui Rampaube Jisu Khrista Peibe de hetwa pungkelube tei lulo! Pe ngaugia kedi ziemne, pa Jisu Khrista de ketsai gade ringcuh daikelu gade anuide teilung keheci nah kering keregui peu dida. 4 Aide gumlu kera ziemne anui rimdi kelak, nah hera dilak, nah huidi gailak. Cide nnui ziemne tinggim gage kaizeu. 5 Nnui kenlum gade Tinggwang kengkieng ne nnuide gum pwa bam, peting kekamle de kelikelu de keulia kera mtei teu kela ziemne. 6 Cine nnui suiyi kesang lu. Miswakegah suiyi nnui dwaga bamlu. Keherei ketsamtsam nnui tingkakge lialu maisiadi liede. 7 Aide nnui kenlum kesang mi mebi kecu pie kerane, cide au gahdi kela kecak swade pemi hung. Dede cide mi le ru kedakpie liede, nnui kenlum, Jisu Khrista mi miakngau tei kegwangbe nai ketwa, kendu nah herüt ngau luzie.✝ 8 Nnui Jisu de ngau melie de, nnui pecu hung. Nnui cu pecu ngau melie de, nnui pecu nlum nah suiyi rang kapgai kelak le nnui sui yila nah kendu le puila. 9 Nnui kenlum ziemne nnui rabe de kelikelu ngaulu bamdi delu. 10 Kelikelu aipau ha de Caihakecimedung peei nah keteu sünne gwang, nah ngaugia de nnui gu kera mrai rang. 11 Penui pei kecu tei caune ziebi cilu kerane nah Khrista Rabe penuida kebamde penuide mpaubam kecudau. Rabe penuide Khrista keherei kera ha nah pecai kendudung gwang kerabe mrairang beu.✝ 12 Cide penui dage liagai penui au penui mmi ziemne malie kecu, dede nnui ziemne, tinggim gade langkegai Kemci Rabe ne nnui dage samliakeyi ledeu kebamme ne cu nnui dage rang kebeude penui resiu kebamdau, aidungde tinggimgwame de ci neu eh pie gwang.

13 Cine nnui kecet mteilwe bamlu, Mriaklu, nnui keregui ngaugia gage kai cangsiak lu cide Jisu Khrista de liagai kecudau nnuide peuzie. 14 Samzai ketei Tinggwang name nzwa, nnui ci kemak tingdau nnui ndaa luukeneu lungningdung caisui diso. 15 Dede nnuide qu kelube mci kecu nzwa, nnuide, nnui zaireli leune gade mci lulo. 16 Ainzwa raupwa kela ziemne: "Nnui mci luzie, kedanemene Ih au mci lu."✝* 17 Cine nnui "Peibe" de qucai heneu-herüt tei mene nah mina ketket bata rehi gade hetutiak kelabe de, nnui hebeuh teikela tane pecu rüt eh tet sünne lu.✝ 18 Nnui gahdi kela rangkanggeu mede kecak nnui peime kemie zai gade kelilu kemak nnui cibam.✝ 19 Meliene, nnuide au pemi kehung Khrista jai le kelilu da, pa au meurünna zamra mede pegiak kegahbe nzwa. 20 Pecu kideu bangdwa kemakne gade kedet luda, dede nnui ziemne peting kekamle aide gade liagai bam. 21 Pe dade nnui Tinggwang de nlum luda, pecu ketsai gade kwakcuh kelube nah pecu kendu peu, iciu eh nnui kenlum nah keregui Tinggwang da lalu kerane. 22 Nnui kesangbe samzai teikelu gade nnui de teimci luda. Aide au siname keku lungsang ngau kera ziemne; cine hangge gede nnui mlung mci eh lungsang gade kereku lulo.* 23 Gahdi kela heleuh gade ma, dede madaude gahdi kelak heleuh gade, kering nah bammui kela Tinggwang sam gade, nnuide mna hecidai luda. 24 Kesanglaisiu rang kela nzwa,

"Pumteih leune au cehei nzwa,

nah pe kendu pelane au cehei mapa nzwa lie.

Ceheibang ki dila, nah mapa hui dila,

25 dede Rampaube sam au kelungta bamla."✝

Sam aide samliakeyi nnui dage pwa kepeude da.