1 Daigade hereu ketei nah keregi kecu nnui kakga gwang lano? Cidungde nnui hengindung, nnui pumteih ga renia kela gade gwang la meni? 2 Nnui mahengin, dede nnui ngaulu lama. Nnui mide teitset nah migu luuneu la, dede nnui ngaulu lama. Nnui regi nah hereu teila. Nnui luu keneube ngaulu lama kedanemene nnui kiela kemakne. 3 Nnui kiela nah ngau lu lama, kedanemene nnui petau kemak gade kiela, iciu eh nnui cide nnui hengindung ga teulu kerane. 4 Nnui helipuidung!* Kideube de ngngwa zangna ketei au Tinggwang ngauraume lie kecu nnui ci meni? Cine keheibe de kideube de ngngwa zangna tei keneume au pekatei pecu Tinggwang ngauraume ge tei dida.✝ 5 Mede nnui kesanglaisiu au pekie gah eh, "Pa anui lung gage tei mlung kegai Kemci Rabe de mide ngau periak lani"✝ de rangla lie cet zeu no? 6 Dede Tinggwang ngaugia peu kieeki la. Cine kesanglaisiu rangla, "Tinggwang ngang kelame de mlaila, dede henah kelame de ngaugia peula."✝ 7 Cine Tinggwang dage henah gailu. Dede herakesiabe de renia lu, iciude pa nnui dade pak dizie. 8 Tinggwang da nna gwanglu, iciude pa nnui da nna gwang luzie. Nnui kemaumedung, nnui badung ntiakmci di, nah nnui lungna pung kelamedung,* nnui mlung teimci lu. 9 Nnui lung sialu nah heei eh haplu! Nnui nuikelade peu kehap ge dilu, nah nnui suiyi kelade peu suisiet ge dilu. 10 Rampaube dwade nnuide tei henah lu, iciude pa nnuide teucuh beuzie.✝

11 A sinamedung, hangge ge de rang msia so. Mige pe sinabe de rang msia mede pe sinabe de tiak kelabe hezaibe de rang msia nah hezaibe de tiakla. Dede nang hezaibe de tiak lacai, nang au hezai tei kemzaibe meda, dede tiak kelabe da. 12 Hezai kaikebeube nah hetuketiak au ket rünne. Kelilu kebuibe nah ngkapdi lu kebuibe au Tinggwang. Cine nang n kidabe tutiak kelabe cauno?

13 Cu ainie, nnui ainzwa rang kelame, "Anui henai mede ncünne namdi aide ga mie zie, delwe cika mmi ge bam eh heli tei gie luzie," 14 dede nnui ncünne ha cima. Nnui teilung dai no? Kedanemene nnui au mikaa kak nage ngau gai eh gah di kela nzwa delie.✝ 15 Meliene, nnui ainzwa rang kerabe, "Rampaube lungning liecai, anui lungh bam eh aide mede lude tei zie." 16 Dede cu au nnui mariemdung ziemne nnui ngangla dida. Ngang kecu cinkenzwa leune au kemau lie. 17 Cine mige makeyibe teikera cibam eh cide tei mecai, cide pe ziemne kemau lie.