1 Zedekiah Judah ga hegwang tei kelu mmi hekui bekum nah kei kerei bekei, Nebuchadnezzar Babylon gwangpei pe reugwame pelane de ngngwa gwang eh Jerusalem de renia nah tuilu. 2 Zedekiah hegwang tei kelu mmi kereiehket bekum kei mdai bekei lang hekuine benai, namdi be teipang pop nlüt. 3 Pecai Babylon gwangpei kedimedung gwang nah rieki sum be ga bamlu: Nebo-Sarsekim, Samgar Nebo, nah Sarsechim, kedi kenlangme. Nebo-Sarsekim be kedime reu kedibe nah kedadung becai Babylon gwangpei kangga kedime.

4 Zedekiah, Judah gwangpei, nah hereu tei kebam pe minadung penuide ngau luge, penui pakti. Penui hegwangpei hegurie lampui gade ting kemuine ge namdi be gade tetdi, tangdeu kena kakga kirie be gade. Hegwangpei Arabah* liebe ge tetgai di. 5 Dede Babylon reugwame penuide zui mie nah Zedekiah de Jericho tai Jordan reuki langkam gade tuilu. Pecai penui pecu tuilu nah Nebuchadnezzar da ngngwa nghang, Babylon gwangpei, Hamath deu Riblah nam ga, cikade Nebuchadnezzar pe tu tiakgai. 6 Babylon gwangpei Zedekiah napeimedung de Riblah gade pe miak dwa gade teitsetdi. Pa Judah kedimedung pelane de teitsetdi. 7 Pecai pa Zedekiah miak let mpetdi nah pecu Babylon ga ngngwa mie kerane hetageu riadung le kangdi. 8 Pecai Chaldeame, hegwangpei ki nah mina kidung rudi. Penui Jerusalem kirie de de teu kaudi. 9 Nebuzaradan, hegwangpei de kekwame reu kedibe, namdi be ga bangh kenzeumedung de hebaang teilu. Chaldeanme dage pakgai kedime de si eh nah namdi be ga bangh kenzeu pelane. 10 Dede Nebuzaradan hegwangpei de kekwame reu kedibe magahtume, penui da magede gah eh kebamme de peu Judah deu ga bamdi. Cipau benai gage pa penuide kubeluhdung nah luhdung peu di.

11 Babylon gwangpei Nebuchadnezzar Nebuzaradan hegwangpei kekwame reu muibe dage Jeremiah ziemne aja ge peu. Pa aide rangbeu, 12 "Pecu ngngwa lu nah pe ma pielu. Pecu teikeherei so. Pa ncu rangkebeu mapelane teibeu lu." 13 Cine Nebuzaradan hegwangpei de kekwame reu kedibe, Nebushazban kedibe, Nergal-Sharezer kedime reu kedibe, nah Babylon gwangpei gu kenlang kedimedung mina de langmpet. 14 Penui minadung Jeremiah de kekwabe kigu gade ngngwa lu eh Ahikam napei nah Shaphan capei Gedaliah dage kaibeu di, pecu kilung ga ngngwa gwang kerane, cine Jeremiah minadung kakga bam di.

15 Cu Jeremiah kekwabe kigu ga hebaang tei eh kebamdau peda RAMPAUBE sam gwang eh ranggai, 16 "Ethiopiame pei Ebed-Melek dage ranglu, ‘Tinggim reugwame reu RAMPAUBE, Israel Tinggwang, aide rangla: Pielo, Ih rang kegai a sam de namdi be aide dage tei zie delei, keyi be mene kengkap teugwang zie. Cipau benai n dwa gade ma ai pelane tei zie. 17 Dede cipau benai Ih ncu kelibeu zie,— aide RAMPAUBE ne ndugai—nah nang hing kela Judahme kedime ba gage ncu kaibeu dilak. 18 Kedanemene Ih ncu kelibeu bi zie kecune. Kingtie gade nang kau dilak. Nang ring eh pak luzie, kedanemene nang acu nlum kecune—aide RAMPAUBE ne ndugai.’"