1 Ainzwa eh, nnui mi naumedung nnui nahpei samzai teilu. Mi nahpei kangge samliakeyi samzai teilu meliede, penui naume zairelidung gade, ma gede rang meliede penui naume ziemne ngkieng lubui, 2 kedanemene penui nnui zai kesamsang de ngau eh herüt peuzie. 3 Penui hegwale hezu ketei depeu mede nnui tam kepwa, nah kecaknia kekai, mede cudau keteunia dungde gage nnui lung kai diso. 4 Meliene, peu cide de nnui lung gade rimdi kelak mizai kenciep nah ziune kecu rabe gage kailu, cide Tinggwang dwade au pemi hung süt. 5 Kedanemene aide nzwa eh ndaa mipui kemcime Tinggwang de penui regui eh penui kateide hezu teihemi eh, penui nahpeidung kangga lungh gwang. 6 Ainzwa eh Sarah au Abraham sam mzailu delwe pecule pe mpaube le qulu. Magade nnui yilie kecube tei lacai nah nnui keherei kecu hing meliecai nnuide cu pe name dida.

7 Cinzwa eh, nnui nahpeidung nnui naude au mnei kecu pui gelie de ci eh, ngngwa kelungnzwa eh lunghlu maisia. Nnui penuide herüt peulu maisia, ngaugia kering mapeu dega ngngwa hemaa ge kecu nzwa. Aide teilu iciude nnui kekiedung kaamdi melu kerane.

8 Dede kamtube, nnui pelane macet ga ket teilu, kengaugia eh, siname keku nzwa, milung nciep, nah henah lu. 9 Kesiabe le kesiabe pwa peu daiso mede kesiugwa so. Ciu meliene, samlam jüja lalu, kedanemene aide ziemne nnuide qu luda, nnuide peu samlam ngaulu kerane.

10 Kesanglaisiu rangkela nzwa, "Keringria de kula keneume nah tingba keyi ngau keneume

makesia kerang gade pe mleu nah pe muileu mide kecwa sam kerang gade pecu kezeulu maisia.

11 Dede peu pecu kesiabe gade nreutet dilu delwe daipai yibi teilu.

Peu pecu kezuyibe peeilu nah cide gwalu.

12 Rampaube au samsang kelame de piela, nah penui kekiedung kingnei bamla.

Dede pa kesia keteime de ngkau la."✝

13 Nnui makeyibe teineu lacai caune nnuide tei rejam laino? 14 Dede nnui makesang ziemne keherei liede, nnuide samlam beuzie. Dede penui keheu kecu de ngngi, mede nnui lung keherei diso. 15 Meliene, nnui mlung gade Khrista de Rampaube lie eh herüt peulu. Kedanemene mi keheibede n dade nang Tinggwang de regui kela kie cide keteucai keli beu kera mtei teula muilu. 16 Dede aide henah eh herüt teu eh teilu. Nnui lungcet de peu mci bamlu iciude penui nnui rangmsia kecudau, Khrista gade nnui zai keyide rang kemsiame dungde de peu ngngam dilu kerane. 17 Kedanemene Tinggwang lungning liecai, nang ma keyi ketei ziemne keherei kecube au kesia ketei ziemne swa cide yiki. 18 Kedanemene Khrista de kemaudung ziemne piage keherei. Pa au kesamsangbe anui masang kemakme ziemne keherei, ciu eh pa anuide Tinggwang da ngngwa gwanglu kerane. Pecu pumteibe gade teitset di, dede Kemci Rabe gade pecu teimring dailu. 19 Cine pa hebaangki ga mie delwe rabedung dage zierang tei. 20 Noah tingdau Tinggwang pe lung ketie de teu kwabam ge penui ndaa samzai teima, liem ketei tingdau, Tinggwang cikade mina kecam nage, keringria hangheset de, dui gade keli lu. 21 Aide au cu nnuide duipum gade kelikelu rehi de saukelia, cide pumteih kehera huigidi kecu de ma, dede Tinggwang dage kecet keyi kiekegai ge, Jisu Khrista ringcuh daikelu gade. 22 Khrista Tinggwang ba zetle bam dida. Pa tinggim ga gwang dida. Pe dage Tinggimgwame, nah kengkieng keteumedung pe kangga lunghlu maisia.✝