1 Ndaa mina puiting bam kela namdi de cu au zing eh ntumbam dida.

Pa au hemipui ge nzwa dida, pa ndaa heleuh kengkieng ge liede.

Pa au heleuhdung kakga hegwangpei napui ge teigwang, dede cu au kemei tei eh hebaang ga la dida.

2 Pa tingmui hap nah helungsia bamla, nah pe miakdui lwamie pebia gumpwa bamla.

Pe mraime gede pe lung taumla ma.

Pe zangme pelane pecu cwa dida. Penui pe ngauraume tei dida.

3 Magah nah kehereikelu caide, Judah mibaang tei ladi.

Pa heleuhdung kakga lungla nah kemtak ngau luma.

Pecu zui kelame pelane pedwa railu pa reicangla kedi dau.

4 Zion kemie lampui hapbam kedanemene hengyi tingdau migede gwang ta kedine.

Pe kiriedung pelane mrwa dida. Pe cingkupeidung hapbam dida.

Pe kemci releimedung suisia bam nah pa pe suisiacang bam dida.

5 Pe ngauraumedung ne pe mpaume tei dida; pe ngauraume lungyi dizeu.

RAMPAUBE pecu tei keherei gaida pe mau kekieedung ziemne.

Pena keceunadung pe ngauraume bang teila dida.

6 Zuyi au Zion napui dade tet dida.

Pe hegwang napuidung au heti cehei luh peeilu kemakbe nzwa dida,

nah penuide zuimie kelame dwa gade penui kengkieng gah eh miela dida.

7 Pa rei kecu nah ki kegah tingbadung ga, Jerusalem nsung luzie

pa ndaa bam kela mabam pemikehung pelane.

Pe minadung ngauraume ba ga kaumie kedi dau, migede pecu ngha ma.

Ngauraume pecu ngaulwe pa kapkedi nuineu di.

8 Jerusalem mausüt di, cine, pa mi kenneu ge nah kehera ge teidi.

Pecu rüt kelame pelane cu au pecu ngkaudi penui pa paulaa kedi ngau kelune.

Pa mrah nah nreutet di kera tei.

9 Pa mci kemak au ngau hecili bam dida. Pa lung gwang kera ziemne cet ma.

Pe kau au siazu. Migede pecu pelung taumla kera gah.

Pa hapgai, "RAMPAUBE, Ih keherei kebam pielo, kedanemene ngauraume ngkieng zu dida!"

10 Ngauraube anui mabam pemi kehung leune gage pe ba kai dida.

Pa heleuhdung pe kerecaki ga kelüt ngauda,

Nnui penuide peu nnui kangbau kela heni ga lüt selo ajah kaibeu liede.

11 Pe mina leune tangku pei eh hapla.

Penui ketyeipok ziemne penui kehung mabam de peu dida ciu eh penui ringbamlu kerane.

Pielo, RAMPAUBO, delwe acu ngngialo, kedanemene Ih kemta di delu.

12 Cide au nnui ziemne magede meda ni, nnui tetka kegwangme leune ziemne?

Ainie pielo keheibe de a lungrei acu teikeherei kegai lungrei nzwa bamni,

kehung RAMPAUBE ne pe rata benai acu teikeherei gai kecune.

13 Pa kehu gade a radung gage miheu langgai, nah cide acu gwa luda.

Pa a pi ziemne helang ge kamgai eh acu teu caili lu.

Pa acu ketet eh bamla nah teimnei dila.

14 Ih sam gikah kedidung ngwanggai au pe ba ne keu ncüt luda.

Cidung de za ncütlwe a ngwang gage kai luda. Pa a kengkieng tei mnei dida.

Rampaube acu penui ba gage kaibeu dida, nah Ih saplu ta dida.

15 Rampaube ne a reugwa ngkiengtume pelane de kelien dida.

Pa reugwamedung de langgai a rehangmedung de tei ngkapdi kerane.

Rampaube ne Judah ga minadung de zauniakbam ga nzwa tei kecai dida.*

16 Aidung ziemne Ih hap, a miakdui pui nlim eh lwa eh;

kedanemene helungtau kemlabe a dade mdei di, a keringria teucuh beu kelabe.

A minadung de ketet dida ngauraume ne acu ngam kedine.

17 Zion pe ba hwa nzaha luda; migede pe lung tau mlalu kera gah da.

RAMPAUBE au Jacob de twagwapung kebammedung de pe ngauraumedung dilo ajah kaibeu dida.

Jerusalem au penui ziemne mcikemak ge dida.

18 RAMPAUBE au masang, kedanemene Ih pe sam de renia di de kecune.

Kingneilu, nnui mina pelane, nah a lungrei pielo.

A kemci releimedung nah kengkieng mipeidung hebaang tei dida.

19 Ih a zangme de qugai, dede penui au acu cwadi.

A cingkumedung nah a hangkiamedung namdi gade tsai dida,

penui ringlu kera ketyeipok pei keladau.

20 Pielo, RAMPAUBO, kedanemene Ih keherei bam dida; a za mrwacwa dida,

a lung ga a nlung hebwakdi, kedanemene Ih samzai tei kemakne.

Hegwale, kingtie ziemne mipui hap bam, kilung ga ketsai rünne bam dida.

21 Penui Ih hap kebam kwa siuda, dede migede a lung taumla kera bam tadi.

A ngauraume pelane a reikwa siuda nah penui au nang cide tei kegaine penui suiyi di.

Nang sampet kebeu keherei tingba de teugwang gaida; cu au peu penuide Ih nzwa lulo.

22 Peu penui kenlienta leune n dwaga peu gwang lulo.

A mau ziemne nang a dage tei kegai nzwa penuide tei beulo.

A mra kwadung au kiee nah a nlung au ndam dida.