1 Josiah napei Jehoiakim Judah gwangpei hegwang tei kebam dau RAMPAUBE dade Jeremiah da sam ainzwa rang gwang, 2 "Rekabme kibaume da miecu nah penuide resiulo. Pecai penuide a kiga ngngwa gwanglu, cika kibung ge kebam gage, nah penuide sak kera zau peulo." 3 Cine Ih Habazziniah capei Jeremiah napei Jaazaniah nah pe sinamedung, nah pe napeidung, nah Rekab kibaume pelane de ngngwalu. 4 Ih penuide RAMPAUBE ki gage, Igdaliah napei Hanan, pa Tinggwang minabe, pe napeime kibung gage ngngwa gwanglu. Kibung aidungde muiteume kibung taiga bam, cidungde Shallum napei Maaseiah kirie kekwabe kibung peureu ga bam. 5 Pecai Ih Rekabme dwa gage hekwakdung nah hepiakdung zau le kai puilu eh kaibeu nah penui dade, "Zau sak gai lulo," debeu 6 Dede penui ranggai, "Anui au zau sak lak, kedanemene anui paume, Rekab napei Jonadab, anui dage aja kaibeu, ‘Nnui mede nnui leuhme kelungta zau sak so. 7 Delwe, ki gede tei so, maleuh ge de ling so, mede kubetsibang gede ling so; aide nnui ziemne ma. Kedanemene nnui paiki ga nnui teilung lungh kerabe, iciu eh nnui sangme ge tei eh lung kebam hangdeu ga tingbazie kekiee ge lunghlu kerane.’ 8 Anui Rekab napei Jonadab sam mzai luda, anui pau, anuide pa aja peu kebeu leune, anui, anui naudung, anui napeimedung, nah anui napuimedung, anui tingdau zau sak kelak de. 9 Anui madaude lungh kera ki tei lak, nah kubeluh gede, mede heleuhtsi gede anui da bamlak. 10 Anui paikidung ga lungh da nah anui pau Jonadab anui dage aja kai kebeu leune anui tei mzai nah tei gaida. 11 Dede Babylon gwangpei Nebuchadnezzar penui deu gwaketang kecudau, anui hangge ge dade, ‘Gwanglu, anui Babylonme nah Syriame reugwame dade paklu kerane Jerusalem ga miedi go.’ Cine anui Jerusalem ga lungh bamdi."

12 Pecai RAMPAUBE sam Jeremiah dage rang gwang, 13 "Reugwame reu RAMPAUBE, Israel Tinggwang, aide rangzeu, ‘Miecu nah Judahme de nah Jerusalem ga lungh kebamme dage rangbeulu, "Ledeu kebeude nnui luu lakni mede a samdung mzai lakni?—aide RAMPAUBE ne ndugai. 14 Rekab napei Jonadab pe aja pe namedung de peu kebeu, zau saklak kecu, henai kecangde aide tei mzaibam. Penui penui paume ajadung mzailu. Dede Ih au nnui dage rang eh gwang, dede nnui au a sam mzai ma. 15 Ih nnui dage a kilamedung, caihakecimedung de langgai. Ih penuide aide peu rang bi beu kerane langgai, ‘Hangge gede peu penui kesia lampui pütdi lu nah makeyi tadung teilu; peu migede de hera kedadung cai sui so nah penuide reca so. Meliene, Ih nnuide nah nnui paume de peu kecu deu ga cailigwang lu.’ Dede nnui a kwa kingneilu ma nah a dage nnui lung kai luma. 16 Rekab napei Jonadab leuhme penui paume ajadung pane peu kebeudung de mzailu, dede mina aidungde a kwa kingnei raudi."’ 17 Cine RAMPAUBE, tinggim reugwame reu Tinggwang nah Israel Tinggwang, aide rangla, ‘Pielo, Ih Judah reuga nah Jerusalem ga lungh kebamme reu ga, Ih rang kebeu kekap pelane teugwanggai zieda, kedanemene Ih penuide ranggai da, dede penui kingnei ma; Ih penuide qugai, dede penui keli ma.’"

18 Jeremiah Rekabme pautsa dage ranggai, "Tinggim reugwame reu RAMPAUBE, Israel Tinggwang, aide ranggai: Nnui nnui pau Jonadab ajadung kingneilu nah ci pelane tei mzai luda—pa nnuide aja kai kebeu pelane nnui tei mzai luda— 19 cine tinggim reugwame reu RAMPAUBE, Israel Tinggwang, aide ranggai, ‘Rekab napei Jonadab leuhme mipeina ge a gwatei kerane mige lamui zie.’"