1 Aide RAMPAUBE sam Jeremiah da kegwang dui kecangh ha,

2 "Peu Judah de haplo; pe namdidung de peu kaudi lo. Penui penui deu ziemne hap eh sah bam dida;

penui Jerusalem ziemne hap reureu bam dida.

3 Judah kedime dui peei kera penui kilame de langgai.

Penui hekwaki ga mie, ge dui ngau luma. Penui pelane teidaulu mene cailigwang;

penui ngngam nah hengam pungdi eh penui peu gum di.

4 Aide ziemne hangdeube rekakti, kedanemene kideube ga tingrui kemakne.

Luh kepumedung ngngam eh penui peudung kezui.

5 Hetipui kecang de pena de luhdung gage pütdi nah penuide gidi, cika tsehei gah kecune.

6 Magede kegah langkiedung ga renaam gadhadung sap nah penui maiserungdung nzwa tingkai ga ngicün bam.

Penui miakdung peta tei ma kedanemene cika tsehei kegah ne."

7 Anui maudung mdu eh anuide mmau liede, RAMPAUBE n zi gade tei beulo.

Kedanemene anui kenlum kegah tadung kiee reureu bam; anui n dage kemau tei dida.

8 Nang Israel Keregui be, keherei kelu tingdau pecu kelikelube,

nang daitei hangdeube gade sangme ge nzwa laino, hegwame ge rwapwa eh zeuziu ge rünne bam kegai nzwa?

9 Daitei nang pe swagah eh kelame ge nzwa dino, mede reugwame ge kelilu kera kengking kegah nzwa?

Nang anui kakga la, RAMPAUBO, nah anui reuga n zi de qu. Anuide püt diso!

10 RAMPAUBE aide minadung aidungde dage rangla: "Penui rwa pwala neula, penui ciciu kecu gade penui pi teu caili lama."

RAMPAUBE au penuide pesui meda. Cu au penui tah kesiade peu nsung luzie nah penui maudung ziemne saja peu zie. 11 RAMPAUBE a dage rang, "Mina aidungde keleu gade makeyibe kie so. 12 Penui mmwang liede, Ih penui kesah kwa kingnei lak nah penui keru ratak nah ketyeipok ratak pwapeu de Ih cidungde a suiyi lak, kedanemene Ih cidungde kingtie, herakum nah rapia le tei nggah dizie."✝

13 Pecai Ih rang, "Oh, RAMPAUBO! Ainie! Caihakecimedung minadung dage rangla, ‘Nnui kingtie ngaulak; nnui ziemne herakum bamlak, kedanemene Ih aipau heni de ga kwak kelu kesangbe peu zie.’" 14 RAMPAUBE a dage rang, "Caihakecimedung a zi gade kecwa sam rangla. Ih penuide langgai ma mede Ih penuide aja gede mede penui dage maranglo peu ma. Dede kecwa mangaudung nah kemtabe penuikatei penui lungdung gade kecwa caihadung penui n dage rangla."✝ 15 Cine RAMPAUBE aide rangla, "Caihakecime a zi gade caiha rangla dede Ih ne langmpet kemakpe aipau deu ga kingtie mede herakum bamlak lie rang kelame, caihakeci aidungde kingtie mede herakum gade gah dizie. 16 Iciu eh penui ne ranggai kebeume de helingpwa Jerusalem puidiki gage kai dizie herakum nah kingtie de ziemne, kedanemene migede penuide kung kera gah dizie, penui naudung, penui napeidung mede penui napuidung, kedanemene penui kesiadung Ih penui dage rui gai zie.

17 Jeremiah, aipau sam de penui dage ranglu: ‘Peu tingmui tingba a miakdui lwalo.

Peu penuide mtak so, kedanemene a mina kemci napui kau mdisüt zie delu,

kedi ge nah yi gai kelak zam ge.

18 Ih luh ga miede, cika kingtie ne teitset kedidung bam!

Ih namdi be ga gwang cai, cika herakum ne teikegai mateeidung bam.

Caihakecime nah cingkume hangdeu be ga rwala nah penui cima.’"

19 Nang Judah de mlai cangsiak di deni? Nang Zion de ngaunghet ni?

Daitei anuide tei keherei zie no anuide tei kengkei kegah ga? Anui kezuyi de regui, dede cika pe keyi gede gah,

nah tei ngkei ting ge ga, dede pielo, cika kehing rünne.

20 RAMPAUBO anui maudung anui paume kemneidung n dage rangla, kedanemene anui ncu renia eh mau dida kecune.

21 Anuide mlai diso! N zi ziemne, n hegwangbam kendu de gage hengam tei diso.

Nsung gailo nah anuide ngngwa samkak de teipang diso.

22 Heleuhdung gu pemi teikemak mamiedung ne tingrui teugwang ni? Mede tinggimdung katei tingrui lang nghung lubui ni?

RAMPAUBE anui Tinggwang nang ne meni? Anui ncu kwabam, kedanemene nang ne ma aidung pelane teigai.