1 A na, nang au Khrista Jisu dade kepet ngaugiabe ga ngkieng sap lulo. 2 Ih mina kekiee dwa ga ranglia kecu nang siukelu keledeu samdung de teupwa mide ledeu swalu kebuime samsang kelame dage nlum beulo. 3 Jisu Khrista reugwa keyime ge nzwa keherei kecuga acu ngngwa n qwa pwalu. 4 Reugwame pe ta teikela gade kideu aika bata keda gede teisi lama, iciu eh pa pecu qu kelube suiyi teilu kerane. 5 Cinzwa eh kenggwame keheibe kerenia ga hezaidung mzui eh renialu mecai pa pe ziehi ngaulu lama. 6 Nrisüt eh heta ketabe luhlüt keyi ngau raitu kerabe. 7 Ih kerangde cet gailo, kedanemene Rampaube ncu peu ma pelane cilu kebui maci peu zielu. 8 Ih zierang tei kegai samliakeyi de nzwa eh Jisu Khrista, ketsai gade teucuh kelu, hegwangpei David leuh gade lunggwang kelube de nsung lulo, 9 cipau samliakeyi de ziemne Ih kemau keteime nzwa keherei eh hebaang teibam. Dede Tinggwang samde au kangdi ma. 10 Aide ziemne, Ih makeheibe de kedet kelume ziemne lia eh lala, iciu eh penuide peu Khrista Jisu dade kegwang kelikelu de nah kelungta kendu de ngaulu kerane. 11 Sam aide au nlumlukebui ge:

"Anui pecu ngngwa tsaidi cai, anui pecu ngngwa ring de luzie.

12 Anui liabam lucai, anui de pecu ngngwa hegwang teizie.

Anui pecu mlai dicai, pa de anuide mlai dizie.

13 Anui masang melu liede, pa au masang bam muila,

kedanemene pa pekatei pecu mlaidi laklu."

14 Penuide ma aidungde ranglia daibeu lulo, Tinggwang dwade penuide kesamlim helo kecu ranglia beu lulo; cide makeyi gede teibeu lama, dede kekingneime de teimsia dila. 15 Tinggwang de peu ncu yilie lu kerane n laikai tei lulo, kesangsam teu ledeu siakte eh heta teikelame ge ngngamdi kerabe ma. 16 Sam keherabe nah kemtabe sam kerangdung gade mbailu, cide mide kesangbe gade gwa mdei reureu dila, 17 nah penui sam au hezam keteei nzwa teei mdi reureu dila, cidung kakgade Hymenaeus penai Philetus de si da, 18 penai kesangbe gade nreu tet dida. Penai ringcuh dai kecu de au gwang kedibe ha ge dide lei eh midung ge kenlum tei maula dida. 19 Ciuliede, Tinggwang kengkieng tsubam de ga aide rauteu eh sap ntiprip bam: "Rampaube au pe mina de ci" nah "Keheibe de Rampaube zi teukelame kemau gade nreu tetdi maisia."✝ 20 Ki kedi ga kecak nah rangkanggeu li rünne bamla ma, dede tsing li nah tangnia li de bamla, nah kesa kemlangta ziemne nah kesa naimsangne ta ziemne. 21 Ciziemne, keheibe de aidungde gade pecu tei mci lucai, pa kemlang li ge tei luzie, nah pecu teimci lwe pe mpaube pecu keupwa mata keyi leune tei kera mtei luzie. 22 Cine hangleime hengindung gade paklu, delwe penui lung mci eh Rampaube de qu kelame de nzang eh kesamsang, kenlum, keku, nah lungciep aidungde gwazui lalu. 23 Dede kemie nah kemta kesamlimdung gade mbai lulo, kedanemene cidungde kengaurau kecu teu gwangbeu kela nang cibam lu. 24 Dede Rampaube kilame kesamlim kerabe ma, dede mi pelane dade mizai yi, ledeulu kebuime, mi lungtie, 25 nciep eh mi ngauraume de ledeu kerabe. Kedanemene Tinggwang penuide peu helung nreulwe kesangbe cilu kera zuiyikeyi peulu builu, 26 nah iciu eh penui mcing gwang dailwe herakesiabe, pe lungning tei kerane pa penuide tuipwa kebambe tak gade pak luzie.