1 Peting kekamle bie keherei kecu ting gwang kera ci lulo. 2 Kedanemene mina pekatei pe ziu ci, rangkang hengin, hegie, helia, mide rangkemsia, mipui mipei samzai tei kemak, leirau kegah, mci kemak, 3 mide ku kemak, kezuyi kegah, sam kesia kerang, mide ketip kemak, zaisiet, keyi ngau ngkau, 4 mide cwa, pe suira ketei, ngang, nah penui Tinggwang de swade penui hengindung de hungki dizie, 5 penui hegwazu gade renet mzui zie, dede pe kengkieng de mlai dizie. Mina ci kenzwame dade nreutet dilu. 6 Kedanemene mina cidung kakga midung ge mi kidung ga lütlwe mipui mriak kemakme, penui hengindung le penuide cwateu eh kemaudung le kepui tei kelame de cwala dida, 7 mipui cidungde ma cilu kerane peei lamui lala, dede penui madaude kesangbe maci ci gailak. 8 Jannes penai Jambres* Moses de ngaurau kedi nzwa, cinzwa mina aidungde kesangbe de ngaurau la, mina penui lungcet kemaume, penui kenlum lamde kesang kemakme.✝ 9 Dede penui pak mdeisüt gailak da, kedanemene mina aipau kenade nzwa, penui kemiede mina pelane da ci petdi zielu.

10 Dede nang au a keledeu sam, a zaireli, mariem, kenlum, helungketie, keku, liakelu, 11 teikeherei kecu nah keherei kecudung cibam, nah a dage Antioch, Iconium, nah Lystra gade dai teigai bi nah Ih keherei dai kenzwadung lia lubi nang cibam. Ciuliede, Rampaube cidung pelane gade acu kelibeu.✝ 12 Nah kesang, mina keheibe de Khrista Jisu gade masang eh lungh keneume de teikeherei zie. 13 Dede mina kesiame nah mide cwakelame mide cwa nah penuikatei penuide cwa eh siaki reureu dizie. 14 Ciuliede nang au, nang ci kelude nah ntiprip eh nlum keludungde ga bamlu, kedanemene nang ncu ledeu kebeume de ci bamlu, 15 nah n henane gade nang kesanglaisiu ci luda, cide ne Khrista Jisu da kebam kenlumde gade kelikelu ngaulu kera maci ncu peu lubui. 16 Kesanglaisiu pelane Tinggwang ne ngngi gaibeu, nah cide keledeu ziemne, mide kehesiu ziemne, mide tei kemzui ziemne, nah mide kecung pwa tei masanglu kera ziemne pe keyi bam, 17 iciu eh Tinggwang gwatei kelabe de peu yicanglu eh bata keyi leune teilu kerane.