1 Pe kumedung kecu nzwa, Tinggwang zai kerelime tei lulo, 2 nah Khrista anuide ku eh Tinggwang dage marim kehengui keru nzwa nah ratak tei eh anui ziemne pe pum kai kebeu nzwa, anui keku ga tetla lugo.

3 Dede kemcime ziemne petau kemak nzwa, nnui kakga kemmha nah mcikemak pelane mede ma kehengin rang kerabe ma, 4 nah kehera nah kemtasam kerang mede teu henui ketei sam, petau kemakdung, meliene, nnuida peu hetwa kepeu bam lulo. 5 Aide ci mcilu, kemmhame pelane mede mci kemakbe mede ma keheginbe, (cide mamie kerecame), Khrista nah Tinggwang hegwangram ga pe ma gah. 6 Kemta sam le mide peu nnuide cwa diso, kedanemene aidungde ziemne samzai tei kemakmedung reu Tinggwang rata gwang zielu. 7 Ciziemne, cipaume dungde ngngwa zangna teiso, 8 kedanemene nnui piage kemui ga la, dede cu au Rampaube gade kebaa ga la dida. Kebaabe name tei eh lungh lulo 9 (kedanemene kebaabe tsi au makeyi leune ga nah kesamsang nah kesangbe ga bam lalu), 10 nah sünne eh Rampaube lungning daibi ci lulo. 11 Nah petsi bui kemak kemui batadung ga ncüt so, meliene penuide kebaa gage teu mpetlu. 12 Kedanemene penui ngkim eh tei keladung de au rangde ngngam lu. 13 Dede ma pelane kebaa ga teumpet kegaidau, cide ngau dila, kedanemene ma pelane de ngau kedibe au baa di delu. 14 Ciziemne ainzwa rangla,

"Mraklu, O zip kezeubo,*

nah ketsai gade cuhlu,

iciude Khrista n dade baa luzie."

15 Cizieme nnui dainzwa lungh labi sünne lulo, kemieme nzwadi so dede kemriakme nzwalu, 16 peting kebamde teuci sütlu kedanemene petingbe sia bamlu. 17 Aide ziemne, mie so, dede Rampaube lungning daibi kecude cilu. 18 Nah zau sakmie so, cide mide tei msia dizie. Meliene, Kemci Rabe le kepui teilu, 19 hangge ge dage lei nah ketwa lei nah kemci leidung teu eh sam ranglu, nnui lung gade leitei eh nnui suikeyi lei teipwa Rampaube de peulu, 20 ma pelane ziemne anui Rampaube Jisu Khrista zi gade Peibe Tinggwang de hetwa peu muilu. 21 Nnui Khrista de kerüt gade hangge ge dage henah gai lulo.

22 Minaumedung, Rampaube dage nzwa, nnui nahpeime kangga lunghlu. 23 Kedanemene mi nahpei ge au Khrista ngqwabe peube kecu nzwa pe nau peube da, nah Khrista pe pekatei pe pum de kelikelube da. 24 Dede ngqwabe Khrista kangga kelungh nzwa, minaumedung de ma pelane gade penui nahpeidung kangga lungh lulo. 25 Mi nahmedung, Khrista ngqwabe de hung eh pe pum kai kebeu nzwa nnuide nnui naumedung de hung lulo, 26 iciu eh pa Tinggwang sam teu eh ngqwabe de dui le hui mcilwe ngqwabe de tei mcilu kerane,* 27 iciude Khrista ngqwabe de pekatei pecu ndusüt eh pwa peulu kerane, zamra mede mneudi mene mede cidung ketde bam mene, dede kemau gahzing nah mci bamlu kerane. 28 Cinzwa eh, mi nahmedung pekatei pe pum de keku nzwa penui naudung de hunglu maisia. Pe naude hung kelabe pekatei pecu hungla. 29 Migede madaude pekatei pe pumde ngkau lama, dede Khrista ngqwabe dage tei kegai nzwa pa cide pok tei sünne eh pie teune lula, 30 kedanemene anui au pe pum ga peupeime delu. 31 "Aide ziemne mipei ge pe pei nah pe puide gidi eh pe naude ngngwa ncüt dizie, nah penai teih ge teidi zie."✝ 32 Macetkecok aide mlang süt, nah Ih Khrista nah ngqwabe ha rang bam. 33 Cinzwa delwe, nnui hangge ge kecu de pekatei pecu keku nzwa, pe naude kulu maisia, nah pe naude pe nahpei de rütlu maisai.