1 "Nang cailigwang cai, Israel—aide RAMPAUBE ndu kegai—iciucai nnui a da cailigwang kerabe.

Nnui Ih ngkau kela mamiedung de keu gidi delwe a dade tet mdei daidi meliecai,

2 Nnui masang, mzui, and kesamsang lu, nnui ‘RAMPAUBE ringbam,’ de eh sampet keludau.

Iciulude heleuhdung pe dade penuikatei penuide samlam beu luzie, nah penui pe dade ndu luzie."

3 RAMPAUBE Judah nah Jerusalem ga mina hangge ge dage rangla:

‘Nnuikatei nnui luh pulu,

nah hetupuidung kakgage ling so.

4 RAMPAUBE dage nnuikatei nnui hegeurum gailu,

nah nnuide tei mci gailu,

Judahme peidung nah Jerusalem ga kelunghme, meliecai a rata au mi nzwa heu zie,

nah migede cide tei mmütlu kera gah dizie,

nnui kemau tahdung ziemne.*

5 Judah gage ndu gailo nah Jerusalem ga peu siulo.

"Hangdeu be ga telui kwa gailo," de eh ranglo.

"Gwang ncütlu. Anui rie pwa kebam namdidung ga mie go," de eh ranglo.

6 Saulia kegai pailim pwa ncuhlu nah cide Zion gage sau gailu,

nah kwaklu kerane paklu!

Pak mene bam so, kedanemene Ih kengkap

ngauraume tingpeule gade nah kengkap kedi ge teugwang la dida. 7 Hingho ge pe mbai bam gade mpet la

nah ngauraume heleuhdung de ngkap kelabe tetpet dida.

Pa pe bam gidi eh n deu gage kehing teugwang kera gwangla,

n namdidung de kengkap nam ge nah migede lungh kemak nam ge tei di kera.

8 Cine rosopai bahlu, delwe hei eh haplu.

Kedanemene RAMPAUBE rata kesia de anui dade nreu di melu.

9 Cidau cipau benai aide tei zie—aide RAMPAUBE ne ndugai—hegwangpeidung nah kedime penui keku gah dizie. Cingkume de keheu dizie nah caihakecime penui swagah dizie.’" 10 Cine Ih ranggai, "Ah! RAMPAUBE Tinggwang. Nang mina aidungde nah Jerusalem de cwa cangsiak dida, ‘Nnui ziemne lungciep bam zie.’ Dede kingtie ge penui teilung ga bam dida."

11 Cipau tingdau mina aidungde nah Jerusalem ziemne aide ranggai zie, "Hetaideu langkam gade tingkai kelum ge a mina napuidung dage guigwang zie. Cide ciurie kegui ge lak mede penuide tei mci lak. 12 RAMPAUBE aja gade gwang kela tingkai de au ciswa ci gwa zie. Cide au RAMPAUBE pekatei pe minadung reu gage tutiak gai beuzie." 13 Pielo, pa hemwadung nzwa gwaketang bam, nah pe bagidung au rahang ge nzwa. Pe kündung au lingriedung swa mzet ki. Anui au kap dida, kedanemene anui au kau di delu! 14 Jerusalem n mlung gade kemau de hui dilo, ciciu de ncu kelilu kera ziemne. Dai tiege nang kemau lungcet mning eh bam laino? 15 Kedanemene makwa ge Dan namdi gade samlia teugwang la, nah kengkap gwang kela de au Ephraim lamlwatudung gade siu bam. 16 Heleuhdung de peu aide cet mting gailo: Pielo, Jerusalem dage deudi kemdei gade gwang eh Judah namdidung dage hereu teigai kerane ngauraume sah gailai eh kebam de reci gailu. 17 Penui ta kelu luh de pie twagwa kebam reketme nzwa zie, kedanemene pe minadung RAMPAUBE de renia kedine—aide RAMPAUBE ne ndugai— 18 nah nkatei tei kegai nah n tah le ma aidungde n dage teigai luda. Aide ncu peu kegai saja zie. Cide dai kenzwa gede kehing ge zie no! Cide ne n mlung reu dida.

19 A mlung! A mlung! Ih a mlung ga keteei de liagai lakta. A mlung au kekok süt bam dida. Ih mlei mene bam gai lakta kedanemene Ih teluidung kwa siu kecune nah reutak kwadung. 20 Kekap ket cai kedage gwang; deudi pelane kauzeu dida. Anui paikidung au tei ngkap zette dida, anui kehezupaidung kaknage gade tei msia dida. 21 Ih daitie ge reutak kehung piebam laino nah teluidung kwa kecu kwa siu bam laino? 22 A minadung au maang—penui au acu cima. Penui au kemieme nah penui da kecikecet gah. Penui kesia tah tei kecime, dede keyibe au teici lama.

23 Ih hangdeu de pie gai. Ainie! Cide au hangdeu kemrwa deu. Cika tinggimdung ziemne kebaa gah kecune. 24 Ih lamlwatudung ga pie gai. Ainie, cidungde mlai eh bam, nah kideutudung mlai mlüt mpet bam. 25 I piegai, Ainie, cika mide gah, nah tingkam nruinedung kecang de lim tetdi. 26 I piegai. Ainie, matsi luhdung de hetaideu nah RAMPAUBE dwa gade namdidung leune tei ngkap di, pe lunghop dwa gade." 27 Aide RAMPAUBE ne ranggai, "Hangdeu pelane kengkap ge tei dizie, dede Ih cide pelane ngkap zing dilak. 28 Aide ziemne, hangdeu be hap zie nah tinggimdung mui dizie. Ih a kecet de ndulia kedine; Ih caisim lak; Ih cide tei mene talak. 29 Hekün teu kelame nah lakpi pwa kelame kwa siulu eh mina leune pak dizie. Minadung ge hegung gage pak gai zie, kedame hetialwadung ga mra hang zie. Renam leune mta dizie, nah migede cidung ga lungh dailak. 30 Nang cu au kap di delu, nang daipai tei lai? Nang paigie ge teu liede, kecak hetei heta le nkatei ncu mtei liede, nah n miak giak mdi lu liede, mipei ncu hengim keladung de ncu mlai dida. Meliene, penui ncu teitsetdi lai eh bam dida. 31 Cine Ih kehap kwa ge siu, Zion napuidung kemna tedteei mipui ge neraibe de mna eh mra kebam kwa nzwa. Cide au pa hap eh ngngi kecün kecu nzwa. Pa pe ba kezanglwe rang eh, ‘Ainie, ada kehing ge gwang zieda! Mide teiketsetme aidungde ziemne Ih au mnei reureu dida.’"