1 Ammonme ziemne, RAMPAUBE aide ranggai,

"Israel name gah deni? Israel deu gum kera migede gah deni?

Daitei peu Molech de reca kelame de Gad gum teu dino, nah peu pe minadung de pe namdidung ga lungh dino?

2 Cine pielo, tingbaziedung gwangla dida, aide RAMPAUBE ndugai, Ih Ammonme kakga, Rabbah namdi de hereu tei kera kwa sahgai kecudau

cide pütkedi namdi ge tei dizie, nah penui namdung ru dizie.

Iciulude Israel pe dade pe deu luu teu kedime dade ngau dai luzie," de eh RAMPAUBE ranggai.

3 Heei eh haplu, Heshbon, kedanemene Ai ngkap dizie delu! Sah mra gailo, Rabbah mipuidung! Rosopai bahlu.

Haplu nah pak rwalu, kedanemene Molech de

penui cingkume nah muiteumedung de si eh tuiteu tetdi lau delu.

4 Ammon ga minadung, daitei nnui deu langkamdung ziemne hegie lano; kenlum kegah napuimedung, nnui deu langkamdung malung yisüt kecu ziemne ni?

Nnui nnui maheidung de nlum kelame rang eh cu, ‘Cauge anuide gwangketang lulai?’

5 Pielo, Ih nnui reu gage kehing ge teugwang beu lau da, aide Tinggim reugwame reu RAMPAUBE ne ndugai,

kehing aide nnuide twagwapung kebam leune dade gwang zie. Nnui hangge ge kecu pakzang dizie cide dwa gade.

Pak zang kelame de teu hekwalu kera migede bamlak.

6 Dede aipaude cai Ammonmedung de peu lunghyi dailu zie, aide RAMPAUBE ndugai."

7 Edom ha, Tinggim reugwame reu RAMPAUBE aide ranggai, "Teman ga migede lungcet keyime de peei gai lak deni?

Macilu kelamedung dade keyibe ranglia kera migede gahdi deni? Penui maci de masanglu tadi deni?

8 Paklu! Nreu caililu! Hangdeu koiki ga bamlu, Dedan ga kelunghmedung.

Kedanemene Ih Esau de saja kepeu kengkap de Ih keu gwangla di delu.

9 Kubetsi keraime n da gwang cai, penui keceu nage rai bangh beu zie ha?

Keregame tingmui gwang cai, penui luu keneube rünne gwale rega teu dilak ha?

10 Dede Ih Esau de peu paaula dida. Ih pe mbai bamdung ragi dida.

Cine pa mbai gailakta. Pe name, pe caihereiswacing medung, nah pe kidamedung de ngkap dida, nah pa bam meda.

11 Nnui gu nggianadung de püt diakgai beulu. Ih penui mapie beuzie, nah nnui gu hemipuidung acu ngngei eh lungh lubui."✝

12 Kedanemene RAMPAUBE aide ranggai, "Pielo, saja piak sakbui kemakme saja piak cide sak bi maisia. Nnui saja ngau mene tet lubui lie cet lani? Ma, nnui sak bi mene talak. 13 Kedanemene Ih a sampet dida, aide RAMPAUBE ndugai, Bozrah namdi de mi ngau kehing, ngaugia kegah, ngkap kedi, nah reset deu ge tei dizie. Namdidung pelane kelungta ngkap kedi tei dizie.

14 Ih RAMPAUBE dade samdung ge siu gwang, nah samgwame gede heleuhdung dage langgai dide lie eh,

‘Gwang ngkwalu nah penuide gwaketang cu. Hereu tei kerane mtei lulo rangbeu’.

15 "Kedanemene pielu, Ih nnuide kedame leuhme swade teiceu dida, migede nnuide rüt lak.

16 Nnuide mikedame hingla lie eh, nnui ngang kela dene nnui de cwa dida, tsura tialwa ga lungh kelamedung,

nnui kideutu kehudung gum kelumedung iciu eh cikage helie nzwa nnui ciep tei hulu eh lungh la liede.

Ih nnuide cikade teu nghung dizie, aide RAMPAUBE ndugai.

17 Edom kehing nam ge tei dizie.

Pe kengkapdung ngau kegai dau tetkah kegwang leune mbeu nah keheu dizie.

18 Sodom penai Gomorrah nah pe namdadung de ngkap kedi nzwa," RAMPAUBE rangla,

"Migede cika lungh lak; mina migede cika bam lak.*

19 Pielo, pa hang zie hingho ge Jordan hegung gade tsehei kendiak deudung ga pak kempet nzwa eh.

Kedanemene Ih mzetsüt eh Edom de cikade peu pak dizie, nah Ih kedetkelu kangge, de peu tsen rengei kera kai dizie.

Kedanemene cau Ih nzwa no, nah caune acu gwang lo eh qu lulai? Meurün kekwame cauge acu renia lulai?"

20 Cine RAMPAUBE Edom de mmau kera riem keludung de kingnei lu,

riem kelu cidungde pa Teman namdi ga kelunghme dage tei gai kera mning kebam de.

Penuide teukerei gibi dizie, kauruine ceutubedung kecang de si eh.

Penui gu heidiak deudung de luugai kelak deudung ge tei dizie.

21 Edom kaumie kecu kwa dene kideu mlai dizie. Keherei kwa mra kegai de Kegie Jaaidi gade siudi.

22 Pielo, mi kangge helie ge pe hesiu kimlwe lim kemie nzwa Bozrah de gwaketang zie.

Cipau nai Edom reugwamedung mlung mipuige hena mna tet teei nzwa dizie.

23 Damascusme ziemne liecai: "Hamath nah Arpad namdidung ngngam dizie, kedanemene penui kengkap gwang kela ha siu kelune.

Penui lung keherei bam dida! Jaaidi nzwa kenwakswak eh sünne eh bamlu meda.

24 Damascusme mnei eh pak kera nreutet dida; kehing,

suisiet nah keteei lepui, mipui kemna dau teei kela nzwa eh.

25 Dainzwa a sui kela namdi de, Ih a suiyi eh twa bam kela namdi de püt zing dedi meno?

26 Cine penui rehangmedung penui namdi sum gage kauzeu gai zie,

nah reugwame pelane de cipaunai ngkap dizie, aide Tinggim reugwame reu RAMPAUBE ndugai."

27 Kedanemene Ih Damascus kirie gage mi twa gai zie, nah cide Ben Hadad kuda kengkiengdung de ru ngkau dizie."

28 Kedar leuhme nah Hazor gwangramdung ziemne RAMPAUBE aide Nebuchadnezzar dage ranggai. (Cu Babylon gwangpei Nebuchadnezzar hegwangram aidungde de gwaketang lai eh bam):

"Cuhlu nah Kedar de gwaketang cu nah naimiak kepetle leuhdung de ngkap dilu.

29 Penui paikidung nah penui kauruine dung tui teu dizie,

penui paiki paidung nah penui nia maleune dung de si eh;

penui utdung de penui dade teu tet dizie,

nah minadung penui dage sah gai zie, "Kengngi le twagwa puipung bam dida!"

30 Paklu! Cikemak kemdei gage! Hangdeu koiki ga bamlu, Hazor ga kelungh minadung, aide RAMPAUBE ndugai,

kedanemene Babylon gwangpei Nebuchadnezzar nnuide mmau kerane heciem ge riem luda. Paklu! Caili dilu!

31 Cuhlu! Heleuh sünne eh kwak eh lungh kebamme de gwaketang kera," de eh RAMPAUBE ranggai.

"Penui au kiriekidung mede pecapdung gah, nah pe minadung katei lungh bam.

32 Kedanemene penui gu utdung tuiteu dizie, nah penui gunia kekiee ge hereu gade ngkap dizie.

Pecai Ih mina penui tam biet dui kedime de lule ailam pelane gage tei zangra dizie,

nah Ih kengkap penui dage maleune gade teugwang gai zie, aide RAMPAUBE ndugai.

33 Hazor de maiserung rünne kelungh ni ge tei dizie, kelunghta kemta deu ge.

Migede cika lungh lak; mina migede cika bamlak."

34 Aide Elam deudi ziemne RAMPAUBE sam caihakecibe Jeremiah da kegwang. Aide Judah gwangpei Zedekiah hegwang tei kelu kerai dau rang kegai sam ge, nah pa ranggai, 35 "Tinggim reugwame reu RAMPAUBE aide rangzeu: pielo, Ih Elam de tei ngkiengsüt kebam, lakpi kepwame de teipang gai lauda.

36 Kedanemene Ih tingkai tinggim tu mdai gade keugwang gui gaizie,

nah Ih Elam minadung de tu mdai gage tei zangra gaizie.

Tei zangra kegai Elam minadung deudi ket gade mie kemak bamlak.✝

37 Cine Ih Elamme de teipang pop gai zie, penui ngauraume nah penui de teitset dizie lie kelame dwa gade,

kedanemene Ih a rata süt kedi ziemne penui reu gage kengkap teugwang gai zie, aide RAMPAUBE ndugai,

nah Ih penui dage kingtie langgai zie Ih penuide ngkap ciakdi kemaktane.

38 Pecai Ih Elam gage a kedi bam dwa luzie nah penui gwangpei nah muiteumedung de cikade ngkap dizie, aide RAMPAUBE ndugai,

39 nah pecai tingbaziedung ge cai Ih Elam minadung de peu lunghyi dai luzie, aide RAMPAUBE ndugai."