1 Zedekiah mmi ngkaiehket dau pa hegwang tei mdeulu; pa Jerusalem ga mmi kereiehket hegwang tei. Pe pui zi cai Hamutal; pa au Jeremiah napui Libnahme. 2 Hegwangpei Zedekiah, RAMPAUBE miakdwa gade petau kemakbe tei gwang; pa hegwangpei Jehoiakim ketei leune tei gwang. 3 RAMPAUBE rata gade, aidung pelane Jerusalem penai Judah da canggwang, pa penuide pe dwa gade keugi di kemaktane. Pecai Zedekiah, Babylon gwangpei de renia cuhdi. 4 Hegwangpei Zedekiah hegwang tei kelu mmi hekui bekum, kei kerei, nah hekeizie ziangrei benai, Babylon gwangpei, Nebuchadnezzar, pe reugwame pelane de ngngwa gwang Jerusalem de gwaketangdi. Penui Jerusalem de mcwalwe paiki teilwe bam, nah cika penui reugwa kirie tei twagwalu. 5 Cine Hegwangpei Zedekiah hegwang tei kelu mmi kereiehket kecang namdi de reugwame ne twagwa pwa bamdi. 6 Kei mdai bekei lang hekuine benai herakum siasüt kecu Jerusalem namdi ga gwang eh cipau deu ga minadung ziemne taktyeipok gahdi. 7 Cine namdi de pangpop di, nah mina keregi kebamdung pak tetdi nah tingmui namdi kirie kena kakga hegwangpei gurie gade tetdi, Chaldeame namdi pelane ga twagwa bam liede. Cine penui Arabah lambie ge tet gaidi. 8 Dede Chaldeame reugwame, hegwangpei de zuimie eh Jericho taiga Jordan Reuki langkam gade Zedekiah de gwakahlu. Pe reugwame pelane pe dade tet zangra di. 9 Penui hegwangpei Zedekiah de tuilu nah pecu Hamathme deu Riblah namdi ga Babylon gwangpei da ngngwa gwang, cikade pa pecu tutiak sam peugai. 10 Babylon gwangpei, Zedekiah napeidung de pe miakdwa gade gitsetdi, nah Riblah gade pa Judah muiteume pelane de gitsetdi. 11 Pecai pa Zedekiah miak let mpetdi, hetageu riadung le pecu kanglu, delwe pecu Babylon ga ngngwa gwang. Pa tsai kecu tingba kecang Babylon gwangpei pecu hebaangki gage kaidi.

12 Cu kei mengei bekei, ziangrei benai, Hegwangpei Nebuchadnezzar hegwang ketei mmi kereiehekui bekum, Babylon gwangpei, Nebuzaradan Jerusalem ga gwang. Pa au hegwangpei pum kekwame reu muibe nah Babylon gwangpei kila ge. 13 Nebuzaradan RAMPAUBE ki rudi, hegwangpei kidung, nah Jerusalem kidung pelane; namdi ga kemlang kidung de pa ru di. 14 Jerusalem twagwa kebam kiriedung de, Babylon reugwame pelane, pum kekwame reu muibe de ngngwa kelame ne tei msiadi. 15 Mina magahtume ziemne, namdi ga mina bangh kelume pelane, Babylon gwangpei de püt eh tet kedime, nah heciemta ketei pe kebanghmedung, Nebuzaradan, pum kekwame reu muibe, penui kangge de hebaang tei kera tuiteu tetdi. 16 Dede Nebuzaradan, pum kekwame reu muibe, magahtume kangge de kubeluh nah luhdung ga heta tei kerane kai nzeudi.

17 RAMPAUBE ki ga kebam hetageu tsiadung de, nah pe sapdung, nah hetageu li kedi de "Jaaidi" de qu kelade RAMPAUBE kiga kebam de, Chaldeame cide teipang takcaidi delwe Babylon ga hetageu pelane pung cailigwang di. 18 Lidung, peitwakdung, mibung kentau netdung, nah kerecaki ga cingkume keu heta teikela hetageu niadung pelane, Chaldeame cidungde keuteu ciakdi. 19 Lidung nah kehengui rim keru bungdung, hekwakdung, mabungdung, mitaubungtiedung, hegeulidung, nah kecak le tei kelu lidung, nah rangkanggeu le tei keludung, cidungde de hegwangpei pum kekwabe ne keuteudi. 20 Hetsia kena, hetageu li kedi cide "Jaaidi," de qu kelade nah hetageu hetumseu kereiehkena hetsiadung kangga kebam de, RAMPAUBE kerecaki ziemne hegwangpei Solomon tei kegaidung, hetageu perüt mdet canggai kelak ge bam. 21 Pe tsiadung pehu ketket kecu cubit kereieheset*, nah ketket de twagwa kebam petie cubit kereiehkena.* Ketket kecu miba zurang mdai dige nah pelung ki au mrwa. 22 Hetageu peukang petün ga bam. Cide pehu cubit mengei*, pwakelu rehi nah kuraletsi ne pelane twagwa pungbam. Cide au pelane hetageu le teilu. Tsiapum kedabe de nah kuraletsidung de kerai de nzwa da. 23 Cine tsiapum peukang taiga kuraletsidung riakhekuieherok bam, nah pwakelu reu ga kuraletsi haige bam.

24 Pum kekwame reu muibe hebaang tei kebam Seraiah de ngngwa lu, cingku kedibe, Zephaniah de si eh, cingku pekenabe, nah kirie kekwame hangcum de ngngwalu. 25 Namdi gade pa hebaangki reu kedibe de reugwame de pie rengei kebambe de ngngwa lu, nah hegwangpei de ledeu kelame mipeidung hang hena, namdi ga kebamme de. Pa hebaangme hegwangpei reugwame reu kedibe, mina de reugwame gage kedet gai kelabe de ngngwa lu, namdi ga kebam cipau deu ga mina kemlang riakherok gede si eh. 26 Pecai Nebuzaradan, pum kekwame reu muibe, penuide ngngwa lwe Riblah ga Babylon gwangpei da penuide ngngwa gwang. 27 Riblah ga Hamathme deu gade Babylon gwangpei penuide teitsetdi. Ainzwa eh, Judahme de penui deu gade lang gidi.

28 Mina aidungde Nebuchadnezzar ne langgi kedimedung: Pa hegwang tei kelu mmi hena bekum, Judahme 3,023 de lang gidi. 29 Nebuchadnezzar hegwang tei kelu mmi kereieheset bekum pa Jerusalem gade mina 832 de ngngwalu. 30 Nebuchadnezzar hegwang tei kelu mmi ngkaiehkecum bekum, Nebuzaradan, hegwangpei pum kekwame reu muibe, Judahme mina 745 de lang gidi. Langgi kedi mina pelane ge 4,600.

31 Judah gwangpei, Jehoiachin de langgi kedi mmi camreiehena cai, kei kereiekena bekei, zie ngkaiehmengei benai, Awel-marduk, Babylon gwangpei hebaangki gade Judah gwangpei Jehoiachin de lungmpet beu. Aide Awel-Marduk hegwang tei ndeu kelu bekum. 32 Pa pe zaiyi eh pecu resiu gai nah Babylon ga kebam hegwangme kedamedung swade herüt kepeu bam ge pecu pwapeu. 33 Awel-Marduk, Jehoiachin dade hebaangme paini niadung keu mpetdi, delwe Jehoiachin pe teilung kebanghbe hegwangme taktyeibam gade matyei jüja eh lunghdi, 34 nah pe teilungh kelunghta, pa tsai cu kecang, Babylon gwangpei tingnai ramsangne, taktyeipok teu maikesia pecu pwapeu.