1 Cingkupei Immer napei Pashhur—teuswa kela kedihbe—RAMPAUBE kerecaki dwa gade Jeremiah caihasam rang kebam siulu. 2 Cine Pashhur ne caihakecibe Jeremiah de tuilu delwe dap nah RAMPAUBE kerecaki ga Benjamin Rieki Nreule tai gage kang lwe kai dilo aja kaibeu.✝ 3 Pecai benai Pashhur Jeremiah de kai pwa kebam ni gade teu mpetlu. Ge Jeremiah pe dage rang, "RAMPAUBE au nzi Pashhur lie eh qu ma, dede Magor Missabib lie de eh qu*. 4 Kedanemene RAMPAUBE aide rang, ‘Pielo, Ih ncu kehing kauge tei gai zie, ncu nah nang hung kelamedung pelane dage, kedanemene penui au penui ngauraumedung gu kingtie gade kau zie nah cide penui miakdung le ngau zie. Ih Judah pelane de Babylon gwangpei ba gage kai beuzie. Pa ne penui de Babylon ga tuiteu mie peu hebaang tei zie mede penuide kingtie le renia zie. 5 Ih pecu aipau Jerusalem namdi mabam pelane peu zie nah cide gu maheidung pelane, cide gu pemi kehungdung leune nah Judah gwangpeidung gu mabam mahei hekwa kenzeu pelane peuzie. Ih ma aipaudung de nnui ngauraumedung ba gage kai beuzie nah penui ne cidung tuiteu pwa dizie. Penui cidung de keu luzie nah Babylon gage cidungde keugwang zie. 6 Dede nang, Pashhur, nah n kilung medung de hebaang tei kera tuiteu tet dizie. Nang Babylon ga mie zie nah cika de tsai zie. Nang nah nang hung kelame leune, penui dage nang kenret caihasamdung ranggai kebeume de cikage kung dizie.’"

7 "O Rampaubo, nang acu cwa dida, nah Ih akatei de cwa kedi tei dida. Nang au a swa ngking ki, nah nang acu ngam dida.

Ih tingba pelane mina nuineu tei; mileune acu henui tei dida.

8 Kedanemene Ih marang kegai dau, Ih qu pet gai nah ndu gai, ‘Zaisiet nah kekap.’

Ge RAMPAUBE sam de ziemne acu rang msia nah henui tei lamui dida.

9 Magade Ih akatei, ‘Ih RAMPAUBE de mning si lak ta. Ih pezi gade marang si lakta,’ de eh rang cai,

Cide au a lung ga mi ge nzwa dizie, a radung ga kebam nzwa. Cine Ih cide ketip di kera laikai tei dede Ih tei luma.*

10 Ih mina leune twagwapung kebam gade kehing samkiee cütla kedi siu. ‘Paubeu! Anui cide paubeu maisia!’

A da mna kebammedung Ih kau di kera pie bam. ‘Pecu cwa lu de cilak.

Cinzwa cai, anui pecu ngam luzie nah pecu anui kum peei luzie.’

11 Dede RAMPAUBE au reugwame ngkieng süt kecume ge nzwa ada la, cine acu gwa kecumedung kau dizie.

Penui acu ngam gai lak. Penui au hengam tei süt dizie, kedanemene penui ngkienglu gai kelakne.

Penui da penli kegah ngngam bam dizie, cide madau gede nsungta lak.

12 Dede RAMPAUBE gwamedung, nang makesangme de piela nah pe kecet nah pe mlung ncet pie la.

Peu acu penui dage hekum kepeei de ngaulo kedanemene Ih a ha pwa n dage kaidi delu.

13 RAMPAUBE dage lei teilo! RAMPAUBE de twalo!

Kedanemene pa mine tei keherei kelamedung de kesiamedung ba gade kelilu.

14 Peu acu kemna benai de reset punglu.

Apui ne acu kemna tingba de peu samlam pung so.

15 A pei de paulia kegaibe de peu reset punglu,

cau aide ranggai bi, ‘Mipeina ge nda ge mna beu zie,’ suiyi kedi ge peu kegaide.

16 Peu cipau pei de de RAMPAUBE ne namdidung ngkap kedi nzwa dilo nah pa penui dage ngaugia keulia ma.

Peu pecu tingcang nuge kehap kwa siulo, tingna dau hereu ketei kwa,

17 kedanemene acu mnalu kemakne gage pa acu teitsetdi melu, ciciu eh a pui za gade a rau tei eh,

kelungta tetlak kecu za ge tei kera.

18 Daitei lu eh kehereidung nah lungsiet ngau kera acu mna mpet lu no,

ci nzwa eh a teilung hengam le pui kera?"