1 A peu gade dui lwapet lula liecai, nah a miak miakdui reuki ge liecai!

Ih tingmui tingba a mina kekiee gede teitset kedi ziemne hap neulie.

2 Mina kangge hetaideu ga hebeuhme de peu mtaklu kebui nige acu peu cai, Ih a mina de gidi eh ladi kera.

Ih penuide gidi neulie, penui pelane au kemmha ta tei nah mide tuigaibeu kela maage kecune.

3 RAMPAUBE ndugai, "Penui kenret lakpi penui mleudung le teila,

dede penui masang ziemne penui kideu ga lungh ngking luma.

Penui kesia ge gade kesia kedage teila. Penui acu cima.

4 Mina leune kidame dade mriaklu maisia nah nnui siname keheibe de nlum so.

Kedanemene siname leune mide cwa kelame ge nah kidame leune mide rangmsia lalu.

5 Keheibede pe kidabe de rang msia nah kesangbe rang meda.

Penui mleudung mide kecwadung ledeu la. Penui kemau ketei gade mnei dida.

6 Nnui au mide kecwa tadung kakga bamla; penui mide kecwa ziemne acu mlai dida—aide RAMPAUBE ndugai."

7 Reugwame reu RAMPAUBE aide rangzeu, "Pielo, Ih penuide tei heci dai nah kedak pie zie,

kedanemene a minadung tei kedine, Ih daipai tei si lai?

8 Penui mleudung au lakpitsi kemzaubedung; penui masang kemakbedung rangla.

Penui muile penui kidame de kezuyi sam teu mpaula, dede penui mlungdung gade au kenret kera kwa bamla.

9 Aidungde ziemne Ih penuide saja peulak ni—aide RAMPAUBE ndugai—

nah Ih heleuh aikenzwa ge ziemne hekum peeilak ni?

10 Ih kideutudung ziemne hei eh hap zie, nah tseheidung ziemne tsaibai lei teizie.

Kedanemene cidungde ru dida, cine migede cika tet kahgwang gailakta. Penui makaune kwa gede siu lakta.

Tingkam ruinedung nah makaunedung pak ciau dida.

11 Cine Ih Jerusalem de tei pwa ralie kebau ge dizie, cide maiserungdung mbai bam dizie.

Ih Judah deu ga namdidung de ralie nidung nah mina lungh kemak deudung tei dizie."✝

12 Cauge maci eh aide ci lulai? Cau dage RAMPAUBE rang gai eh peu pecu aide rang ndu lai no?

Daitei eh hangdeu teimsia di, nah cide hetaideu ge nzwadi eh mina kahgwang gailak dino?

13 RAMPAUBE ranggai, "Ih penui dwa gage kaikebeu hezai de gi kedine, nah penui a sam kingnei ma mede cide ga tet kemakne, 14 dede penui lung ketak teupung eh penui peime ledeu kebeu nzwa Baal caisui kedine. 15 Cine reugwame reu RAMPAUBE, Israelme Tinggwang, aide ranggai, ‘Pielo, Ih aipaume de peu kekaa hei tyei zie nah heiring sak zie.* 16 Pecai Ih penuide nah penui paupaime cikemak heleuhdung dage tei zanggai dizie. Ih penuide ngkap cangdi kemaktane penuide renia kera reugwame langgai zie.’"

17 Reugwame reu RAMPAUBE aide ranggai, "Aide cet gailo: tsaibai

lei keteime de qu gailo; peu penuide gwanglo. Mipui kehapme de qu gailo; peu penuide gwanglo.

18 Penuide peu kelwa gwang anui reu gage tsaibai lei tei gailo,

ciu eh anui miakdui le puilu nah anui miakkum ga miakdui lwalu kerane.

19 Kedanemene Zion ga kehap kwa siu da, ‘Anuide dai kenzwa gede tei msiadi deno!

Anui ngngam zu dida, kedanemene ngauraume anui kidung tei ngkau kedine anui hangdeu cide gi dida.’

20 Cine nnui mipuidung, RAMPAUBE kwa siu lulo; pe mui gade samlia kegwang de kingnei gailo.

Nah nnui napuime de misuikesia lei keteu beulo, nah nnui kidabe pui hangge gede tsaibai lei keteu beulo.

21 Kedanemene ketsai hebakidung gade gwang dida; cide anui hegwang kidung ga lüt dida.

Cide hegwale de hename de nah heluibwame de puidikidung gade ngkap dida.

22 Aide ndu gailu, ‘Aide RAMPAUBE ndu kegai—mina ketsai paaudung luhdung ga mateu nzwa kau dizie,

nah luhgwetme mei penui cai gage gwet kau kenzeu nzwa dizie, nah cidungde pwa hekwalu kera migede gah.’"

23 RAMPAUBE aide rangla, "Makecime de peu pe maci ziemne hegie diso,

mede hereu keteibe pe kengking ziemne. Ma keheibe de peu pe mahei ziemne hegie diso.

24 Mige maleune gade hegie lacai, peu pecu acu ci kesang nah acu ci kela rünne gade hegielu.

Kedanemene Ih au RAMPAUBE, a keku au lidi lama, Ih kideu ga kemzuibe nah petaube tei kelabe. Ih aidungde ga a suiyi la—

aide RAMPAUBE ndugai."*

25 "Pielo, tingbaziedung gwang zeu—aide RAMPAUBE ndugai—pumteihbe rünne gade hegeurum kelame de saja peu kera.✝ 26 Ih saja pwa Egypt, nah Judah, Edom, Ammon, Moab, nah mina pe peutam biet dui zu kedime de saja peu zie. Kedanemene heleuh aidung pelane hegeurum luda, nah Israelme pelane samkak kelude mzai meda."✝