1 Judah hegwangpei Josiah napei Jehoiakim Judah ga hegwang tei kelu mmi mdai bekum RAMPAUBE sam aide Jeremiah da gwang, nah pa ranggai 2 "Kehezui laisiu ge pwalu nah cika Ih Israel nah Judah, nah heleuh leune ha n dage ranglia kegaidung de raulu. Josiah hegwang tei kelu gade cu kecang Ih nnui dage marang lia kegaidung leune ziemne aide teilu. 3 Judah ga minadung Ih penui dage kekap teugwanggai lai eh mning kebam leune de siulu zie ha. Mileune penui kemau lampui gade nreu luzie ha, iciu eh Ih penui kenliendung nah kemaudung gibeu lubui lu."

4 Pecai Jeremiah Neriah napei Baruch de qugai, nah Baruch kehezui laisiu ge gage raulu, Jeremiah ne pei lia kegai gade, RAMPAUBE pe dage rang kegai samdung leune. 5 Pecai Jeremiah Baruch dage aja ge peu. Pa ranggai, "Ih hebaangki ga bam nah Ih RAMPAUBE kerecaki ga mie gailak. 6 Cine nang mie lü Ih ne pei gai eh nang kehezui laisiu gage rau kelude pei lu. Mmwang kecu benai, RAMPAUBE sam de kerecaki gade minadung dage pei lia gailu, nah Judahme penui namdidung gade kegwangme dage de peilia gailu. Samdung aide penui dage ndulia gailu. 7 Penui ngaugia kekie de RAMPAUBE da gwanglu de cilaklu. Migege kecu pe kemau lampui gade nreulu de cilaklu, kedanemene RAMPAUBE lunghop nah rata mina aidungde gade lia kegaide au hingsüt kecune." 8 Cine Neriah napei Baruch caihakecibe Jeremiah ne pecu teilo kebeudung de teiciaklu. Pa RAMPAUBE kerecaki gade RAMPAUBE samdung de pei sahbak gai.

9 Judah gwangpei Josiah napei Jehoiakim hegwang tei kelu mmi mengei bekum de kei hekui bekei, Jerusalem ga mina leune nah Judah namdidung gade kegwangme leune RAMPAUBE dwade mmwang kera ndugai. 10 Baruch Jeremiah samdung RAMPAUBE kerecaki gade pei sahbak gai, makeraube Shaphan napei Gemariah kibung gade, kigu nreu be set gade, RAMPAUBE kerecaki ga kenlüt herie tai gade. Mina leune kingnei kebam gade pa aide teigai.

11 Shaphan capei nah Gemariah napei Micaiah kehezui laisiu ga kebam RAMPAUBE samdung de siulu. 12 Pa hegwangpei kiga mie nghung, keraube kibung ga. Pielo, kedime leune cika ntum bam: Elishama makeraube, Shemaiah napei Delaiah, Akbor napei Elnathan, Shaphan napei Gemariah, nah Hananiah napei Zedekiah, nah kedime leune. 13 Pecai Baruch mina kingnei kebam gade pei sahbak kegai samdung de Micaiah penui dage paulia gai. 14 Cine kedimedung Cushi tsaswapei, Shelemiah capei, Nethaniah napei Jehudi de Baruch gage langgai. Jehudi Baruch dage ranggai, "Nang kehezui laisiu gade pei eh mina kingnei kebam de n ba gage pwalu, nah gwanglu." Cine Neriah napei Baruch kehezui laisiu de pe ba gage pwalu nah kedime da mie. 15 Pecai kedimedung Baruch dage ranggai, "Bamlu nah peu anuide siu kerane pei gai." Cine Baruch laisiu de pei gai. 16 Penui sam aidungde kingnei kelucai, hangge ge kecu hingsüt di eh penui taiga kebam hangge ge dage nreu piegai eh Baruch dage rangdi, "Anui sam aidungde hegwangpei dage pau beu bi maisia." 17 Pecai penui Baruch dage keteugai, "Anui dage ranglia gailo, Jeremiah pei kegai gade sam aidungde nang dai nzwa rau lu dibi?" 18 Baruch penui dage ranggai, "Pane sam aidungde a dage pei liagai, nah Ih kehezui laisiu aide ga kerau dui le raugai." 19 Pecai kedime Baruch dage ranggai, "Miecu, nkatei ncu hebai dilu, nah Jeremiah debai. Peu migede nnai daiga labi ciso."

20 Cine kedime makeraube Elishama kibung gage kehezui laisiu kaigai di, nah hegwangpei bung ga mie nah hegwangpei de mapelane pau beudi. 21 Pecai hegwangpei Jehudi de kehezui laisiu pwa gwang kera langgai. Jehudi mie kehezui laisiu makeraube Elishama kibung gade pwalu. Pecai pa hegwanpei nah pe taiga sap kebam kedime de pei lia gai. 22 Kei hekui bekei hegwangpei tingka kiga bam, nah mibung ge mi tei lu eh pe dwaga bam. 23 Jehudi riacum mede mdai ge peigai herizi, hegwangpei cide kieceuna ge le rai hakdi nah kehezui laisiu ru nggah cangdi kemakta cide mibung gage kelien gaidi. 24 Dede hegwangpei nah pe kilamedung sam aidungde siu kelume migede ngngi ma, mede penui penui paiheni tei hak ma. 25 Elnathan, Delaiah, nah Gemariah hegwangpei de kehezui laisiu ru helo de eh penui nggia kie, dede pa penui sam kingnei ma. 26 Pecai hegwangpei Jerahmeel dage aja kai gai, pe kibaume, Azriel napei Seraiah, nah Abdeel napei Shelemiah de makeraube Baruch nah caihakecibe Jeremiah de tuidi kera, dede RAMPAUBE penai de hebai di.

27 Pecai Jeremiah ne peigai eh Baruch rau kelu sam de nah kehezui laisiu de hegwangpei pwa ru kedi cai RAMPAUBE Jeremiah dage ranggai, 28 "Caili miecu, kehezui laisiu kedage pwalu, nah kehezui laisiu keraibe Judah hegwangpei Jehoiakim ne ru kedi dega raupwa kebam samdung pelane cikage rau gailu. 29 Pecai nang aide Judah hegwangpei Jehoiakim dage rangbeu maisia: ‘Nang kehezui laisiu de ru eh ranggai, "Nang daitei eh cika aide raugai no, ‘Babylon hegwangpei gwang eh hangdeu aide teimsia bi dizie, pa cika kebam mina nah makaune de ngkap dizie kecune’?"’" 30 Cine n ziemne aide ranggai, Judah hegwangpei Jehoiakim: "N leuhme migede David hegwangbam ga bam lak. Ncu au, n paau tingcie le pu nah tingmui hezin keilwa kecu gage kelien mpet dizie. 31 Cine Ih ncu saja peu zie, n leuhme de, nah n kilamedung de nnui kemau tei kegai de ziemne. Ih n dage, Jerusalem ga lungh kebamme dage, nah Judah ga mina leune dage Ih kekapdung de le teu keheu kegaidung teugwang zie, nnui nnui lung kai kemakdung de." 32 Cine Jeremiah kehezui laisiu kedage pwalu nah Neriah napei makeraube Baruch de peu. Judah hegwangpei Jehoiakim ne ru kedi kehezui laisiu ga kebam samdung leune Jeremiah ne peigai eh Baruch cikage raulu. Cipaureu gage, kehezui laisiu aide ga sam kenzwabedung de raugai silu.