1 RAMPAUBE dade Jeremiah da sam ainzwa rang gwang, 2 "RAMPAUBE, Israel Tinggwang ainzwa rang, ‘Ih n dage rang kegai sam leune laisiudum gage raulu. 3 Iciu eh pielu, pe tingbadung gwang la da, aide RAMPAUBE ne ndugai, Ih a mina, Israel nah Judah medung teilung tei heci dai beuzie. Ih, RAMPAUBE, ranggai dida. Iciu eh Ih penui paumedung de hangdeu ha kebeu de ga penuide ngngwa cailigwang dai beuzie, nah penui gu teilu zie.’"

4 RAMPAUBE Israel nah Judah ziemne sam aidungde ranggai, 5 "Kedanemene RAMPAUBE ainzwa rang,

‘Anui mbeu kebam kengngi kwa ge siu da nah lungciep kwa ma.

6 Mipei ngiena mna lubui mi keteu pielo.

Daitei Ih rehangme leune mipui hena mna kecu nzwa pe za keba pwabam eh ngau no?

Daitei penui zudung hamhui dino?

7 Co! Cipau tingba de au kedi ge zie, kedadung nzwa lak.

Jacob ziemne lungrei tingge zie, dede cika de pecu keli luzie.

8 Kedanemene cipau tingba benai Ih nnui ngwang gade ngwanggai de teipang dizie, nah nnui geuriadung teitüt dizie, iciu eh nnui sangme baang teisi ta dizie, aide Tinggim reugwame reu RAMPAUBE ne ndugai.

9 Dede penui RAMPAUBE penui Tinggwang de reca zie nah Ih peu penui reu hegwang tei kegaibe penui gu hegwangpei David gwa tei zie.*

10 Cine nang, a kilabe Jacob, ngngi so, aide RAMPAUBE ne ndugai, nah n swa gah diso, Israel.

Kedanemene pielu, Ih nnuide kemdei ga nah nnui leuhmedung hebaang tei kela deu gade ngnggwa gwang dai beu zie da.

Jacob cailigwang dai luzie nah kezuyi eh bam luzie; pecu gum luzie nah kehing de bam si lakta.

11 Kedanemene Ih n da lazie, aide RAMPAUBE ne ndugai, ncu kelilu kera.

Pecai Ih ne nnuide heleuhdung gage teizang kegaidung de de ngkap zingde dizie. Dede Ih ncu ngkap dilak,

Ih ncu kesangbe gade samzai peu tei bam liede ncu saja peu mene ta dilak.’

12 Kedanemene RAMPAUBE ainzwa rangzeu, ‘Nnui rezamdung au tei mmi gai lakta; nnui gu rezam zamdung au siasüt dida.

13 Migede nnui mapie kera gah da; nnui gu rezam de tei mmi kera magede gah da.

14 Nnuide ku kebam pelane nnuide nsungta dida. Penui nnuide pie lakta,

kedanemene Ih nnuide ngauraume rezam le tei rezam dida nah kedibe pezai kesia de nzwa

n kesia kekiee ge nah n mau pei kap gai kelakdung ziemne.

15 Nnui daitei nnui gu rezamdung ziemne kengha kie bam no? Nnui teei kebam de au tei mmi gailak.

Nnui kesiadung kieesüt kecune nah nnui maudung pei kap gai kelakdung ziemne, Ih nnui da ma aidungde teigai.

16 Cine nnuide tuityei kelame de tuityei luzie, nah nnui ngauraume pelane de tuiteu tet dizie.

Kedanemene nnuide tei keherei kelame keherei dizie nah nnuide tei msia kelame pelane de tei msia dizie.

17 Kedanemene Ih nnuide teimmi dai beuzie; Ih nnui rezamdung teingkei beuzie, aide RAMPAUBE ne ndugai,

Ih aide tei beuzie kedanemene penui nnuide: Gwa kedime de eh qu kecune. Migede Zion aide de peei meda.’"

18 RAMPAUBE ainzwa rangzeu, "Pielo, Ih Jacob ramzeuki maheidung teu gwang dai beu zieda nah pe kilungme dage ngaugia peu zie.

Pecai kau eh ngkap kedi Jerusalem namdi tei dai luzie nah kengkiengbam ndaa kebam de ga bam dai dizie.

19 Pecai cika lungh kelame ketwa lei nah suiyi kwa penui dade ngau dizie,

kedanemene Ih penuide tei ngkiee beuzie nah penuide tei ncam dilak; Ih penuide herüt peu zie iciu eh penuide tei henah dilak.

20 Pecai penui gu minadung de ndaa nzwa dai luzie, nah penui hemaa de a dwa ga teu ncuh luzie,

Ih penuide tei keherei kela leune de saja peu kedi cai.

21 Penui muiteu penui kakgade gwang zie. Pa penui kakgade pet zie

Ih pecu qu kegai dau nah pa a da kegwang dau.

Ih magade aide tei gai mecai, cau ge a taiga gwang nna beu lai?, aide RAMPAUBE ne ndugai.

22 Pecai nnui a mina dizie nah Ih nnui Tinggwang dizie.

23 RAMPAUBE tingkai keci de pielo, pe rata au mpet dida. Tingkai keci cide au gwang daidai zie.

Cide mina kesiame peudung ga nrui bam zie.

24 RAMPAUBE rata cide teicang di kemaktane cailigwang dailak nah pe lungning teicanglu kemakta.

Peting kekam le daune, pe minadung aide ci luzie."