1 RAMPAUBE aide ranggai: Pielo, Ih Babylonme reuga kengkap tingkai ge teugwang lai zeu

nah Leb Kamai ga lungh kebamme da.

2 Ih sangmedung de Babylon gage langgai dizie. Penui pecu teizang dizie nah pe deu teimsia dizie,

kedanemene teikemsia tingba benai penui pecu twagwa kebam leune gade ketang kera gwang zie.

3 Lakpi kepwame de penui lakpidung gaa kera ting peuso; peu penuide reunet kaiso.

Pe rehangmedung de mbaibeu so; pe reugwame pelane de teingkap ciak de dilu.

4 Kedanemene mina rezam kedidung au Chaldeame deu ga kaumie zie; tsai kedimedung pe puidikidung ga kaumie zie.

5 Kedanemene Israel penai Judah de penui Tinggwang Tinggim reugwame reu RAMPAUBE gi dima,

penui deu ga au Israel Kemci Tinggwang dage hetakesia ketei le pui bam liede.

6 Israel nah Judah ga minadung nnui Babylon dade paklu; peu hangge gede pekatei pecu kelilu. Pemau ziemne nnuide peu ngkap diso.

Kedanemene cu au RAMPAUBE hekum kepeei ting. Pa ngaulu kebui nsam gade RAMPAUBE pecu saja peu zie.✝

7 RAMPAUBE ba gade Babylon au kideu pelane de tei mie di kela kecak piak ge;

heleuhdung pe zau saklu nah kemieme nzwa dila.*

8 Babylon kau zette dizie nah ngkap dizie.

Pe ziemne haplu! Pa teei kebam ziemne reheu peu beulu; pa yi ngkei di lubui.*

9 Cika sangme lungh kebamdung rangdi, ‘Anui Babylon de peu yi ngkei luneu lie, dede pa au yi ngkeilu meda. Anui pelane pecu pütdi eh

anui deu gage tetgai digo. Kedanemene pe mau tinggimdung ga hang cang dida; cide hemwadung ga cuh eh ngkwa bam dida.✝

10 Anui mau kemak de RAMPAUBE ndugai dida. Gwanglu, Zion ga mie ranggo

RAMPAUBE anui Tinggwang batadung de.’

11 Lakpitsidung tui nzaulu delwe hegeudung de keu cuhlu.

RAMPAUBE Medes gwangpei de peu Babylon de ngkapti kera pe lung teigai bam dida.

Aide RAMPAUBE hekum kepeei, pe kerecaki ngkap kedi ziemne hekum kepeei ge zie.

12 Babylonme kirie reu gage pailim ge keu cuhlu; reketme kaisilu; kekwame kailu; gwaketang kera mteilu;

kedanemene Babylon ga lungh kebamme ziemne RAMPAUBE pa rang kegaide teicang zielu.

13 Nnui minadung receunadung kekieege taiga lungh kebamme, nnui minadung mabamdung bam eh mahei kebamme,

nnui gu penli gwang cang bamda. Nnui teilung ria de dang ndui dida.✝

14 Reugwame reu RAMPAUBE pe zi teu sampet gai, ‘Ih nnuide tangriemdung nzwa mina le teipui beu zie,

nah penui reutak kwa n dage sah gaizie.’

15 Pa pe kengkieng le kideube teilu; pa pe maci le kideube de damgai.

Pe kecikecet le tinggimdung tei mdilu.

16 Pa mrung kegaidau, cika tinggimdung gade duidung mra dila, kedanemene pa kideu penli gade hemwa keu cuhla.

Pa tingrui ziemne tingkehepik teigai nah pe kehekwakidung gade tingkai langmpet gaila.

17 Mileune de mang dida nah maci gah da. Hegeuta ketei leune de pa reca kela dene hengam tei dida.

Kedanemene pe miedung au kenret, nah penui da keringria gah.

18 Mamiedung au kemta ge, mlai kerabe ge; penuide saja kebeu tingdau penuide ngkap dizie.

19 Dede Tinggwang, Jacob mpaube, au cidungde nzwa ma, kedanemene pa au maleune tei kegaibe. Israel leuh au pe minadung;

Pe zi au Reugwame reu RAMPAUBE.

20 RAMPAUBE rangla, "Babylon, nang au a reugwa geuteisang, a reugwa ziemne reunet.

Ncu ngngwa Ih heleuhdung de gwaketang nah hegwangramdung de ngkap zie.

21 Ih ncu ngngwa hekwendung nah keteumedung de tei kecai dizie; Ih ncu ngngwa bagidung nah cidungde keteume de tei kecai dizie.

22 Ih ncu ngngwa mipei nah mipui ketket de tei takcai dizie; Ih ncu ngngwa kecingme nah hename de tei takcai dizie.

Ih ncu ngngwa rehangmedung nah relei kemcimedung de tei takcai dizie.

23 Ih ncu ngngwa meurün kekwame nah pe kauhaudung de tei takcai dizie; Ih ncu ngngwa luh kepume nah pe zangmedung de tei takcai dizie.

Ih ncu ngngwa deuceudibe nah kedimedung de tei takcai dizie.

24 RAMPAUBE rangla, "N miakngau gade Ih Babylon nah Chaldea ga lunghkebam pelane de penui Zion gade

kesia tah tei kedi leune ziemne saja peu zie, aide RAMPAUBE ndugai.

25 Pielo, Ih ncu renia bam, kengkap lamlwatu, aide RAMPAUBE ndugai, kideu pelane de ngkap kedibe.

Ih a ba nzang pet ncu keraklwe tsura reu gade kela nghung dizie,

nah ncu lamlwa ru kedi nzwa ge tei dizie.✝

26 Cine penui n dade tangtsu keu kimiak tsu tei mede pe sing kam lak;

kedanemene nang kelunghta kengkap ge dizie, aide RAMPAUBE ndugai.

27 Hangdeu reu ga pailim ge keu cuhlu. Heleuhdung reu ga hereu tei kerane telui kwa gailu. Pecu gwaketang kera heleuhdung de qu gai:

Ararat, Minni, nah Ashkenaz.

Pecu gwaketang kerane reugwa muibe hangge de kedetlu; tangriem maa nzwa hekwendung ngngwa gwanglu.

28 Pecu gwaketang kerane heleuhdung de mteilu: Medes gwangpeidung nah deuceudibe,

pe kangga kedime pelane nah pe kangga kebam deudung pelane.

29 Kedanemene hangdeu mlai nah keherei dizie, RAMPAUBE Babylon de mmau kera riembam dide kecune,

Babylon deu de mina lungh kemak kemtadeu ge teidi kerane.

30 Babylon ga reugwamedung regi mtak dida; penui au penui kengkiengbam ga bam.

Penui kengkieng au mnei dida; penui mipuidung nzwa dida, pe kidung au heu bam dida, pe kirie tsiadung au pang dida.

31 Samgwame ge samgwa kedage da pakmie ranggai, nah hegwaketeime ge hegwaketei kedage dage rang

Babylon gwangpei dage pe namdi de penli ga kecang keuteu pwadi delie ranglia kera.

32 Cine hereuki reuga kebam lampuidung de tui luda; ngauraume tseheibuidung de ru bam dida,

nah Babylon reugwame de kebwak dida.

33 Kedanemene Reugwame reu RAMPAUBE, Israel Tinggwang, aide ranggai: Babylon napui au hecaipung ge nzwa.

Pecu neu kera ting dida. Peting tie mene pe da luhlüt ting gwang zieda.

34 ‘Babylon gwangpei Nebuchadnezzar ne acu tei ngkau dida,

pa acu kehebwak gage ngngwa gai dida nah libung kemrwa ge tei dida.

Neidi ge nzwa eh pa acu mnwalu,

a taktyeidung keyi le pe za teipui lu,

delwe pa acu mlwak mpet dida.’

35 Zion ga lungh kebamme rang zie, ‘A dage zaisiet tei kegaide nah a pumteih tei keherei kegaide peu Babylonme reuga gwang lulo.’

Jerusalem rang zie, ‘Peu a jai Chaldea ga kelunghme reuga bam lulo.’

36 Cine RAMPAUBE aide rangla: Pielo, Ih n tu tiak kecu ga ncu ngha zie nah n ziemne hekum teugwang beuzie.

Kedanemene Ih Babylon duidung tei cangh dizie nah pe duirwakdung tei cangh dizie.✝

37 Babylon au sia kedidung kebau pwakebam ge, maiseurungdung bam nige, kengngi ge,

nah mine rang kemsia ge dizie, cika migede lungh bam lak.

38 Babylonme hingho nzwa ngngwa mrung zie. Penui hingho nadung nzwa mra zie.

39 Penui mahengin süt cuh kecudau, Ih penui ziemne taktyei mtei beuzie; Ih penuide peu sakmie zie iciu eh penui sui yilu kerane,

nah madaude cuhdai kelak zip ge zip dizie nah mrak cuh lak, aide RAMPAUBE ndugai,

40 Ih penuide daptset kerane meuründung nzwa nah, hemeu nah meurünseudung nzwa lang nghung gaizie.

41 Babylon de tuilu da! Cine kideu pelane hetwa de tuiteu dida.

Heleuhdung kakgade Babylon sia kedi heni ge dida.

42 Babylon reuga jaaidi gwang bam dida! Pe mrung cui ne pecu tei cim dida.

43 Pe namdidung au mta mrwa ge dida, hangdeu kecangh ge nah hetaideu ge,

migede lunghkemak deu ge, nah mina tetkah gwangla kemak ge dida.

44 Cine Ih Babylon gade Bel de saja peu zie; Ih pa mnwa kedide pe mui gade keu mpet dizie,

nah heleuhdung penui recadung teu eh pe da gwang ta dizie. Babylon kiriedung kau dizie.

45 Pe dade tet dilu, a minadung. A lunghop kesia gade nnui hangge ge kecu nnuikatei nnui teilung keli kaplu.*

46 Kideu gade hacidung siukelu ziemne nnui lung ceu mede ngngi diso,

kedanemene mmi ge hacidung gwang zie. Cipau cai pecia bekum cika hacidung bam zie,

nah keregi kecu kideu ga bam dizie. Hegwang ge hegwang keda de renia zie.

47 Cine, pielo, Ih Babylon gu tei kelu mamiedung de saja peu kera tingbadung gwangla dida.

Pe deu leune hengam tei dizie, nah daptset kedi pe mina leune pe da kaumie zie.

48 Pecai tinggimdung nah kideube, nah penui da kebam pelane Babylon ziemne penui suiyi dizie.

Kedanemene pe ziemne kengkapbe tingtünle de gwang zie, aide RAMPAUBE ndugai.✝

49 Babylon ne Israelme de teitset kedi nzwa,

cine Babylonme de de teitset dizie.✝

50 Kingtie gade ringkelume, tetdi lu! Bam si tadi.

Kemdei gade RAMPAUBE de nsunglu; nah Jerusalem de nsunglu.

51 Anui au ngngam dida, kedanemene anuide kekii kwa siu delu; hengam ne anui zudung cim dida,

kedanemene sangmedung RAMPAUBE ki kemci ni ga lüt kedine.

52 Cine, pielo, tingbadung gwang zeu, aide RAMPAUBE ndugai, tei kelu pe miedung de Ih saja kepeu dau,

nah pe deu leune ga rezam kedimedung mra dizie.

53 Kedanemene Babylon tinggimdung ga mede rie pwa kebam pe kengkieng reketbam ga hang liede,

kengkapbe a dade pe da gwang di lubui, aide RAMPAUBE ndugai.

54 Babylon gade lungrei kwa ge gwang, Chaldeanme deu gade kengkap kedi ge.

55 Kedanemene RAMPAUBE Babylon de teingkap bam. Pa pe kwa keci de tei nggah bam.

Penui ngauraumedung au duidung kekieege cuidung nzwa mrung bam; penui kwa ngkieng süt dida.

56 Kedanemene ngauraume penuide ngkapdi kera gwangzeu, Babylon de!, nah pe reugwame de tuiteu dida.

Penui lakpidung au pang dida, kedanemene RAMPAUBE au hekum kepeei Tinggwang; pa Babylon de ngaulu kebui nzüt gade saja peu zie.

57 Kedanemene Ih pe gwangpeidung, makecime, pe kangga kedime, nah pe reugwame de peu sak mie zie,

nah penui zip dizie nah madaude mrak cuh lak,

aide Hegwangpei ndugai: pe zi au Tinggim reugwame reu RAMPAUBE.

58 Aide Tinggim reugwame reu RAMPAUBE rangzeu: Babylon kirie kedi de teingkap zing dizie,

nah pe kirie kehudung de ru dizie.

Ciu eh minadung pecu ngha kera gwang kecume kemta gage heta teigai dizie; heleuhdung pe ziemne tei kegai pelane ru kap dizie."

59 Aipau sam de caihakecibe Jeremiah Neriah napei nah

Mahseiah capei Seraiah de Judah gwangpei Zedekiah pa hegwang teikelu mmi mdai bekum pecu ngngwa lwe Babylon ga kemie dau kepeu sam.

Cidau Seraiah kedi teibam. 60 Kedanemene Babylon ga kengkap gwang kera ha Jeremiah laisiudum gage rau pwabam kecune, Babylon ha rau pwa kebam sam aidung pelane. 61 Jeremiah Seraiah dage rangdi, "Nang Babylon ga mie kecudau, cipau samdung de pei sahbak gailo. 62 Ciu eh nang kielo, ‘RAMPAUBO, nang aipau ni de teimsia di kera, nah mina mede makaune cika lungh bam lak, nah cide kelunghta mrwa bam kera ndugai da.’ 63 Ciu eh nang laisiudum aide pei cang keludau, tangtsu ge cika kanggai lu eh Euphrate Reuki sum gage kelien gaidi. 64 Pecai, ainzwa ranglu, ‘Babylon ainzwa nliem mie dizie. Cide cuh gailak dizie, nah penui kau zie, Ih kengkap langgai kebam de ziemne.’" Jeremiah samdung aikade cang dida.✝