1 RAMPAUBE sam aide caihakecibe Jeremiah da heleuhdung ziemne gwang. 2 Egyptme ziemne: "Aide Egypt gwangpei, Euphrate Reuki taiga Carchemish namdi ga kebam, Pharaoh Necho reugwame ha. Reugwame aidungde de Babylon gwangpei Nebuchadnezzar ne ngam kelume, Josiah napei Jehoiakim Judah ga hegwang tei kelu mmi mdai bekum:

3 Egypt reugwa kedimedung sahgai: Hegeudung keceu nah kedi be keu mteilu, nah hereu regi kera tetpet gailu.

4 Hekwendung net telei lu; hekwen reu ga bamlu nah nnui peurwadung kailu eh sapbia lu;

hengei muidung kereei lu nah nnui reunet kailu.

5 Ih aikade daipai ngau zeu no? Penui kengngi le pui eh pak tet dida, kedanemene penui reugwame de ngam kedine.

Penui de kelilu kera ziemne pakla dida, nah penui caili nreu pie meda. Kengngi le pelane twagwa pui bam kedi, RAMPAUBE aide ndugai,

6 Paksüt lade pak swa gailak, nah reugwamedung mbai gailak.

Tingtünle de penui pi nsui nah Euphrate Reuki kungga nlui mie.

7 Nile nzwa hu kecu aide cau no, pe reuki dui nswak nzwa kebam de?

8 Egypt Nile nzwa eh hucuh, kereuki duidung nswak kebam nzwa.

Egypt rang eh, ‘Ih cuh zie nah Ih kideube de gum luzie. Ih namdidung nah cika kelunghme de ngkap dizie.

9 Hekwendung hangcu. Nnui hekwen bagidung, nnui rata lu. Peu reugwamedung de tetpet gai cu,

Cush nah Put, hegeu pung kecime, nah Ludim ga mina lakpi pwa kecimedung.’

10 Cipaunai Tinggim reugwame reu RAMPAUBE Tinggwang hekum kepeei benai zie, nah pa pekatei pe ngauraume de hekum peei zie.

Kingtie le ngkap gwang zie nah mnung luzie. Penui jai tei pui kelu cide sak zie. Kedanemene Tinggim reugwame reu RAMPAUBE Tinggwang

dage kideu tingtünle Euphrate reuki taiga de ratak ge teigai zielu.✝

11 Relei kemci Egypt napoe, Gilead ga hang cu delwe cikade reheu keulu.

Nnui kai kebam reheu pelane kemta ge dida. Nnuide teingkei kera kette gahda.

12 Heleuhdung nnui ngngam ha siulu da. Kideube nnui kehap kwane pui dida,

kedanemene reugwame hangge ne hangge pi mrapgai delwe penai hangna ngngwa kaudi."

13 Babylon gwangpei Nebuchadnezzar Egypt deu gwaketang kera kegwang dau, Rampaube sam aide caihakecibe Jeremiah dage ranggai:

14 "Egypt gage sahgai beulu, nah Migdol, Memphis, nah Tahpanhes namdi gage sah ndu gai beulu.

‘Nnui bam keulu nah nnuikatei nnuide mteilu, kedanemene nnui tai twagwa kebamdung de kingtie le ngkapdi zielu.’

15 Daitei nnui kengkieng reugwamedung hangdeu ga nkumpung bam dino? Penui cuhsap gailak ta, kedanemene Ih, Rampaube, penuide hangdeu gage cwakgaidi delu.

16 Pa reugwame kekiee gede peu kaudi. Reugwame hangge reu hangge ge kau mie. Penui hangge ge dage ranggai, ‘Cuhlu. Kilung ga gwang cu go.

Anui ramme, anui paupai ram ga cailigwang cu go. Anuide dap ngkau kebam kingtie aide dade pak lugo.’

17 Penui cikade sah ndugai, "Egypt gwangpei Pharaoh au pekwa kekiee gwale sima, pa peu ziuyide mzia tet dida!"

18 Hegwangpei, pe zi Tinggim reugwame reu RAMPAUBE aide rang ndu gai, Ih ring kebamtane,

mikangge Tabor deutu nah jaaidi taiga Carmel deutu nzwa gwang zie.

19 Nnuikatei nnui niadung langgi kedime tei kera mtei lulo, nnui Egypt ga lungh kebammedung.

Kedanemene Memphis kemta ge dizie, cide ngkap kedi ge dizie nah cika migede lunghta dizie.

20 Egypt au hezuyisüt kecu ketumna ge, dede nkeu kela kauge tingtünle de gwangla dida. Cide au gwangla dida.

21 Liikelu reugwamedung penui kakga ketumseu pelui keyibedung nzwa bam, dede penui liede nreutet dizie, nah paktet dizie.

Penui sap ngkwa gailak, kedanemene kengkap tingba penuide mcau eh gwangla dida, penuide saja peu kera tingge.

22 Egypt henei ge nzwa pekwa kwa eh bwa tet dida, kedanemene penui ngauraume penuide mcau kera gwaketang la kedine.

Tsingbang kebime nzwa ngauraume mreu pwalwe penui lam tet gwangla dida.

23 Aide RAMPAUBE ndu kegai, hegungdung bi ngkau dizie, gungpang sütbam liede.

Kedanemene ngauraume peikap gai kelak tangriemdung swade kiee zielu.

24 Egypt napuime de tei hengam dizie. Penuide tingtünle kebam minadung ba gage peu dizie."

25 Tinggim reugwame reu RAMPAUBE, Israel Tinggwang, rangzeu, "Pielo, Ih Thebes ga kebam Amon, Pharaoh, Egypt nah penui rabedung de penui gwangpeime Pharaoh, nah penuide nlum kecumedung de saja peu lauda. 26 Ih penuide, penuide teitset neu eh peei kelame, nah Babylon gwangpei Nebuchadnezzar nah pe kilamedung ba gage peu dizie. Ainzwa kelu caine Egypt ga ndaa nzwa mina lungh dai zie, aide RAMPAUBE ndugai.

27 Dede nang, a kilabe Jacob, ngngi diso. Israel, nnui suisia di helo, kedanemene pielo, Ih nnuide kemdei gade nah n leuhme hebaang tei kela deu gade ngngwa gwang daibeu lau delu. Pecai Jacob cailigwang luzie, kezuyi ngau luzie, nah kwak luzie, nah pecu migede keheu kera bam lak. 28 Nang, a kilabe Jacob, ngngi diso, aide Rampaube ndugai, kedanemene Ih ncu ngngwa lalu, cine Ih nnui de daipau heleuhdung gage teizangra gaibi cidungde de ngkap cangsiak dizie . Dede Ih nnuide ngkap cangsiak dilak. Dede Ih nnuide kesangbe gade ledeu beuzie nah saja peu mene talak."