1 "Aide RAMPAUBE ne ndugai—A meurün haudung de tei ngkap nah teizang kela meurün kekwamedung de au suisiet." 2 Ciziemne RAMPAUBE, Israel Tinggwang, pe minadung de kwa kelame meurün kekwamedung ziemne aide rangzeu, "Nang a meurün hau de teizang dida nah penuide tei mpak dida. Nang penui ma pielu meda. Cine Ih nang kesia tei kegai dene ncu saja peu lai eh bam dida—aide RAMPAUBE ndu kegai.✝ 3 Ih penuide teizang kegai bamdung gade Ih a meurün hau kebangbedung de hekwa luzie, nah Ih penuide taktyeibam gage ngngwa cailigwang dai gai beuzie, cika de penui tsi bui zie nah lungh nkiee luzie. 4 Pecai Ih penui mapie kera a meurün kekwamedung de teu cuhlu zie cinzwa eh penui hing si lak mede penuide tei zang si lak. Penui kette gah dilak—aide RAMPAUBE ne ndugai.

5 Pielo, peting gwangla dida—aide au RAMPAUBE ne ndugai—cidau Ih David leuh makesangme de teu cuh beuzie*.

Pa au hegwang tei zie, pa au kemteu ta tei zie nah kemzeube nah kesamsangbe hangdeu cika de tei zie.

6 Pa hegwang tei kelu dau, Judah de keli luzie, nah Israel au kwak eh lungh zie.

Pecai aipau zi de pecu qu zie: RAMPAUBE au anui kesamsangbe.*

7 Ciziemne pielo, peting gwangla dida—aide RAMPAUBE ne ndugai—penui rang si ta kedi dau, ‘RAMPAUBE ring kela nzwa, Israel minadung de Egypt deu gade teu mpet kebeube,’ 8 Cinzwa meliene penui rang zie, ‘RAMPAUBE ring kela nzwa, ngngwa cuh kebeube nah Israel leuhmedung de tingpeule deu nah penuide ngngwa tet kedi deu pelane deudung gade ngngwa cailigwang dai kebeube.’ Pecai penui au penuikatei penui deu ga lungh dizie."

9 Kenret caihakecimedung ziemne a mlung pang dida, nah a radung pelane mbeu dida. Ih au sak kemieme nzwa dida,

zau ne pereu ngking teu kedibe nzwa, kedanemene RAMPAUBE nah pe kemci samdung ziemne.

10 Kedanemene hangdeube au kemmhamedung le pui bam. Aide ziemne hangdeu be cangh bam dida.

Hetaideu ga tsehei deudung cangh di. Aipau caihakecimedung lampui au sia; penui kengking au petaube gage keu gai ma.

11 "Kedanemene caihakecimedung nah cingkumedung liede hera dida. Ih penui kesia de a ki gade ngaulu!—aide RAMPAUBE ne ndugai—

12 ciziemne penui lampui au kemui ga kereneu bam ge nzwa zie. Penuide cwak ngkau dizie. Penui cika de kau zie.

Kedanemene Ih penui dage saja kepeu bekum kengkap langgai zie—aide RAMPAUBE ne ndugai.

13 Kedanemene Samaria gade caihakecimedung daipai mau bi kecu tei kela Ih ngau da:

Penui Baal zi gade caihasam rang nah a mina Israel de peu tet mau dida.*

14 Jerusalem ga caihakecimedung kakga Ih ma kehing bedung ngau:

Penui kemmha tah tei nah mide kecwa ga tetla.

Penui makesia keteimedung badung tei nking beu; mi gede pa makesia tei kela gade nreu gwang ma.

A dade penui pelane au Sodom nzwa di nah cika kelunghmedung au Gomorrah nzwa di!"*

15 Ciziemne reugwame reu RAMPAUBE aide caihakecimedung ha rangla,

"Pielo, Ih penuide peu mabang kekaabe tyei zie nah heiring dui sak zie,

kedanemene Jerusalem ga caihakecimedung dade kehera hangdeu leune ga la dida."

16 Reugwame reu RAMPAUBE aide rang bam, "Aipau kenret caihakecimedung ne n dage caiha samdung kerang de kingnei so.

Penui ncu kenret keregui le tei pui beula! Penui au penuikatei penui kecetdung gade marengei ngau kecudung rang bam, RAMPAUBE mui gade ma.

17 Penui acu rüt kemakme dage mtak mene marang eh, ‘RAMPAUBE rang eh nnui da kezuyibe bam zie.’

Kedanemene keheibe de pe mlung ketak ga tet kelame rang zie, ‘Kengkap nnui da gwang lak.’

18 Dede cau RAMPAUBE gu baudi kempau ga sap no? Cau pesam ngau nah siu no?

Cau pesam de ga helung kai nah kingnei no?✝

19 Pielo, RAMPAUBE dade hera tingkai ge gwangla dida! Pe lungka au tet pet dida, nah tingkai kengking ge guihang la dida.

Cide au kenlienme peudung ga gui nrui bam dida.

20 RAMPAUBE rata de pa teineu kela de teicangdi kemaktane cide mtak dilak.

Tingbazie kekam dau, nang cide ci luzie.

21 Ih aipau caihakecimedung de lang mpet gai ma. Penuikatei ngau petdi.

Ih penui dage magede rang ndu gai ma, dede penui caihasam rangdi.

22 Kedanemene magade pa a baudi kempau ga sap cai, penui peu a minadung de a sam siu lubui nage;

penui ne peu penuide samdung kesia gade nah kesia tadung tei kela gade nreu luzie nage.

23 Aide RAMPAUBE ne ndugai—Ih kemna ga kela Tinggwang rünne ni nah kemdei ga kela Tinggwang be meni?✝

24 Migede kengkim bam ge ga mbai lubui ni iciu eh Ih pecu ngau tadi kera?—aide RAMPAUBE ne ndugai—

nah Ih ne tinggimdung nah kideu de tei pui meni?—aide RAMPAUBE ne ndugai.

25 Caihakecimedung ne rang kegai de Ih siu da, a zi gade kenret caihasam kerang medung. Penui ranggai, ‘Ih hemang ge mmi! Ih hemang ge mmi!’ 26 Daitiee ge aide tei zie reu no, penui kecet gade kenret caihasamdung kerang caihakecimedung, nah penui mlungdung gade kenret caihasam kerangmedung? 27 Penui hemangdung hang gege kecu pe kidacaina de paubeu eh peu a minadung de a zi nsung tadi kera riem bam, penui paumedung Baal zi ziemne a zi nsungta kedi nzwa.

28 Caihakecibe cau hemang ge mmi bi, peu pecu hemang pau lo. Dede Ih ne caude rang ndu lia gai bi, peu pecu a sam kesangbe gade ranglo. Reigau de mei tsiu ziemne dai teibeu lano?—aide RAMPAUBE ne ndugai— 29 A sam mi nzwa meni?—aide RAMPAUBE ne ndugai—nah hegeuteisang gene tangtsu gede dap pop kegai nzwa meni? 30 Aide RAMPAUBE ne ndugai—cine pielo, Ih au caihakecimedung de renia la, keheibe de mi kedame dade samdung regalu nah rang eh cidung a dade gwang de eh rang kelamedung de. 31 Pielo, Ih caihakecimedung de renia la—aide RAMPAUBE ne ndugai—penui mleudung teu caihasam rang kelamedung. 32 Pielo, Ih au caihakecimedung kenret hemang mmi kelamedung de renia la—aide RAMPAUBE ne ndugai—pecai penui dage rang beu nah ainzwa eh kenret nah hegie eh a minadung puisau tei mau di. Ih au penuide renia la, kedanemene Ih ne penuide lang mpet ma mede penuide aja peu ma. Cine penui au aipaumedung de ngha lak zing da—aide au RAMPAUBE ne ndugai.

33 Aide RAMPAUBE ne ndugai—magade mina aidungde, mede caihakecime ge, mede cingkume ge n dade, ‘RAMPAUBE gu hepwet kerüt de daipai no?’ de keteu kecudau nang penui dage ranglia beuzie, ‘Hepwet kerüt de au nang da, nah Ih ncu keu gi dizie.’ 34 Caihakecimedung, cingkumedung, nah minadung rang eh, ‘Aide RAMPAUBE gu hepwet kerüt,’ de eh rang kebammedung de Ih ne pecu nah pe kilungme de saja peu zie. 35 Nang rang jüja eh, hangge ge pe zangme nah keda Israel zangme de keteu kerabe, ‘RAMPAUBE dai samli peu no?’ nah ‘RAMPAUBE dai rang no?’ 36 Dede nang au, ‘RAMPAUBE gu hepwet kerüt,’ de rangsi tadi maisia kedanemene hepwet kerüt de au hangge ge gu pekatei pe sam da, nah nang ring kela Tinggwang samdung de tei li dida, reugwame reu RAMPAUBE, anui Tinggwang. 37 Jeremiah, caihakecibe de keteulo, ‘RAMPAUBE ncu dai samli peu no?’ mede ‘RAMPAUBE dai rang no?’ 38 Dede magade nang rang eh, ‘RAMPAUBE gu hepwet kerüt,’ aide au RAMPAUBE ne rang bam:

‘Kedanemene nang aipau samdung de rang kegai ne, ‘RAMPAUBE gu hepwet kerüt,’ Ih ncu lang gai eh rang kebeu, "RAMPAUBE pwet kerüt," de eh nang rang lak.

39 Ciziemne, ainie, Ih ne ncu keu lu eh kelien gidi lai eh bam dida, Ih ne ncu pwa kepeu namdi de nah n paumedung de si eh.

40 Pecai Ih n reu gage kelungta hengam nah madaude nsung tadi kelak ncu rangmsia kecu n da teugwang beuzie.’"