1 Rampaube au Zion napui de perata gade kemui kang gage kailu da.

Pa au Israel zuyi de tinggim gade kideu gage kelien gai dida.

Pa pe rata tingba benai pe pidaubam de nsunglu meda.

2 Rampaube au Jacob namdung pelane mneu luda nah ngaugia bam meda.

Pe rata tingbadung dau pa Judah napui riekelu namdi de kelien ngkei gi dida;

Sipiekemak gade pa hegwangram nah cika kedimedung de kideu gage keliengi dida.

3 Pa rata kesia teu eh Israel kengkieng leune dangtüt dida.

Pa pe ba zetle ngauraume dwagade keucaili dida.

Pa miheu ge pe taiga maleune rudi kela nzwa Jacob de ru dida.

4 Ngauraume ge nzwa pa pe lakpi anui lamge ga luda,

pe ba zetle le kap gai kera ntei luda.

Zion napui paiki ga pecu penui suiyi bam kela pelane de pa daptset ciau dida;

Pa pe lunghop mi nzwa ruigai dida.*

5 Rampaube au ngauraume ge nzwa dida. Pa Israel de mneu luda.

Pa henidung pelane mneu luda. Pa pe kengkiengbamdung ngkap dida.

Pa Judah ga minadung dage lungrei nah kehap teingkiee beuda.

6 Pa au pe paiki de hegurie ga ki keceu gede nzwa renia dida. Pa kensim maadi de ngkap dida.

RAMPAUBE kemci tingba nah Sabbath kenade Zion gade nsungta kera tei dida,

kedanemene pa pe rata gade hegwangpei nah cingkupei kenade mlai di delu.

7 Rampaube pe reca bam püt dida nah pe kemcini de sipie meda.

Pa pe hegwangbamdung tangdeudung ngauraume ba gage kai dida.

Penui RAMPAUBE ki gade hekwa sahbak kecu ge teigai da, hengyi tingdau naige nzwa.

8 RAMPAUBE au Zion napui namdi rie teimsia di kera cet luda.

Pa au kemdet ria teu nzang petlu da nah tangdeu teimsia kera gade pa pe ba keu caili meda.

Pa hap kerane kudadung nah kirie tei luda; cidungde ngngwa kemta dida.*

9 Zion kiriedung kideu ga kaumie dida; pa pe rieki radung teimsia nah tei kecai dida.

Pe gwangpei nah kedimedung heleuhdung kakga la dida, hezaibe bamsi meda

nah pe caihakecimedung RAMPAUBE dade marengei ngau meda.

10 Zion napui hangkiamedung kideu ga mlei mene ntumbam dida.

Penui peu gage rebui keliengai nah rosopai ba luda.

Jerusalem relei kemcimedung kideu ga penui peudung keumie bam dida.

11 A miakduidung ziemne a miak peta teilu tadi; a za nlaidi;

minadung napui de teimsia kedine a lungnetdung lwa hegwale kideu ga pet dida,

namdibe gu puididung ga henamedung nah ngienadung mnei bam dida;

a lungnetdung hangdeu gage kaigai pwa bam dida kedanemene a minadung napui de teimsia kedine,

henamedung nah ngienadung namdibe gu puidikidung ga mnei bam dida.

12 Penui penui puidung dage rang eh, "Mei penai zau daiga bam no?"

penui namdibe gu puidikidung gade rezam kedime ge nzwa kau zeu eh,

penui puimedung gu hekarak gade tsaidi zeuda.

13 Jerusalem ga minadung, Ih daipai n dage ranglu laino?

Ih dai teu ncu keda lulai, Ih n lung teincieplu kerane, Zion leitin napoi?

N rezam zam au jaaidi lang ge dida. Caune ncu teimmi lulai?

14 N caihakecime n ziemne kemret nah kemta marengei ngau.

Penui peu ncu yi dailu kerane n mau ranglia beuma,

dede n ziemne penui kemret samdung nah kemakbe ncu peugai.

15 Lampuiki ga tetka kegwangme leune n dage henui tei eh bapeu gaila.

Penui nui nah peungum eh Jerusalem hezukeyi de nui eh ranggai,

"Aipau namdi de deni penui ‘Hezuyi cangsiak,’ ‘Kideu leune ziemne suiyi’?" de eh qu kela de.✝

16 N ngauraume pelane ncu henui tei bam.

Penui pieling nah penui rata eh penui gei geigüt eh ranggai, "Anui pecu teikau dida!

Anui kwakebam de tingba aide da! Anui henai au cide ngaulu da."

17 RAMPAUBE pa riem kelu de tei canglu da. Pa pe sam de tei canglu da.

Pa ncu ngaugia si mene ngkap dida,

kedanemene pa ngauraume de peu ngkienglu eh suiyi peudi delu; pa n ngauraume kii teu cuh beu dida.

18 Jerusalem ga minadung penui mlung Rampaube dage hapgai,

Zion napui kiriedung! N miakduidung hereuki nzwa peu tingmui tingba lwa mie lo.

N katei ncu kerelui peu helo, mede n miak kena dede kerelui peu helo.

19 Cuhlu, tingmui hapgai lo, tingmui zie pelane!

Mlung dui kerui nzwa Rampaube dwa gage ruigai lo.

N ba Pe dage hwa cuh gailo n name puidiki leune kuung ga mzeu eh tsai lai eh kebamme teilung ziemne.

20 Pielo, RAMPAUBO, nah nang tei keherei kegaime de pie gailo.

Mipuidung pe name de tyei zie ni, hename penui nküt keludung de?

Cingkupei nah caihakecipei de Rampaube kemci kerecaki gade teitsetdi zieni?

21 Puidikidung rebui ga hecing hena nzwakap eh tsai zeu bam dida.

A rehangme nah a relieme ngauraume kingtie gade tsai dida;

penuide ngaunggia mene nang penuide daptset dida.

22 Nang qugai da, minadung de hengyi tingba ga kequ nzwa, a ngauraume acu twagwa, RAMPAUBE Pe rata kedi benai migede pak gailak mede ring gailak;

Penui Ih hung nah nküt cuh kelu a namedung de teitset dida.

A ngauraume ne nkap dida.