1 Ciziemne Ih, Rampaube baang teikelabe, nnuide Tinggwang qugai keluga petau tei eh tet lulo nnuide rangsünne gaila, 2 henah, nciep, nah nnui lungtie muilu, hangge ge dade nnui lungtie eh kereku lu, 3 nnuide kang ncütkelu kezuyi Kemci Rabe gade ngngwa ket keteide kaizeulu kerane nnui laikai tei bamlu. 4 Nnuide Tinggwang qugai keluga kereguide ket kecu nzwa, cika pum ge nah Rabe de ket, 5 Rampaube ket, kenlum ket, duipum ket, 6 Tinggwang ket nah pelane Peibe, pa au pelane reu, nah pelane da la, nah pelane ga la. 7 Nah Khrista mta mapeu mdet nzüt gade anui ketket de ngaugia peu ciau pwabam. 8 Ciziemne kesanglaisiu ga ainzwa rangla:

"Pa kehu ga kehang dau,

pa hebaangme kekiee de teuswa,

nah pa mina de mta mapeu peubeu."*

9 Nah, "Pa nghangdi," de kecu samde pa kideu kehenah ga nghung delie kecu kiede meni? 10 Nghung kecube de au Tinggim pelane reu nghang kecube deda, iciu eh pa ma pelane ga puilu kerane. 11 Nah Khrista peu kangge de langkegaime tei kera, nah kangge de peu caihakecime tei kera, nah kangge de peu samliakeyi kepaume tei kera, nah kangge de peu meurün kekwame nah keledeume tei kera peu, 12 iciu eh peu kemcimedung de mi gwaketei gade heta tei hemilu kerane nah Khrista pumbe teucuh lu kerane, 13 anui pelane kenlum gade nah Tinggwang Nabe de keci ga ket tei eh anui mina ngkieng canglu eh Khrista nzwa cangsiaklu kemaktane, 14 iciude anui hename nzwa mpet nlüt tadi zie, nah keledeu leune kaigui ne gui kelien pwa kela ga nah mide kecwame ciem petau kemak ga la sita dizie. 15 Meliene, keku gade kesangbe rang eh Khrista, pe peube dage anui ma pelane gade lunghgai lugo, 16 pe dage pumbe pelane keriangkeu ncüt pwabam nah pe nnie ne tamtok pelane riangkeu ncütlu, pezi ket ket kecu pe ta teigai ge pumbe lungh cuh eh keku gade mmicuh lula.

17 Ciziemne, Ih nnuide Gentileme penui kecetdung kemta tei eh lungh kela nzwa lungh sita lulo aide rang gaila nah Rampaube zi gade kie gaila. 18 Penui kecet au kemui ga la nah Tinggwang ne kepeu teilung gade mdei la, kedanemene penuida mang kecude kebamne, nah penui lung tak kecu ziemne. 19 Penui da kenggam ketde gah, penui kenlien tadung tei eh mci kemak ta leune tei neusüt lala. 20 Dede nnui Khrista ha ci kelude cinzwa ma, 21 nnui pe ha siu luda, nah Jisu da kesangbe kebamde nnuide ledeu beuda. 22 Nnui zaireli teilung kehegwabe ga kelade püt dilu, teilung kehegwade mide cwa kela hengin de ziemne ngkap kezeude, 23 delwe rabe gade nnui kecet teiheci dailu, 24 nah teilung kehecibe, Tinggwang rehi nzwa samsang nah kemci kesangbe gade dam kelude teu bahlu.

25 Ciziemne, kemret keugidi eh, nnui keheibe de pe kidabe dade kesangbe ranglu, kedanemene anui au pumge ga peupeime kaplu. 26 Nnui ratalu dede kemau teiso. Peu nnui rata eh tingnaimiak nlüt diso,✝ 27 mede herakesiabe de zuiyi keyi gede peu so. 28 Keregabe de rega sita dilu. Dede pa pe bale bata keyi tei eh heta tei maisia, iciu eh pa teu maikesiame de ma pwa peulu kerane. 29 Nnui mui gade sam kesiabe kette peu rangpet so, dede sam keyibe, mi teumai kesiabe mide teu cuhlu kerabe rünne ranglu, iciude kekingneime de peu ngaugia ngaulu zie. 30 Nah Tinggwang Kemci Rabe suisiet teiso, pe dade nnuide rilu kera benai ziemne giaklu delu. 31 Peu helung kekaa pekiene, nah lunghop, nah rata, nah regi kecu, nah mide kii kecu, lungcet kesia leune si eh gidi lu. 32 Meliene, hangge ge dade nnui zai yi nah helung ncieplu, ketket maugi beulu, Khrista gade Tinggwang nnui maugi kebeu nzwa.