1 Egypt deu ga lungh kebam Judeame, Migdol, Tahpanhes, Memphis, nah deudi tingbang lebie Egypt Nreule lungh kebamme ziemne Jeremiah da sam gwang: 2 "Tinggim reugwame reu RAMPAUBE, Israel Tinggwang, ainzwa ranggai, ‘Ih Jerusalem ga nah Judah namdidung ga kengkap teugwang kegai nnui ngauda. Pielo, penui au ngkap dida. Cika lungh kera migede gah. 3 Kedanemene penui hera kedadung dage keru ratak tei beu eh kemau tadung tei eh a rata tei kegaine. Hera aidungde penui katei penui, mede nnui, mede nnui paume liede cikemak rabedung.’ 4 Cine Ih mtakdi mene a kilame caihakecimedung de penui dage langgai. Ih penuide aide rang kerane langgai, ‘Ih ngkau kela kesia tah aidungde teisi talo.’ 5 Dede a minadung kingnei ma. Penui a sam kingnei ma nah hera kedadung dage perim kehengui ru kecu kemau tah gade nreu dima. 6 Cine a lunghop nah a rata Judah namdidung nah Jerusalem puidikidung reu gage ruigai nah mi ru gai. Cine penui mta mrwa nah kengkap dida, cu tingga kebam nzwa.’ 7 Cine cu RAMPAUBE, tinggim reugwame reu Tinggwang nah Israel Tinggwang, aide rangla, ‘Nnui katei nnui dage daitei kemau kedi teigai bamno? Judahme kakgade daitei nnui katei nnuide teu ntsam di zeuno, mipeidung nah mipuidung, hename nah ngienadung? Nnui dade bangh kenzeu migede bamlak. 8 Nnui bata kemaudung de le nnui a rata teidi, Egypt deu ga hera kedadung dage perim kehengui ru kegai gade, nnui lungh kera mie kecu deu gade. Nnuide ngkapdi kerane nnui cika mie, iciu eh nnui reset ge teidi kerane nah kideu ga heleuhdung kakga hengam teidi kerane. 9 Nnui nnui paume nah Judah gwangpeidung nah penui naudung kemau ketei de nsungta di deni? Nnui nnuikatei nah nnui naudung Judah deu ga nah Jerusalem puidikidung ga kemau ketei de nsungta di deni? 10 Cu kecangde, penui hena luma. Ih penui dage nah penui paume dage kai kebeu a zaidung de herüt peu ma, nah penui cide ga tet ma.’

11 Cine tinggim reugwame reu RAMPAUBE, Israel Tinggwang, aide rangla, ‘Pielo, Ih nnuida kengkap teugwanggai zie da nah Judahme pelane de ngkap dizie. 12 Kedanemene Judah ga bangh kenzeume Egypt ga mie lungh zielie tetpet kedime de Ih keuteu dizie. Ih aide peu penui pelane de Egypt deu gade ngkap di kerane teigai zie. Penui kingtie nah herakum gade kau dizie. Keceu gade kedime pelane kingtie nah herakum gade ngkap dizie. Penui tsai dizie nah penuide teu sampet zie, reset gai zie, hengam tei zie, nah ngau kehing ge tei dizie. 13 Kedanemene Ih Jerusalem de kingtie, herakum, nah mateei le saja peu kecu nzwa Egypt ga lungh kebamme de de cikesiak ge saja peu zie, 14 cine Egypt ga lungh kera mie kedi Judah ga mina bangh kenzeume migede pak gailak, mede ringlu lak mede Judah deu ga cailigwang gailak, penui cailigwang eh lungh keneu deu ga; nah cikade pak kelume rünne gwale penui migede cailigwang gailak.’"

15 Pecai Judeame leune penui naudung hera kedadung de perim kehengui rugai kecu ci kecume, nah mipuidung hemaa maadi ga kebamme, nah mina pelane ngkangle nah nreule Egypt ga lungh kebamme leune, Jeremiah sam keligai. 16 Penui ranggai, "RAMPAUBE zi gade nang anui dage sam rang kegaide, anui n sam kingnei lak. 17 Kedanemene anui rang kegaidung de anui tei bi zielu, tinggim gwangpui dage perim kehengui ru gai zie nah zau reca ruigai zie, anui, anui paume, anui hegwangmedung, nah anui muiteumedung Judah namdidung nah Jerusalem puidikidung gade tei kegaide. Iciu lucai anui taktyei kekiee ge ngau luzie nah lunghyi luzie, kengkap gede dau di mezing eh. 18 Anui aidungde tei ta kedidau, tinggim gwangpui dage perim kehengui ratak teigai mtakdi ge nah zau reca rui gai beu ta kedidau, anui pelane ma gah eh keherei di nah kingtie nah herakum gade tsaidi." 19 Mipui be ranggai, "Anui tinggim gwangpui dage perim kehengui ru gaibeu kebamdau nah zau reca rui gaibeu kebamdau, anui ma aidungde tei kebam anui nahpeime sui lungning gade meni, pe mie ziemne tangkudung keteide nah zau reca pe dage rui kegaide?"

20 Pecai Jeremiah mina pelane dage ranggai, mipeidung de nah mipuidung de, nah pe sam keli kegai pelane dage, pa ranggai, 21 "Nnui Judah namdidung ga nah Jerusalem puidikidung ga perim kehengui ru kegaide RAMPAUBE nsung bam meni, nnui nah nnui paume, nnui hegwangmedung nah nnui muiteumedung, nah cika lungh kebammedung? Kedanemene RAMPAUBE aide nsung lala; aide pelung ga bam. 22 Pecai pa cidungde lialu tadi, nnui kemau tahdung ziemne, nnui kemneeu tahdung tei kedi de ziemne. Pecai nnui deu gi kedi deu ge di, ngau kehing ge, nah reset ge cine cu kecangde cika migede lungh ma. 23 Kedanemene nnui perim kehengui ru kegai ziemne nah RAMPAUBE dage kemau tei kegai ziemne, nah pe sam, pe hezai, pe ajadung, mede pe samkak kelu hezaidung de mzailu kemak ziemne, kengkap aide henai nnuida gwang dida."

24 Pecai Jeremiah mina leune nah mipui leune dage ranggai, "RAMPAUBE sam kingneilu, Egypt deu ga kebam Judahme leune. 25 Tinggim reugwame reu RAMPAUBE, Israel Tinggwang, aide rangla, ‘Nnui nah nnui naudung nnui muidung le rang dida nah nnui ba le nnui rang kegaidung de tei dida, "Anui tinggim gwangpui de reca kera anui sampetdung de teigai bizie, pe dage zau reca ruigai beu kera." Cu nnui sampetdung de teigai cu; cidungde teigai cu.’ 26 Ciziemne, RAMPAUBE sam siulu, Egypt deu ga lungh kebam Judahme leune, ‘Pielo, Ih a kedi zi gade sampet gaila, de eh RAMPAUBE ranggai. Egypt deu leune ga Judahme keheibe mui gade peu a zi qu si lakta, nnui cu, "RAMPAUBE lungh kebamtane," de eh rang kecume. 27 Pielo, Ih penuide peu ngkapti kerane gwale yilu kerane pie bam ma. Egypt deu ga Judahme leune de kingtie nah herakum le ngkap ciakdi kemaktane ngkap zie. 28 Pecai Egypt deu gade kingtie gade tsailu kemakne Judah deu ga cailigwang zie, penui mina kecamnage. Cine Judah ga mina bangh kenzeume Egypt deu ga lungh kera mie kecume cau be sam sapbam bi kecu ci luzie, agu mi penui gu bi. 29 Aide nnui ziemne marengei ge zie, aide RAMPAUBE ne ndugai, Ih heni aide gade nnuide renia kecude, iciu eh a samdung nnui da kengkap teugwang beu bi kerade nnui cilu kerane.’ 30 RAMPAUBE aide rangla, ‘Pielo, Ih Egypt gwangpei Pharaoh Hophra de pe ngauraume nah pecu teitset dizie lie eh peei kelame ba gage kai dizie da. Aide Ih Judah gwangpei Zedekiah de Babylon gwangpei Nebuchadnezzar, pe ngauraube pecu teitset dizie lie peei kelabe ba gage kai kedi de nzwa zie.’"