1 RAMPAUBE rangla, "Judah mau au hegeu kemzau tie tangtsu pemikehung kebam mui ge le rau teula.

Cide penui mlung kwak gage nah penui recabam kimiakdung gage heri teula.

2 Penui namedung kecangde penui recabam nah herabepui Asherah tsiadung nsungla,

cidungde kideutu kehudung* ga tsingbangdung tai ga bam.

3 Deudi kenza a lamlwatu ga,

nah Ih n ngauraume de n mahei nah n mabam leune de ketang eh peu dizie,

nnui kehubamdung si eh,

kedanemene nnui deu pelane gage nnui kemau teigai kedi de ziemne.

4 Ih nnuide peu kedi mapwa de nnui tei nggah dizie.

Ih nnuide pwa nnui ngauraume ba gage kai dizie, nnui cikemak deu gage,

kedanemene nnui mi mtaupwa a rata gage kai, cide kelunghta heu bam zie."

5 RAMPAUBE rangla, "Mina de nlum kelame au reset pung zie;

pa pe teih le pe kengking tei dede pe mlung be RAMPAUBE dade nreutet dida.

6 Kedanemene pa au Arabah ga tseheibang keceuna ge nzwa nah makeyibe kegwang ngaulak.

Pa tsura ni hetaideu ga bam zie, magede lunghla kemak deu ga.

7 Dede RAMPAUBE de nlum kelume au samlam pung, kedanemene RAMPAUBE au pe keregui be.

8 Kedanemene pa au tsingbang ge duireukung gage ling kegai nzwa, pe mahdung hereu gwale him pet zie.

Cide kelum kegwang dau hinglak, kedanemene peneidung au mdiak bammui la.

Cide tingrui kegah dau lungrei bam lama, nah cide petsi kei kecu mtak lak.

9 Mi mlung au ma kedabe swa mide cwa kila. Cide au sia; caune cide cilu laino?

10 Ih au RAMPAUBE mi lungbe peei kelabe, mlungdung kedakpie kelabe.

Ih hangge gede pe zai rehi gade peula, pe bata tsi de rehi gade.*

11 Nruine ge pane mbum kemak bumdung gum lubui. Mina kangge masang kemak gade hei lubui,

dede pe tingbadung pempie ge cang kedidau, mahei cidungde pecu pütdi zie nah kekam le pa kemieme ge dizie."

12 "Anui kerecaki au hegwangbam kendu bam ge, raitu gade kehu ge.

13 RAMPAUBE au Israel gu kereguibe. Ncu gikedi leune de hengam gage kai dizie; n dade nreu tet kedime zi kideu gage raugai dizie,

kedanemene penui RAMPAUBE, keringdui rwak de gi kedine.

14 Acu tei ngkei beulo, RAMPAUBO, iciude Ih yilu zie! Acu keli lulo, nah Ih keli luzie. Kedanemene nang au a ketwa lei lie.

15 Pielo, Judahme a dage kerang, ‘Daiga RAMPAUBE sam lano? Cide peu gwanglo!’

16 A ziemne au, Ih meurün kekwabe n caisui kela gade pak tetdi ma. Ih kengkap tingba de de regui ma.

Nang cibam a muileu gade ndu lia kegaide, cidungde nang kebam gade rang.

17 A dade kengngi ge diso. Kengkap tingba benai nang acu kegumbe.

18 Acu gwa kelame de peu ngngam dilu, dede peu acu ngngam diso. Peu penuide penui sui siasüt dilu, dede acu peu a sui siasüt diso.

Penuide renia eh kengkap tingba langgai lo nah kengkap aide kena kiee ge teu eh penuide teizang dilo."

19 RAMPAUBE aide a dage rang: "Mie delwe mina kirie ga saplu Judah gwangpeidung nlüt nah mpet daidi kela ga, pecai Jerusalem kiriedung leune ga. 20 Penui dage ranglo, ‘RAMPAUBE sam kingnei lulo, Judah gwangpeidung nah Judah ga mina leune, nah Jerusalem ga kelunghme aipau kiriedung gade nlüt kela leune. 21 RAMPAUBE aide rangla: "Nnui teilung de ziemne sünne lu nah Sabbath* tingba dau hepüt ge de Jerusalem riekidung ga punggwang kerane punglak.✝ 22 Kemtak benai hepüt ge de nnui kilung gade pung gwang so. Mata gede teiso, Sabbath tingba de teu ntsamlu, Ih nnui paumedung de aja kai kebeu nzwa."’ 23 Penui kingnei ma mede helung kaima, dede penui lung takbak di iciu eh penui a kwa kingnei ma mede a keledeu de luuma.

24 Magade nnui kesang tei eh a kwa kingneilu liecai—aide RAMPAUBE ne ndugai—nah aipau namdi kiriedung ga Sabbath benai hepüt ge de punggwang mecai, meliene Sabbath de keu ntsam pwa RAMPAUBE de peulu nah cidau mata ge de tei mecai, 25 iciucai hegwangpeidung, hegwangpei name nah David hegwangbam ga bam kelame aipau namdi riekidung ga Judah ga minadung nah Jerusalem namdi ga kelunghme penui nah penui muiteume bagidung nah hekündung reuga cwa eh gwang zie, nah aipau namdi de ga minadung lungh bammui luzie. 26 Penui Judah namdidung gade gwang zie nah Jerusalem twagwa kebam gade, Benjamin deu gade nah hangdeu kehenadung gade, lamlwatudung gade nah Negev gade gwang zie, penui mei reca nah perim kehengui, ketwa reca teu eh RAMPAUBE kiga gwang zie. 27 Dede nnui a kwa kingnei mecai, Sabbath tingba keu ntsam kera de nah hepüt kerüt pung kelak de nah Jerusalem riekidung ga Sabbath benai lüt kelak de, iciucai Ih kiriedung gage mi mtau gai zie, nah cide ne Jerusalem kudadung de ngkap dizie, nah cide tei mmüt gailak dizie."