1 Paul, Khrista Jisu da kebam kering sampet de ziemne, Tinggwang lungning gade Khrista Jisu ne langkegaibe ne raupwa, 2 kehung a na Timothy dage kekai: Peibe Tinggwang nah anui Rampaube Khrista Jisu dade kegwang ngaugia, keku nah lungciep de peu n da bam kelu teilo.

3 Ih lungcet kemci teu eh a paume gade pe gwatei kela Tinggwang de Ih hetwa peula, Ih a kekie gade ncu tingmui tingba nsung bamla, 4 Ih n miakduidung de nsung eh ncu kerengau neusüt bamla, iciu eh Ih suiyi le puilu kerane. 5 Ih n kenlum lungsang kecude nsung bamla, n pai Lois nah n pui Eunice da bamrai kelu kenlumde, nah n dade kenlum cide bam kera Ih cisiak bamlie. 6 Aide ziemne, Ih nreu gage a ba hwa kegai gade Tinggwang mapeu n da kebamde peu heubam lulo de ncu rang nsunggai daila. 7 Kedanemene Tinggwang anuide kengngi rabe peu ma, dede kengkieng, keku nah samzai ketei rabe peu. 8 Ciziemne, nnui Rampaube zierang tei ngngam diso, mede Ih pe baang tei kelabe ziemne de ngngam diso, dede Tinggwang kengkieng kepeu nzwa samliakeyi de ziemne keherei kecuga ncüt lulo. 9 Pa anuide kelilu nah anuide kemci gage qu gailu da—anui batadung rehi gade ma, dede pe mariem nah pe ngaugia rehi gade, pa ndaa raitu gade Khrista Jisu dade pe ngaugia anuide peuda, 10 dede cu au cide anuide Kelikelube Khrista Jisu mi miakngau tei kegwang gade anuide keulia dida. Pa ketsai kengkieng de penli tei dida, nah samliakeyi de gade pa tsaidi kelak teilung de keulia dida, 11 cide ziemne Tinggwang peu acu langkegaime ge zielie nah samliakeyi paulia kelame ge nah keledeume ge tei zielie kedetlu,* 12 aide ziemne Ih ma aidungde gade keherei lala. Dede Ih ngngamdi lama, kedanemene Ih nlum kelabe de Ih ci, nah pa acu nlum kebeude cipau tingba de gwangcang kemaktane kaikwak bamlu kenui Ih cisiakte bam. 13 Kesang sam nang a dade siu keludung de mzai siakte bamlu, nah Khrista Jisu da kebam kenlum nah keku ga bamlu. 14 Anui lungga kebam Kemci Rabe gade ncu nlum kebeu makeyi de kwa siakte bamlu.

15 Asia ga kebam keheibe de nah cipaume kakde Phygelus penai Hermogenes de si eh a dade nreutet kedi nang cibam. 16 Peu Rampaube de Onesiphorus kilungme de ngaunggia beu kelube tei lulo, kedanemene pa gwang a lung taumla bam muila, nah Ih hebaang tei kebamde ziemne ngngam dila melu, 17 dede pa Rome ga gwang keludau pa acu ngaulu kemaktane peei. 18 Peu Rampaube de cipau tingba benai pecu Rampaube dade ngaugia ngau kelube tei lulo. Nah Ephesus gade pa dai kenzwa ge ngha gaibi nang ci hemisüt bam.