1 Nnui samzai tei kemak nah kemau gade piage tsai dida, 2 nnui kideu teilung zai nzwa samzai tei kemak namedung da heta tei kebam tingkai kengkiengdung* rabe caisui eh piage tet gwang, 3 anui pelane de piage anui pumteih lungning kesiadung tei eh lunghgwang, anui pumteih lungningbe tei nah anui suibe tei eh. Nah mina pelane nzwa anuide lunghop name tei eh lunghgwang. 4 Dede Tinggwang pe keku kedi ziemne anuide ngaugia süt eh pa anuide hungla, 5 cine anui kemaudung gade tsaidi liede, pa anuide peu Khrista de ngngwa ring dailu—ngaugia gade nnuide kelilu— 6 nah Khrista de ngngwa anuide teu cuhlu, delwe Khrista Jisu gade anuide peu pecu ngngwa tinggim ga bamlu, 7 iciu eh gwangdai kera teilung gade pa Khrista Jisu gade anuida pe zaikeyi ngaugia kedi mdet canggai kelak de pwa lialu kerane. 8 Kedanemene nnuide kenlum gade ngaugia ne kelilu, nah aide nnuikatei nnui ta gade ma; cide Tinggwang mta mapeu, 9 batadung gade ma, cine migede ngang daulak. 10 Kedanemene anui au pe bata, heta keyi tei kera ziemne Khrista Jisu gade damlu, cide Tinggwang ne riem nswa pwala, iciu eh anui cidungde ga tetlu kerane.

11 Ciziemne, nnui piage pumteihbe gade Gentileme tei kelade nsung lulo, nnuide "Hegeurumkelume" de kelame ne "Hegeurumkemakme" de qula, cide au pumteih gage mina bale teilu. 12 Kedanemene cipau tingdau nnui Khrista dade mdeila, Israelme maadung ga ncüt ma, nah sampetkelu samkakdungde ga sangme ge teila, kideu ga Tinggwang de si ma nah keregui gede gah. 13 Dede cu au Khrista Jisu gade nnui piage mdei kelame de Khrista jai gade ngngwa gwang nna luda. 14 Kedanemene Khrista ne anui kezuyibe, pa ne heleuh kena de ket tei dida, nah penaide rie ntsam pwa eh kengaurau bamkela riede pe pum le teipang dida. 15 Pa kezai kai kebeudung nah hezai riet keludung de tei nggahdi, iciu eh heleuh kena de keu pecu ngngwa mina keheci ge teilu kerane, ainzwa eh ngngwa keyi teibeu, 16 nah pa cross gade penai kengaurau kelade tei nggahdi, iciu eh penaide peu pum ge tei eh Tinggwang de ngngwa kezuyi dailu kerane. 17 Nah pa gwang delwe nnui mdei kelame nah nna kelame dage lungciep samliakeyi ranglia, 18 kedanemene anui Jewme nah Jewme kemakme de pe dade Rabe ge gade peibe da lütlu kebui bamdi delu. 19 Cine, nnui cikemakme nah sangme meda. Meliene, nnui au pe minadung de ngngwa kemacüt dida nah Tinggwang kilungme tei dida. 20 Nnuide langkegaime nah caihakecime ne pebangdwa kebeu gage tei luda, nah Khrista Jisu pe kimiaktsube* da, 21 pe dade ki peciakne, keu reincütlwe Rampaube dage kai kebeu kemci kerecaki ge mmi petlu, 22 pe dade nnuide de nlumkelume pelane de nzang Tinggwang pe Rabe gade lungh kera ki ge ga teincüt luda.