1 RAMPAUBE aide ranggai, "Miecu nah nang Jewme muiteume nah cingku kecingme de ngngwa keladau lidei li ge luilu. 2 Delwe Ben Hinnom Langkam ga Pang kedi Li Kirie kenlüt ga tet pet cu, nah Ih n dage rang lai eh kebam samdung de cikade sah lo. 3 Ranglo, ‘RAMPAUBE sam kingnei lulo, Judah gwangpeidung nah Jerusalem namdi ga kelunghmedung! Reugwame reu RAMPAUBE, Israel Tinggwang, aide rang bam, "Pielo, Ih aipau bam ga kengkap teu gwang lai eh bam dida, nah siu kelu leune kwendung ga cide tung tau zie. 4 Ih aide teigai zie kedanemene minadung acu püt zingdi nah aipau bam de tei hera kedine. Aipau bam gade penui ci kemak keda rabedung dage penui ratakdung tei gai beu zie. Penui, penui paumedung, nah Judah gwangpeidung liede aipau bam gage mau kemakme jaile tei puidi. 5 Penui Baal gu reca bam kecehu bamdung tei lwe mi gage pe napeimedung de ru eh pe dage keru ratakdung teigai, Ih ne aja kaibeu kemakpe mede rang beu kemakpe, mede cide akecet ga nlüt kemakpe.

6 Cide ziemne, pielo, petingba ziedung gwang la dida—aide au RAMPAUBE ne ndugai—aipau bam de de Topheth, Ben Hinnom Langkam de eh qu sita kedi dau, kedanemene cide au giketset langkam dizie. 7 Aipau bam gade Ih ne peu Judah nah Jerusalem mariemdung kemta tei dizie. Ih ne peu kingtie gade penui ngauraumedung dwa gade penuide kau zie nah penuide teitset zie lie peei kelamedung ba gade. Pecai Ih ne penui gu ketsai paudung tinggim ruinedung nah kideu teikuudung dage pwa peu dizie. 8 Pecai Ih ne aipau Jerusalem namdi dede ngkap kedi ge tei dizie nah kengkau ge tei dizie, kedanemene cika kah kegwang leune de keheu dizie nah penui mateeidung leune ziemne kengkau tei zie. 9 Ih penuide peu penui napeidung nah napuidung teih tyei zie; mige ge kecu pe kidabe teih twagwa kebam gade tyei zie nah penui ngauraumedung penui da keherei teu gwang kegai gade nah penuide teitset kera peei kelamedung dade."’

10 Pecai nang ncu ngngwa tet kecumedung miakngau gade lidei li tei pang zie. 11 Nang penui dage rang zie, ‘Reugwame reu RAMPAUBE aide rangla: Ih ma aide gapte aipau medung nah aipau namdi dage tei gai zie—aide RAMPAUBE ne ndugai—Jeremiah ne lidei li de tei msia di eh tei lamlui dai gailak kedi nzwa. Minadung ketsaime de Topheth langkam gage kung zie ketsaime ziemne pebam gah di kemaktane. 12 Ih aipau namdi de Topheth nzwa tei kegai dau ma aide nzwa Ih aipau namdi gage nah cika kelunghmedung dage tei gai zie—aide RAMPAUBE ne ndugai— 13 cine Jerusalem kidung nah Judah gwangpeidung au Topheth nzwa dizie—kidung leune cau game ki pereudung gade mci kemak minadung tinggim hegidung leune de reca nah keda rabedung dage zau reca rui gai.’"✝

14 Pecai Jeremiah Topheth gade tetdi, RAMPAUBE ne pecu caihasam rang kera lang kegai ga. Pa RAMPAUBE kigu ga saplu nah pa mina pelane dage ranggai, 15 "Reugwame reu RAMPAUBE, Israel Tinggwang, aide rangla, ‘Pielo, Ih aipau namdi ga nah cide ga namceudung pelane ga kengkap teu gwang lai eh bam dida Ih cide de renia eh rang kebeu nzwa, kedanemene penui helungbe tak bam nah a samdung kingnei ta kedine.’"