1 Cu ainie, nnui heikelame, nnui suisia nah haplu, kedanemene keherei nnui dwaga gwang ladi delu. 2 Nnui maheidung rim dida, nah nnui paidung taklei ne tyei luda. 3 Nnui gu kecak nah rangkanggeu mtutei dida, nah cidungde mtuketei au nnuide kemmau zierang ge zie* nah cide mi nzwa nnui teih tyei luzie. Nnui kamtu benai ziemne nnui mahei hekwa luda. 4 Ainie, nnui luhdung luhlüt kela maketeime ziehi, nnui kainzeu kedi de ncam bam dida, nah luhkegetme kehap kwa reugwame reu Rampaube kwen ga gwangcang bam dida.✝ 5 Nnui kideu ga lungh kehega nah nnuikatei nnui suibe tei dida. Nnui dap ketset tingba benai ziemne nnuikatei nnuide tei pwa nnui luiyi luda. 6 Nnui makesangbe de mmau nah teitset dida. Pa nnuide renia ma.

7 A sinamedung, cine Rampaube gwang kemaktane nnui lung tei eh kwa bamlu. Pielo, hetaketabe hangdeu gade pemi kewhung luhlüt de ngaulu kera kwa bamla, pa au pelungtie eh cide ziemne tingrui keraibe nah tingrui kekambe ngaulu kemaktane kwa bamla.✝ 8 Nnuide nnui lungtie eh kwa lulo. Nnui lung tei ngkienglu, kedanemene Rampaube cailigwang kera ting nnadi delu. 9 A sinamedung, hangge ge de mmau eh ncam so, iciude nnui tutiak lak. Ainie, hetuketiakbe kimui ga sapzeu lie. 10 A sinamedung, caihakecimedung Rampaube zi gade marang kegaime, keherei nah penui lung ketie de gade saukelia de peilo. 11 Ainie, liakelumede anui samlam kepung melie qula. Nnui Job pelung ketie ha siu da, nah nnui Rampaube kekamle dainzwa teigwang bi kecu cida, Rampaube au daikenzwa gede pezaiyi nah mide ngaunggia bi kecu.

12 Dede bam kapde, a sinamedung, tinggim mede kideu mede makeda sampet kette teu eh reset so. Dede, "Yeo" cai "Yeo" delu nah "Ma" cai "Ma" de lulo, iciu lude nnui tutiak kangga gwang dilak.

13 Nnui kakga mige keherei bam ni? Peu pecu kekie teilu. Mige pe suiyi bam ni? Peu pecu ketwalei teilu. 14 Nnui kakga mige mateei bam ni? Peu pecu ngqwa ga hangkiamedung de qulu, delwe peu penuide pe reu gage kekie tei gailu, Rampaube zi gade maca le pecu keniaklu eh. 15 Nah kenlumme kekie gade keteeibe de teingkei luzie, nah Rampaube pecu teucuh beuzie. Nah pa kemau tei pwabam cai, Tinggwang pe mau gibeu zie. 16 Cine hangge ge dage nnui mau petlu, nah hangge ge ziemne kielu, iciu de nnui yi ngkei luzie. Kesamsangme kekie au pe kengkieng bamsüt. 17 Elijah de mina anui kenzwame geda. Pa peu tingrui helo ntingsüt eh kiegai, nah mmi kecum eh keiherok ge ziemne hangdeu reu ga tingrui tadi.✝ 18 Pecai pa kiegai dai, nah tinggim gade tingrui kaibeu, nah kideube petsi builu.✝

19 A sinamedung, nnui kakga mige kesangbe gade ndei tetdi eh lacai, nah mige pecu ngngwa gwangdai lucai, 20 peu cipaude de cilu: keheibe de kemaume gede pe lampui maukela gade teunreu gwang kelube pe rabe de ketsai gade kelilu zie, nah kemaudung kekiee ge gibeu zie.✝