1 Nebuzaradan hegwangpei de kekwame reu kedibe Jeremiah de Ramah nam gage lungmpet gai kedi cai Jeremiah da RAMPAUBE sam gwang. Pa Jeremiah de hegeuria le kang pwabam eh ngaulu, Jerusalem nah Judah gade Babylon ga hebaang tui teu mie kedime pelane de si eh. 2 Kekwabe kedibe Jeremiah de ngngwa lu eh pe da ranggai, "RAMPAUBE n Tinggwang Jerusalem nah Judah aide ga kengkap teugwang kera sampet gai dida. 3 Cine RAMPAUBE teugwang gai da. Pa pe sampet de gapte eh teigai da, kedanemene nnui pe dage kemau teigai nah pe sam mzai kemakne. Iciu kecu ziemne ma aidungde nnui dage teigai dida. 4 Dede cu pielo! N ba ga kangpwa kebam hegeuria gade Ih ncu henai lungmpet dida. Magade n dwa gade acu ngngwa Babylon ga gwang kecu petau liecai, gwanglu, nah Ih n mapie beuzie. Dede magade n dwa gade acu ngngwa Babylon ga gwang kecu petau mecai, iciucai cinzwa teiso. N dwaga kebam hangdeu leune pie gailo. N miakngau gade yi nah petau lie kecu ga miecu." 5 Jeremiah sam keli ta kedidau, Nebuzaradan rang si gai, "Ahikam napei nah Shaphan capei Gedaliah da miecu, Babylon gwangpei ne Judah namdidung reu peu kedibe tei kegai beda. Pecu ngngwa eh mina kakga bamlu mede n miakngau gade yi kecu kehei ga mielu." Hegwangpei de kekwame reu aja keteu be pecu taktyeipok nah mapeu ge peugai, nah pecai pecu peu tetdi. 6 Cine Jeremiah Ahikam napei Gedaliah da mie, Mizpah ga. Pa pecu ngngwa eh mina bangh kenzeume kakga bamdi.

7 Cidau Judahme kedime nah reugwamedung ge mikang nlüt kemakme, Babylon gwangpei Ahikam napei Gedaliah de deuceudibe hangdeu reuga teilu kecu penui siulu. Cika mipeidung, mipuidung, nah henamedung hangdeu cika ma gahtumedung, Babylon ga ngngwa tui teugwang di kemakme leune reu peu kedibe teilu kecu de siu. 8 Cine penui Mizpah ga Gedaliah da miedi. Mina aidungde au Nethaniah napei Ishmael; Johanan nah Jonathan, Kareah napeidung; Tanhumeth napei Seraiah; Netophathitme pei Ephai napeimedung; nah Maakathme napei Jaazaniah, penui nah penui minadung 9 Ahikam napei nah Shaphan capei Gedaliah penui nah penui minadung dage sampet eh cu, "Babylonme kedime kangga ma tei kera ngngi di helo. Hangdeu cika lunghlu nah Babylon gwangpei gwa teilu, nah mapelane nnui ziemne petau lubui. 10 Pielo, Ih Mizpah ga lungh bam, Babylonme anuide redau kerane kegwang dau. Cine zau, hepwak tsi, nah maca hekwalu nah nnui gu mabungdung gage kailu. Nnui gwang eh gum kelu namdidung ga lunghlu." 11 Pecai Moab ga Jewme pelane, Ammon minadung kakga, nah Edom ga, nah hangdeu pelane ga Babylon gwangpei Judah ga bangh kenzeume de peu bam kelu tei kebeu, nah Ahikam napei nah Shaphan capei Gedaliah de peu kedibe tei kelu ha de siulu. 12 Cine Jewme leune penui zangra kela heni leune gade cailigwang dailu. Penui Judah deu ga cailigwang dailu, Mizpah ga Gedaliah da. Penui zau nah hepwak tsi kekieege pwa hekwalu.

13 Kareah napei Johanan nah renam ga reugwame muibe pelane Mizpah ga Gedaliah da gwanglu. 14 Penui pe dage ranggai, "Ammon gwangpei Baalis, Nethaniah napei Ishmael de ncu teitset kerane langgai kecu nang ci meni?" Dede Ahikim napei Gedaliah penuide nlum luma. 15 Cine Kareah napei Johanan Mizpah gade Gedaliah da ngkim resiu eh ranggai, "Acu Nethaniah napei Ishmael de peu teitset lo. Migede acu mning msia lak. Pa ncu dai ziemne teitset lai? Daitei peu Judahme n dage gwang hekwa kelume nah Judah gu bangh kenzeume de ngkapti lai?" 16 Dede Ahikam napei Gedaliah ne Kareah napei Johanan dage ranggai, "Aide tei so, kedanemene nang Ishmael ha kenret rangbam lu."