1 Pecai reugwame muibe leune nah Kareah napei Johanan, Hoshaiah napei Jezaniah, nah mina keceu gade kedime leune caihakecibe Jeremiah da gwang. 2 Penui pe dage ranggai, "Anui kekie peu n da gwanglo. RAMPAUBE n Tinggwang dade anui bangh kenzeume ziemne kielo kedanemene anui au mina kecamnage lu, nang ngau kebam nzwa. 3 RAMPAUBE n Tinggwang dage anui tet kera lampui nah anui daitei ziebi lia kerane keteu gai beulo." 4 Cine caihakecibe Jeremiah penui dage ranggai, "Ih nnui kwa siulu da. Pielo, nnui kie kegai nzwa Ih RAMPAUBE nnui Tinggwang dage kie zie. RAMPAUBE sam keli kegaibe, Ih nnuide ranglia zie. Ih nnui dade magede hebai dilak." 5 Penui Jeremiah dage ranggai, "RAMPAUBE de peu anui dage zierang kesangbe nah kesamsangbe lulo, magade anui RAMPAUBE n Tinggwang anuide teilo kebeube leune tei meliecai. 6 Cide yi liede mede sia liede, anui RAMPAUBE anui Tinggwang sam mzai zie, anui ncu langgai kebeube de, iciu eh anui RAMPAUBE anui Tinggwang sam mzai keludau anui ziemne yilu kerane."

7 Pecai ziangrei cai, RAMPAUBE sam Jeremiah da gwang. 8 Cine Jeremiah, Kareah napei Johanan nah pecu nzang kela reugwame muibe leune nah mina keceu gade kedime leune de qugai. 9 Pecai pa penui dage ranggai, "Aide RAMPAUBE, Israel Tinggwang, nnui kie eh pe dage acu lang kegaibe, rangla, 10 ‘Magade nnui cailidi nah Judah deudi aide ga lungh cai, iciu lucai Ih nnuide teucuh beuzie nah ngkap dilak; Ih nnuide linggai zie nah nnuide teu mpetdi lak, kedanemene Ih nnui reu gage kengkap kai kegaide teu caili dizie. 11 Babylon gwangpei de hingso, nang hing kebam be de. Pecu hingso—aide RAMPAUBE ne ndugai—kedanemene Ih ncu ngngwa la ncu gum beu kerane nah ncu pe ba gade kelibeu kerane. 12 Ih nnuide nggia beuzie. Ih nnuide ngaunggia zie, nah Ih nnuide nnui deu ga ngngwa cailigwang beuzie. 13 Dede magade nnui, "Anui hangdeu aika lungh lak" de eh rang dicai—magade nang a sam kingnei mecai, RAMPAUBE n Tinggwang sam. 14 Magade nnui, "Lak! Anui Egypt deu ga mie zie, hereu gede ngau kelak deu ga, telui kwa siu kelak ga, nah anui taktyei ziemne mzeu dai di kelak ga. Anui cika lungh zie," de eh rang cai. 15 RAMPAUBE sam kingneilu, bangh kenzeu Judahme. Tinggim reugwame reu RAMPAUBE, Israel Tinggwang, aide rangla, ‘Magade nnui Egypt ga mie kesang zie liecai, cika mie eh lungh kerane, 16 iciucai nnui hing kela kingtie de nnuide Egypt deu gade gwakah luzie. Nnui hing kela herakum de nnuide Egypt ga zui mie zie, nah cikade nnui tsai dizie. 17 Cine Egypt ga lungh kera mie kecume leune kingtie, herakum, mede mateei gade tsai zie. Penui migede ringlu lak, Ih penui dage kengkap teugwang kegai gade migede pakti gailak.

18 Kedanemene tinggim reugwame reu RAMPAUBE, Israel Tinggwang, aide rangla: Jerusalem ga lungh kebamme dage a rata nah lunghop rui kegai nzwa, ci kesiakke nnui Egypt deu ga miecai nnui reuga a lunghop ruigai zie. Nnuide reset kegai ge nah nnui ngau kehing ge dizie, nnui reset samdung pung kecume ge dizie, nah ngau kemneeu ge dizie, nah nnui heni aide ngau si dailak.’" 19 Pecai Jeremiah rang sigai, "RAMPAUBE nnui ziemne ranggai da—bangh kenzeu Judahme. Egypt ga mie so! Nnuide aide Ih rang kegai nnui ci ncigi bam. 20 Kedanemene nnui nnui katei de cwa msiasüt dida, nnui acu RAMPAUBE nnui Tinggwang da langgai eh aide ranglo kegai dau, ‘Anui ziemne RAMPAUBE anui Tinggwang dade kielo. RAMPAUBE anui Tinggwang rang kebeu leune, anui dage ranglo, nah anui cide tei zie.’ 21 Kedanemene Ih henai nnuide ranglia gai dida, dede nnui RAMPAUBE n Tinggwang kwa kingnei ma mede pa a dage nnui ziemne langgai kegai magede mzai ma. 22 Cine cu, nnui mie lungh keneu cipau Egyptme deu gade kingtie, herakum, nah mateei gade tsai kera ci ncigi lu."