1 Sinamedung, nnui mina kekiee de peu keledeume teiso, kedanemene anui mide ledeu kelame de au mtingki eh hetutiak zielie kecu nnui cibam lu. 2 Kedanemene anui pelane de ma kekiee ge tei maula. Mige pe samrang gade ma tei maula mecai, pa au mina yicangsiak dida, pe pum pelane kecangde kezeu lubui. 3 Cu anui hekwendung mui gage peu penuide anui samzai teilu kerane kekangria kaicai, anui penui pum pelane teu anui suibe tei lubui. 4 Liemdung zaide cetgai pielo, cidungde disüt nah tingkai ketsi ne gui teula liede, liem keteube kehereutie keceuna gele kereu lula nah mie keneule teumie lula. 5 Cide nzwa eh mi mleu au mipum gade keceu nage, dede cide marang hegie mdi süt lula. Ainie, mi keceu nage ne hegung kedi ge rudila. 6 Nah mi mleu au mi delie, kemau deu ge. Mi mleu anui pumgim kakgage kai eh mipum pelane teimsiadi nah cide anui teilung pelane gage mi teincuh beula, nah mi cide mijaai gade twagai la. 7 Kedanemene renaam kaune ketsamtsam pelane, nruine, bwakelakaune, nah duikaunedung de mina ne kezeu gwang nah kezeu lula. 8 Dede migede mi mleu de kezeu luma. Cide au mtakla kemak kesia, ketsai heiring le pui.✝ 9 Cide le anui Rampaube nah Peibe de twala, nah cide le anui mina, Tinggwang rehi gade tei kelume de resetla. 10 Muige gade samlam nah reset petla. A sinamedung, ma aidungde teidi maisia ma. 11 Duirwak mui ge gade kekum nah kekaa dui lwapet lubui ni? 12 A sinamedung, tangzüttsi bang gade Olive tsi bui lubui ni? Mede kubetsi bang gade tangzüttsidung bui lubui ni? Mede Teijai dui gade dui kemci pet gailak.

13 Nnui kakgade caube maci nah kecikecet bamno? Peu pecu hena nah maci teu eh ba ta keyi tei kegai gade teilung keyi lungh eh mide lia lulo. 14 Dede nnui lung gade mide ngau nnui riaksiasüt nah heziu keci bamcai, ngang eh kesangbe de kenretbe tei diso. 15 Aipaude au nreu lede kegwang maci ma, dede cide au kideube gade, rabe lamde ma, nah herakesiabe lam delie. 16 Kedanemene riaksiet nah heziu keci kela ga, kehebwak nah kesia ketei leune lala. 17 Dede nreulede kegwang maci au keraibe mci, pecai nciep, mnwa, kesamtei, ngaugia nah petsi keyidung le pui, heneu herüt tei lama nah hezai tei lama. 18 Nah kesamsang tsi de au kezuyi teibeu kelame ne kezuyi gade linggai beula.✝