1 Ih au RAMPAUBE rata geutie kang gade keherei kengau pei deda.

2 Pa acu gwa gidi nah acu peu kebaabe ga be mene kemuibe ga tet.

3 Kesangsiakpe Pa acu mcau eh pe ba nreu adage kaigai dai dai dida, tingba zie pelane.

4 Pa a pumteih nah a geu de peu ki dida; Pa a radung teicum dida.

5 Pa acu tui kera ta teilu nah acu suisiet nah lungrei le twagwalu da.

6 Pa acu kemui nidung ga peu lungh, ndaa tsai kedimedung nzwa eh.

7 Pa acu tangdeu tei tegwalu nah Ih pak gai lakta. Pa a gu hetageuriadung tei rütlu

8 nah Ih qu gai nah kengha kie sahbak gai liede, Pa a kekie kingnei meihdi.

9 Pa a lampui tangtsu tangdeu le kamdi; Pa a lampuidung tei ngkoidi.

10 Pa au hegum ge adwa swa kera kwa kebam nzwa da, hingho ge mie eh mbai kebambe nzwa;

11 Pa a lampuidung teu nreudi, Pa acu püt dida.

12 Tinggwang pe lakpi gaa lwe acu pwa pe lakpitsi baru teilu.

13 Pa a ngkeu pe lakpitsibung ga kebam lakpitsi le kapdi.

14 Ih a minadung leune ziemne henui ge dida, tingbazie pelane penui henui ketei nia ge dida.

15 Pa acu lungrei le peu kepui teilu nah kekaa dui peu acu sak kera ketang.

16 Pa peu a gei tsuluine gi, nah Pa peu acu mimüt gage teu keneu.

17 A keringria au lungciep gah da; Ih suiyi daipai bi nsungta dida.

18 Cine Ih rangla, "A lungketie gah dida nah cine RAMPAUBE dade a keregui dede gah da."

19 A rei nah a ki kegah, heiring kekaa nah a lungreidung nsung gailo.

20 Ih cide nsung züza bamla nah a keringria a lung gade hena bam dida.

21 Dede Ih ma aide nsungla nah ciziemne Ih keregui bam:

22 RAMPAUBE keku bam mui kela de madaude penlih gah nah Pe ngaugia de madaude cangdi lama,

23 cidung au tingcang ramsang heci lula; n kesamsang au dizu.

24 Ih rangla, "A mabam au RAMPAUBE," ciziemne Ih peda keregui bam zie.

25 RAMPAUBE au pecu kwa kelame dade yila, pecu peei kelamedung dade.

26 Zing de eh RAMPAUBE kelikelu de kwa kebam au yilie.

27 Mipei ge ziemne pa rehang dau ge hepüt kerüt de lialu kecu yilie.

28 Peu pecu helungtie eh ntum bamlo, RAMPAUBE pe reu gage keherei kai kegai dau.

29 Peu pecu pemui rebui gage kailo, cika keregui bam de cilaklu.

30 Peu pecu kedapbe de pe bia peulo, nah peu pecu rang kemsia le kepui teilo.

31 Kedanemene Rampaube anui de kelungta pütti laklu,

32 dede pa lungrei kai gai liede, pa pe keku bam mui kela kepui gade pa ngaunggia zie.

33 Kedanemene pa pe mlung gade teikeherei mede minadung de lungrei pwa peu lama.

34 Kideu ga hebaangme leune de pepi kangga ge dau kecu,

35 Hutube dwa gade mina de kemzeube mlaidi kecu,

36 migede tutiak bam gade kemzeube mlaidi kecu, Rampaube ma cikenzwadung luulu gailak!

37 Cauge ranggai eh cide tei canglu no, Rampaube ne ajah kai kemak cai?

38 Hutube Tinggwang mui gage de meni kesia nah keyi kenana de kegwang?

39 Dainzwa eh ringkela keheibe de ncam laino? Dainzwa eh mige pe maudung ziemne saja kepeu dau ncam laino?

40 Anui anui lampuidung piegai eh cidung de kedak gelo, nah anui RAMPAUBE da cailigwang gelo.

41 Anui anui mlungdung nah anui badung tinggimdung ga Tinggwang dage hwa cuh gai golie:

42 Oh RAMPAUBO anui kemautei nah renia dida, nah nang anui mau gibeu meda.

43 Nang n katei ncu de rata le kezui lwe anui de gwazui mie, nang teitset nah anui de ngaunggia ma.

44 Nang ncu hemwa le kezuilu iciu eh kekie ket de peu kah lüt melu kerane.

45 Nang anui de hangdeu ga ralie ge nzwa teidi nah heleuhdung kakga de mlaidi.*

46 Anui ngauraume pelane anui de resetla dida,

47 kehing nah baih anui reu ga gwang da, kekau nah kengkap.

48 A miak kena miakdui reuki lwadi kedanemene a minadung de ngkap kedine.

49 A miak kena miakdui lwa züza bam zie, mtak mene,

50 RAMPAUBE tinggim gade pie ngkei gai eh ngau kemaktane.

51 Ih ngau eh a lung kehereidi a namdi napuidung leune ziemne.

52 Acu nruine ge nzwa kap kera peeidi caugame a ngauraume bi kecume ne; pe kieh ge de gah eh penui acu kap kera peei.✝

53 Penui acu hekwaki ge gage kelien gaidi delwe penui a reu gage tangtsukang sam gai,

54 nah penui peu duidung pui nlimdi, ciu eh dui a peu cuhdi. Ih rangdi, ‘Acu püt dida!’

55 Hekwaki sing gade Ih n zi qu gai, RAMPAUBO.

56 Nang a kwa siulu, ‘Nkwen ngkuidi helo a nggia kekie dau,’ de eh Ih kerang dau.

57 Ih ncu qu kegai benai nang gwang mna lu; nang rangdi, ‘Ngngi so.’

58 Rampaubo, nang tutiak ga a mzeu rangbeu, nang a teilung kelibeu da!

59 RAMPAUBO, penui ada ge kemau tei kegai de nang ngaulu da; a tutiak beulo.

60 Penui acu rang kemsiadung, nah penui ciem acu kemmau leune nang ngaulu da.

61 Nang penui kekii samdung siulu da, O RAMPAUBO, nah penui ciem pelane adage teigai keradung.

62 A ngauraume acu rang kemsia nah kemmaudung tingbazie pelane ada gwang bamla.

63 Penui dainzwa ntum nah sap cuh bi pielo; penui leidung le penui acu henui tei.

64 Penui tei kegai rehi gade, RAMPAUBO, penui de saja peulo.

65 Nang penui mlungdung tei hengam tei zie! N reset penui reu ga peu bamlo!

66 Nang penui de rata gade zuimie delwe penui de tinggimdung kang gade ngkapdi lo, RAMPAUBO.