1 RAMPAUBE dade Jeremiah da sam gwang, rang eh, 2 "Kingnei lu aipau samkak kelu samdung, nah Judah ga mina hangge ge dage ndugai beulo nah Jerusalem ga kelunghme de de. 3 Penui da ranglo, ‘RAMPAUBE, Israel Tinggwang aide rang: Keheibe de aipau samkak kelu samdung de kingnei kemakme de reset dida. 4 Aipau samkak de au Ih nnui paume de Egypt deu hegeu ru lwa kera miheu ge nzwa ge gade ngngwa mpet kelu benai gade Ih aja kai kebeude da. Ih rang, "A kwa kingnei lu nah Ih aja kai kebeudung tei lulo, kedanemene nnui a mina zie nah Ih nnui Tinggwang zie." 5 A samzai teilu iciude Ih nnui paume dage sampet tei kelude kaizeu luzie, sampet kelu cide Ih penuide tungdui nah heliadui lwa kebam deu de peu kera, henai nnui lungh kebam ga.’" Iciu eh Ih, Jeremiah, keli eh rang, "Yeo, RAMPAUBO!"

6 RAMPAUBE a dage rang, "Aidungde Judahme deu namdidung ga nah Jerusalem ga puididung ga ndu gailo. Aide ranglu, ‘Samkak kelu samdung kingnei lu nah mzai lalu. 7 Kedanemene Ih nnui paupaime de Egyptme deu gade ngngwa mpet kelu benai gade henai kecang de ajadung kaibeu bam, Ih penuide rang mriak daidai eh penuide, "A kwa kingnei lu,"’ degai. 8 Dede n paume kingnei ma mede cet gai de ma. Keheibe de pe lung ketak nah pe lungning kesia teu tetla dida. Cine Ih aipau samkak de ga resetdung de peu penui da gwang kera tei. Dede penui cu de a sam mzai ma."

9 Pecai RAMPAUBE a dage rang, "Judah ga minadung penai Jerusalem ga lungh kebamme kakga heciem tei eh ngaulu. 10 Penui paume kemau tei keladung ga cailigwang di, a sam kingnei mene nah cide meliene penui hera keda caisui tei reca di. Israelme penai Judahme Ih penui paume de ngngwa samkak kelu de teipang dida. 11 Cine RAMPAUBE aide rangla, ‘Pielo, Ih penui dage kengkap kai zie, kengkap cide gade penui mria di gailak. Ciciu eh penui acu qu zie, dede Ih penui de kingnei beu tadi zie. 12 Judah ga namdidung nah Jerusalem ga lungh kebamme mie penui ne ratak tei kela rabedung de qu zie, dede penui de kengkap tingdau cidungde ne keli gailak. 13 Judah n ziemne au, ngu hera kedadung kiee pwa namdidung nsam dida. Nang Jerusalem gage kengngam ratak bamdung nah Baal ziemne marim kehengui ratak bamdung pe lampuikidung kiee ge tei gai. 14 Cine Jeremiah, nang nkatei, aipaume ziemne kekie tei so. Penui keleu gade hei hap eh kie so. Kedanemene Ih kengkap dau penui acu qu kegai de Ih kingnei lak.

15 Daitei Ih hung kelame, makesia kekiee cet bam eh kerecaki ga bam lubui ni?

Nnui ratak tei kegai heteikang nnui de ngha gailak. Nnui makesia tahdung ketei gade nnui suiyi la.✝

16 Ndaa RAMPAUBE penui de Olive bang penei keyi, nah petsi keyi ge lie eh qulu.

Dede pa cipau reu gage mi ntau gai de heratingkai kwa nzwa dizie; pe kiakdung de cum dizie. 17 Reugwame reu RAMPAUBE, nnui de ling kegaibe heta kesiadung Israelme penai Judahme tei kedi ziemne kengkap kai gaila—penui Baal de ratak tei kegaine a rata di.’"

18 RAMPAUBE acu peu aidungde ci gai, cine Ih cibam. Nang, RAMPAUBE, penui tadung de peu acu ci. 19 Acu au meurünna ge nzwa makau gitset kelame da ngngwa mie. Penui a dage tei gai kera riem pwa kelade Ih cima, "Anui tsingbang petsi si eh tei msia digo! Anui pecu keugi digo lunghkebam deu gade peu pe zi de nsungta di kerane."

20 Ciuliede reugwame reu RAMPAUBE au kemzuibe teu tutiak tei mina mlung nah kecet pie la.

N rata penui dage kekai de Ih zierang tei zie, kedanemene Ih ne n dage a ha kaibeu lu.*

21 Ciziemne RAMPAUBE n teilung peei kela Anathoth nam ha ainzwa rang, "Penui rang, ‘Nnui RAMPAUBE zi gade caiha rang gailak, mecai nnui anui ba gade tsai zie.’ 22 Ciziemne reugwame reu RAMPAUBE ainzwa rang, ‘Pielu, Ih penuide saja peu zie da. Penui rehang keyidung kingtie gade tsai zie. Penui napeime nah napuimedung herakum gade tsai zie. 23 Ih Anathothme dage kengkap keugwang zie, nah penui da saja kegwang dau, migede ringbam gailak.’"