1 Akumedung, Ih nnui dage aide laisiu raukegai pe kenabe da; nah kenana gade Ih sam aidungde nnuide nsunglu kerane nnuide kecung gaila, 2 Iciu eh ndaa nnui kemci caihakecime rangkebeu samdungde nah langkegaimedung dade Rampaube nah kelikelube aja kaikebeu de nsung luzie. 3 Keraibe nnui aide cilu, cide kekamle tingdau mide keuhenui teikelame penui tei keneu rehi gade mide keuhenui tei eh gwangzie. 4 Penui rangzie, "Daiga pa gwang kera samkai kebeu bamno? Anui paumedung tsaikedi gade ndaa kendeu raitu nzwa jüja la." 5 Penui ndaa Tinggwang sam le tingkideu teikelu cika eh cikemak nzwa dizie, Tinggwang sam le kideube au dui gade nah duile teilu,✝ 6 nah aidungde gade, cipau tingdau kideu de, duinai kegai gade dui kedine tei ngkapdi.✝ 7 Dede tinggim nah kideu cu kebamde Tinggwang sam ne kezeu pwabam iciu eh mi ne ngkapdi kerane. Cidungde au mci kemakme tutiak nah ngkapdi kerane kaipwa bam. 8 Dede mage nsungta diso, akumedung, Rampaube dwade au tingnaige de mmi cangge nzwa, nah mmi cangge de tingnaige nzwalie.✝ 9 Midungge cet kela nzwa eh Rampaube au pe sampetdung teibeu kera nneu lama. Meliene, peu nnui migede de kapdi neu mene nnui dade pe lungtie bamla. Dede pelane de penui mau gade nreudi neula.✝ 10 Iciuliede, Rampaube cailikegwang tingba keregame ge nzwa gwangzie, iciu eh makwa ge sahbak eh tinggim gah dizie. Dede Tinggim pumgimdung mi ne ru dizie, nah kideube nah pe reuga heta leune de liagai dizie.* 11 Aiciu eh ma aidung pelane ngkap dizie nnui mina daikenzwadung ge lu maisia no? Nnui zai mci nah masang lu, 12 Tinggwang cailigwang kera tingba de regui nah kelwa eh kwa bamlu, cide ziemne tinggimdung mi ne ngkap dizie nah tinggim pumgimdung kelum ne teisui dizie.✝ 13 Dede anui pe sampet kai kebeude nzwa eh, anui makesang lungh kera tinggimdung keheci, nah kideu keheci ge kwa bam.✝ 14 Ciziemne, akumedung, nnui aidungde regui eh kebam nzwa, lungciep gade nnui pe dwaga mci nah kemau gah eh nnui laikai teibam lulo. 15 Anui Rampaube helungketie kelilu kera peting keyi peu aulie kecu cet lulo, anui hungkelabe sinabe Paul de pecu kepeu maci de gade nnui dage pe laisiu gade raugai kecude nzwa eh, 16 pa pe laisiu pelane gade aipau hade ainzwa rangla. Pe laisiudung ga maci kepadung gede la, cide maci kemakme nah ntip kemakme rang neula la, penui kesanglaisiu kedabedung tei kela nzwa penui kekap teugwang luda. 17 Ciziemne, akumedung nnui ma aidungde pedwa cibam dida, cine mriak lulo, iciu eh nnuide mina hezai kegahme maula kedide ne cwateudi melu kerane nah nnui masang de tei nggahdi melu kerane. 18 Dede ngaugia nah anui Rampaube nah kelikelube Jisu Khrista maci gade lungh bamlu. Pecu peu ndu kelube teilo cu nah kelungta. Amen!