1 Cipau tingdau—aide RAMPAUBE ndu kegai—penui Judah gwangpeidung, kedime, cingkume nah caihakecime, nah Jerusalem ga kelunghme radung herau gade keu mpet dizie. 2 Penui cidungde naimiak, hekei nah tingkam ga hegidung baa gage keu zangra gai zie; cidungde de minadung hung, penui gwatei, ma keteu nah reca gwang. Penui radungde hekwa mede kung dailak. Penui au kideu reu ga mateu nzwa bam dizie. 3 Heleuh kesiabe aide gade baang kelume pelane, Ih penuide gwakedi bam leune gade baangkelume, penui penui ziemne kering meliene ketsai kedet luzie—aide Reugwame reu RAMPAUBE ndugai.✝

4 Cine penui da ranglo, ‘RAMPAUBE aide rangzeu: Mige kaudi ge cuh dailu la meni? Mige gahdi ge cailigwang kera teila meni?

5 Daitei sui Jerusalemmedung, kenlum kegah gage nreu gaidi no?

Penui mamiedungde ping pwabam nah a da nreu cailigwang raula.

6 Ih a lung kai eh kingnei da, dede penui petaube rang ma; migede pe kesiadung ziemne helung sia ma,

migede, "Ih dai tei di no?" de eh keteu ma. Penui pelane

hekwen ge hereu gage pak kegai nzwa penui mie keneu ga miela.

7 Tinggim ga duirui kecang de peting siakpe ci bamla; nah cinzwa eh tamhau, tanghaine, nah duiruine dungde.

Penui peting siakdau limhui bamla, dede a minadung au RAMPAUBE zaidung cima.

8 Nnui dainzwa, "Anui au maci, RAMPAUBE zai anui da bam kecune," de eh ranglu lai?

Kesang, pielo! Laisiu keraume mide kecwa kerau tiedung ne mide kecwa tatei dida.

9 Ma kecime ngngam dizie. Penuide kebwakdi nah keu dida.

Ainie! Penui RAMPAUBE sam mlai dida, cine penui maci dai kemmi ge bam no?

10 Cine Ih penui naudung de kedame de peu zie, nah penui luhdung pwa kedame de peu dizie,

kedanemene ceutu gade ditube kecang, penui pelane de makesang kemak giedung hengim la! Caihakecime gade gwang cingkume kecang pelane kenret ta teila dida.

11 Penui a mina zamdung mana ge teingkei beu,

"Kezuyi, Kezuyi," de rang kezuyi gah liede.✝

12 Penui kemneudung tei kedine ngngam lani? Penui ngngam ma; penui dainzwa ge mizu gie dila bi cima! Cine penuide kau kedime kakga kau dizie; penuide saja kepeu dau, penuide teu henah dizie, Ih RAMPAUBE rangla.

13 Ih penuide keugi ciak dizie—aide RAMPAUBE ndu gail—kubebang ga kubetsi bamlak, mede tangzüttsibang ga tangzüttsi bamlak. Penei regui dizie, nah Ih penuide peu kebeudung de gah dizie.

14 Judahme hangge ge dage rang eh, Anui daitei aika ntum bam no? Gwang mbaulu; anui riekelu namdi mie delwe cika tsai zingde bamdi go.

Kedanemene RAMPAUBE anui Tinggwang anuide tei zingde dizie. Pa anuide peu heiring sak zie, anui pe dage kemau teigai kedine.

15 Anui lungciep regui bam, dede makeyi gede bamlak.

Anui tei kengkei tingge regui bam, dede pielo, ngau kehing bam dizie.

16 Dan namdi gade ngauraume hekwendung kemra kwade siu dida. Penui hekwen kengkieng dungde mlai gaige kideu pelane keswak dila.

Kedanemene penui gwang eh hangdeube nah pe mabamdung ngkap dizie, Jerusalem namdi nah cika lungh kebamme de.

17 Cine pielo, Ih nnui kakgage henei langgai la, nnui kemeu gai kelak henei kerabedung.

Cidungde nnuide nsau zie—aide RAMPAUBE ndu gai.’"

18 A lungrei au penli gah, nah a mlung mateei bam dida.

19 Ainie! Kideu kemdei gade a mina napui kemra kwa siu da! RAMPAUBE Zion ga gah ni?

Pe hegwangpei cika bam meda ni? Iciucai daitei penui mamie tei kelube nah pemi kegah sangme rabedung le a rata tei no?

20 Minadung mragai, "Hepwak ting cang dida, luhlüt cang luda, dede anuide kelilu ma."

21 A mina napui de tei rezam kedine acu de rezam dida. A mina napui dage ma siasüt kecu tei kegaidung ziemne Ih hap nah a lung sia dida.

22 Gilead cuikui ga daru gah ni? Mide teingkei kerame gah ni?

Daitei a mina napui de teingkei beu meno?