1 RAMPAUBE aide a dage rang, "Mie delwe langcimpai helungpaini ge luilu nah cide n kia gage kailu, dede cide dui gage kai raiso," debeu. 2 RAMPAUBE rang kebeu nzwa Ih helungpaini ge luilu nah Ih cide a kia gage kailu. 3 Pecai RAMPAUBE sam pe kenabe a da gwangdai, rang eh 4 "Nang lui kelu helungpaini de keulu n kia ga kebamde, cu cuhlu delwe Euphrate reuki ga mie lo. Cika tangtsu kepang koiki ge gage cide hebai dilo," dedi. 5 RAMPAUBE ne acu rangkebeu nzwa Ih Perath ga mie cide hebai di. 6 Zie kekiee ge cai RAMPAUBE a dage rang, "Cuhlu delwe Perath ga caili mielo. Cikade helungpaini de keulu Ih ncu hebai lulo kebeude," dedi. 7 Cine Ih Perath* ga caili mie nah Ih kebai gai kedi helungpaini de kui mpetlu, nah ainie cide teimsia dida sia cangsiak dida.

8 Pecai RAMPAUBE sam a da gwang rang eh cu, 9 "RAMPAUBE aide rangla: Ih Judah nah Jerusalem ngang süt eh kela de ainzwa eh ngkap dizie. 10 Judah kemaume aidungde a sam kingnei rau kelame, penui mlung ketak ga tet kelame, hera kedadung caisui eh penuide reca kera nah cidung da keumie kelame, penui aipau helungpaini de nzwa dizie pe keyi kegah de nzwa. 11 Kedanemene paidui mikia ga kang mtip kela nzwa, cinzwa Ih Israelme nah Judahme pelane de peu acu kezui mtip kera teibeu—aide RAMPAUBE ne rang ndu kegai—a minadung tei kera, acu hezi keyi, hetwa, nah herüt teugwang beu kera. Dede penui a sam kingnei luma.

12 Cine nang penui dage sam aide rangbi maisia, ‘RAMPAUBE, Israel Tinggwang, aide rangla: Duibung leune de zau le teipui zie.’ Penui n dage rang zie, ‘Duibung leune de zau le teipui kera anui ci kesang meni?’ 13 Cine penui dage ranglo, ‘RAMPAUBE aide rangla: Pielo, Ih aipau deu ga kelunghme leune de peu zau sak kemie le pui di kera, hegwangmedung David hegwang bam ga kebamme, cingkume, caihakecime nah Jerusalem ga kelunghme leune. 14 Iciu eh Ih hangge ge reu gage kedeu gai zie, mipeidung nah hename ncüt eh—aide RAMPAUBE ne rang ndu kegai—Ih penuide nggia lak mede a lung sialak, nah kengkap gade penuide bang beulak.’"

15 Israelme, RAMPAUBE ranggai beuda. Ngangdi mene, kingnei sünne lu.

16 RAMPAUBE nnui Tinggwang de rütlu pa kemuibe teugwang di kemak dwa,

nah pa peu nnuide tingmui lamlwa gade kaukedi dwage.

Kedanemene nnui kebaa reguila, dede pa heni de tei muiting dizie, kemui mwa ge tei dizie.

17 Cine magade nnui kingnei mecai, Ih akatei hap zie nnui ngang kelade ziemne.

A miak hap bi zie nah miakdui lwa zie, kedanemene RAMPAUBE minadung de hebaang tei kedine.

18 "Hegwangpei nah hegwangpui dage ranglo, ‘N hegwang bam gade nghunglu,

kedanemene kendu peurwa nnai peu gade nghai mie di delu,’ de eh.

19 Negev ga namdidung de ngkui dizie, cide ngkei kera migede gah. Judahme leune de hebaang tei dizie, hebaangme teiciak dizie.

20 N ngauraume tingpeule gade gwang kelabe de pielo.

Pa ne kepeu n minadung dai ga lano, n dade hezu yisüt kecu minadung?

21 Nang n zangme lie cet kela minadung de Tinggwang nreu kedi tei kedidau nang daipai rang lai no?

Aidungde kemna tedteei, mipui kemna dau keteei nzwa nda gwang kera pemdeube de meni?

22 Iciu eh nang n mlung gade rang lubui, ‘Daitei ma aidungde a dage teigai zeu no?’

Cide n bata kesia kekiee ge ziemne mige n lituidung tei hakdi nah ncu teu teidi.

23 Ethiopia ga mina ketiakme ge penui geu pegiak de tei kedi lubui ni, mede kaudauna giakdung tei kedi lubui ni?

Iciucai, nnuikatei kesiabe le nnui zai teibam liede, keyibe tei lubui.

24 Cine Ih penuide tsiurie de hangdeuketsai tingkai ne guipung kela nzwa teizang dizie.

25 Aide Ih nnuide peu dida, Ih kepeu zai de—aide RAMPAUBE ne ndugai—

kedanemene nnui acu nsungta dida nah kecwa de de nlum dida.✝

26 Cide ziemne Ih ne n lituidung gau dizie nah n hengamdung de ngau dizie.

27 Ih nang kemmha de ngau da,

kideutudung ga nah luhdung ga n kemaudung nah helili kecu de,

nah kengkau aidungde Ih ngau da!

Jerusalem, n dade suisiet! Ncu tei mci dailu kera daitie ge zie no?"