1 Pecai RAMPAUBE sam a da gwang dai eh rang, 2 Pa a dage marang, "Nkatei n ziemne henau teiso, nah heni aikade nkatei n ziemne n napeidung mede n napuidung bamso. 3 Kedanemene RAMPAUBE heni aide gade mna kelu napeidung nah napuidung, penuide telakpung kelu puidung, nah mipeidung aipau deu gage penuide mna kera tei kegaimedung dage aide rangla, 4 ‘Penui ketsai mateei gade tsai zie. Penuide hei mede kunglak. Penui hangdeu ga niara nzwa zie. Kedanemene penui kingtie nah herakum gade kekambe dizie, nah penui paaudung au tinggim ga nruine nah kideu ga teikuudung taktyei tei dizie.’

5 Kedanemene RAMPAUBE sam a da gwang eh rang, ‘Hei eh kebam kiga lütso. Penui ziemne hei mede kenggia kecu keulia kera mieso, kedanemene a kezuyi, keku nah ngaugia mina aidungde dade keu tetdi delu, aide RAMPAUBE ne rang ndu kegai. 6 Kedime de nah keceume de aipau deu gade tsai zie. Penuide kunglak nah migede penui ziemne hei lak mede penui ziemne migede pekatei penuide dang mede pe lungrei liagai kerabe penui peu tai lak. 7 Ketsaime de hei kebamme de tei relui gai kera migede ketyeipok peu lak nah migede ziune kelu piak pwa pe pei mede pe pui de peu lak. 8 Nnui hengyi kebam ki gega penuide ngngwa bam eh tyei mede sak kera mie lak.’ 9 Kedanemene reugwame reu RAMPAUBE, Israel Tinggwang, aide rangla, ‘N miak kena dwaga pielo nnui tingdau nah aipau heni ga a suiyi kwa nah misuikeyi kwa, lakciupei kwa nah lakciupui kwa penli tei dizie da.’✝

10 Cipaucai nang sam aidung pelane mina aidungde dage pau beuzie, nah penui ncu rangzie, ‘Daitei RAMPAUBE anuide renia eh kengkap kedi aidung pelane kaino? Anui RAMPAUBE Tinggwang dage daipai kesia ge nah kemau ge teigai no?’ 11 Cine penui dage ranglo, ‘Kedanemene nnui paumedung acu gi kedine—aide RAMPAUBE ne rang ndugai—nah penui hera kedadung da mie penuide reca nah penui da keumie. Penui acu gidi nah a zai kainzeu ma. 12 Dede nnui nnuikatei de nnui paume swade kesiadung teusi gwang, kedanemene pielo, hangge ge kecu pe mlung kesia ketak ga tetla, cika migede a kwa kingnei ma. 13 Cine Ih nnuide hangdeu aikade kelienpwa nnui cikemak deu gage kai dizie, nnui mede nnui paumedung cikemak, nah nnui cika tingmui tingba hera kedadung de reca zie, kedanemene Ih nnuide magede ngha lak.’

14 Cine, ainie, tingbaziedung gwang lada—aide RAMPAUBE ne ndugai—cidau, ‘RAMPAUBE ring kela nzwa, Egypt deu gade Israelme de ngngwa mpet kebeube,’ de eh rangsi ta dizie, 15 dede, ‘RAMPAUBE ringkela nzwa tingpeule bie deu gade nah penuide teizang kegaibe deu gade Israelme de ngngwa cuh kebeube.’ Kedanemene Ih penui paume de peu kedibe deu de ga penuide ngngwa cailigwang beuzie.

16 Ainie! Ih heka keteime kekiee ge de gwang mina aidungde de tui lulo langgaila—aide RAMPAUBE ne ndugai—penui heka tui kela nzwa Judah minadung de tui mpet zie. Aipaucai Ih rehume kekieege de langgai zie iciu eh penui penuide lamlwatu leune ga peei zie nah kideutudung ga nah tsupop koikidung ga. 17 Kedanemene a miak au penui lampui leune ga la; a dwa gade penuide hebai gailak. Penui sietdung de a miak dwa gade hebai gailak. 18 Ih keraibe penui sietdung de nah kemau ziemne ci kena kieege peu caili zie. Penui luneu kemak rabe miedung teu a deu tei hera, nah penui a magum de luneu kemak rabedung le teipui kedine."

19 RAMPAUBO, nang a kengkieng be nah a kemsiube, kengi tingdau acu gum kwak kebeube.

Kideu penlidung gade heleuhdung n da gwang eh rang zie, "Kesangbe anui paumedung mide kecwa de gumlu.

Penui au mrwa; penui da gie kecu gah.✝

20 Mina penuikatei penui ziemne rabedung tei lani? Dede cidung au rabedung ma."

21 Cine pielo! Ih penuide peu cilu kera aipau tingga tei gai zie, Ih penuide peu a ba nah a kengkieng de cilu kera tei gai zie,

iciu eh a zi au RAMPAUBE lie kecu penui ci luzie.