1 Aipau kiede ziemne Ih, Paul, nnui Gentileme ziemne Khrista Jisu baang tei kelabe, 2 nnui ziemne Tinggwang ngaugia ta tei kerane acu kepeude nnui siulu cai, 3 pe kengkiem mariem de acu keuliagai eh peu cikelu gade, Ih aipau hade duitu gage raugai dida.*3:3 Eph. 2:11-22. 4 Nah nnui cide pei gaide, nnui Khrista ha macetkecok Ih ci kelude ci luzie, 5 cide ceheu kedadung ga minadung de peu ci ma dede Kemci Rabe gade pa ne langkegai kemcime nah caihakecime de peu cigai— 6 cide cai Gentileme samliakeyi be gade kemapwame nah pum ge ga kencütme teilu, nah Khrista Jisu gade Tinggwang sampet kebeu de ga ngngwa kemazime teilu, 7 cide ziemne Ih Tinggwang ngaugia mapeu gade kilame ge teilu, cide pe kengkieng bata gade acu peu. 8 Ih, kenlumme kakgade ceutu nabe*3:8 Kenlumme kakgade ceutu nabe: kenlumme kakgade mautube tei eh mina pecu keu hegielu kera magede gah kecu rehi ge gage kaipwa ladi. liede, Gentileme dage Khrista keyi peikap gaikelak de ledeu kera ngaugia aide acu pwapeu, 9 nah ma pekiene dam kegaibe Tinggwang mmi kekiee ge kebai pwa kela macetkecok de dapai bi kecu mina pelane de peu cilu kerane, 10 iciu eh cu ngqwabe de peu Tinggwang maci macet ketsamtsam pwa tinggim ga kedime nah kengkieng teukela leune de peu cilu kerane. 11 Tinggwang ndaa de riemteu kelade nzwa anui Rampaube Khrista Jisu dade tei canglu, 12 pecu nlum kelu gade anui ngngidi mene pe da gwanglu kebui kekuu bam dida. 13 Ciziemne, Ih nnui ziemne keherei kegaidung de ziemne nnui lung siadi helo nnui dage kie gaila, cide au nnui ziuyi ziemne lie.

14 Aipau kiede ziemne Ih Peibe Tinggwang dwade koktung eh kekie tei bamla, 15 pe dade kelak keheibe de tinggim gade nah kideu gade pe zi ngaulu. 16 Ih peu pe kendu kedi gade nnui lung tei ntiplu kera pe Rabe gade kengkieng nnuide peulo kie bamla, 17 nah kenlum gade nnui lungga Khrista de peu bamlu kerane, iciu eh keku gage nnui mahreilwe pe bangdwalu kerane, 18 iciu eh pe minadung de ngngwa eh Khrista keku dai langge, dai tiege, dai huge nah dai cokge bi peu nnuide cicangsiaklu kerane, 19 nah peu nnuide Khrista keku, maci le cicang gaikelak de peu cilu kerane, iciu eh peu nnuide Tinggwang zaireli siakbe le*3:19 Tinggwang zaireli siakbe le: mdet canggai kelak pe kendu kebam ga Tinggwang ncu qulu nah peu cika silu eh peda kehega bamdi kecu. kepui teilu kerane.

20 Nah pe kengkieng gade anui lungga bata tei kebambe, anui kekie swade mede kemning swade teikiee gwalu kebuibe de, 21 peu ngqwa gade nah Khrista Jisu gade nah ceheudung pelane gade kelungta ndu lamui kelube tei lulo. Amen.